Kariaia te Inaomata ni Koaua Mairoun Iehova
“Tirotiroa te tua are kororaoi are karekea te inaomata.”—IAKOBO 1:25.
KO KONA NI KABWARABWARAA?
Tera te tua are e kairiri nakon te inaomata ni koaua, ao antai ake a na kakabwaiaaki iai?
Tera te kawai ibukini karekean te inaomata ni koaua?
Tera te inaomata ae a kantaningaia aomata ni kabane ake a teimatoa n tei ni kawain te maiu?
1, 2. (a) Tera ae riki ngkai nakon inaomataia aomata, ao bukin tera? (b) Tera te inaomata ae mena imwaia ana toro Iehova?
TI A mena ngkai ni boong ake e a rikirake iai te bakimwane, te iowawa ao riaoan tuua. (2 Timoteo 3:1-5) Ibukin anne, a karaoi tuua aika bati tautaeka, a kamatoai aia waaki bureitiman, ao ni kanim kainrawetaamnei aika raba ake a kona n noraki iai mwakuri ni kakeru. N aaba tabeua, a kataia kaaina ni kamatoai riki aia aanga ni kamanomano ike a a kanim baika a kona n tang ngkana iai ae ninia aia auti, a kabonganai taian roka aika a taboroboro ao oon aia auti aika katiaoki. A bati aika rawa n aiwaa i tinanikun aia auti n te tairiki, ke ni kariaia natiia bwa a na takaakaro n tii ngaiia n te ngaina ke n te bong. E oti iai bwa e tabe ni kekerikaaki inaomataia aomata, ao e na bae n ririkirake te kangaanga.
2 E kamatoaa ngkoa n taekinna Tatan n te onnaroka i Eten, bwa kiingin te inaomata ni koaua bon te aki tautaekanaki iroun Iehova. E a kakoauaaki bwa Tatan bon te tia kewe ae rangi ni buakaka man iowawa! Ni koauana, e na bati riki te rawawata nakoia aomata nako ni kabatiaani karaoan oin nanoia ao tiaki nanon te Atua. Ti na rotaki naba ngaira aika ana toro Iehova n rikiraken te rawawata aei. E ngae n anne, iai ara kantaninga bwa e na kainaomataaki te botannaomata man te tautoronaki n te bure ao te iowawa, ao reken te kakukurei ae taekinaki n te Baibara are “te inaomata ae rianako arona ae reke irouia natin te Atua.” (I-Rom 8:21) Ni koauana, e a kamani katauraoiia ana toro Iehova ibukin te inaomata anne. N te aro raa?
3. Tera te tua are e a tia Iehova n angania taan rimwini Kristo, ao baikara titiraki aika ti na rinanoi?
3 Ibukini katauraoaia ana toro, e a angania Iehova te baere e taekinna te tia korea te Baibara are Iakobo ae “te tua are kororaoi are karekea te inaomata.” (Wareka Iakobo 1:25.) E rairaki ni Baibara tabeua taeka akanne bwa “te tua are moan te raoiroi, are te tua n inaomata” (Te Baibara) ao “te Tua ae e kororaoi, ae te Tua ni inaomata” (Te Baibara ni Katorika). Ma ni koauana, ngkana a iangoi tuua aomata, a aki toki n iangoia bwa a tautaekanaki iai n akea inaomataia. Tera ngkanne “te tua are kororaoi are karekea te inaomata”? Ao e kanga te tua anne ni kainaomataira?
TE TUA AE KAINAOMATAIRA
4. Tera “te tua are kororaoi are karekea te inaomata,” ao antai ake a na kakabwaiaaki iai?
4 Bon tiaki te Tua Rinanoni Mote “te tua are kororaoi are karekea te inaomata,” ibukina bwa e kaotii buure ao e kakoroa nanon te tua anne Kristo. (Mataio 5:17; I-Karatia 3:19) Te tua raa ngkanne are e taekinna Iakobo? E taekina “ana tua te Kristo” are e nanonaki naba iai “tuan te onimaki” ao “aia tua aomata aika inaomata.” (I-Karatia 6:2; I-Rom 3:27; Iakobo 2:12) E kairekerekeaki n “te tua are kororaoi” bwaai ni kabane ake e tangiri Iehova mairoura. A kakabwaiaaki iai Kristian ake a kabiraki ma “tiibu tabemwaang.”—Ioane 10:16.
5. Bukin tera bwa e aki rawawata te tua n inaomata?
5 E kaokoro “te tua are kororaoi” ma tuua ake a riai n iraki n aaba aika bati, bwa e kai oota ao e aki karawawata ao iai tuua ao booto n reirei aika bebete iai. (1 Ioane 5:3) E taku Iesu: “E kamaiu amou ao e bebete uotau.” (Mataio 11:29, 30) Irarikin anne, a aki kainnanoaki rekenikai ke katuuaa aika bati n “te tua are kororaoi,” bwa e boto i aon te tangira ao e koreaki n aia iango ao nanoia aomata ao tiaki i aoni baaba aika atibu.—Wareka I-Ebera 8:6, 10.
ARON “TE TUA ARE KORORAOI” NI KAINAOMATAIRA
6, 7. Tera ae kona n taekinaki ibukin ana kaetieti Iehova, ao bukin tera bwa e kainaomataira te tua n inaomata?
6 Iai tuua ake e a tia ni katauraoi Iehova ibukia ana aomata aika wanawana bwa a na kakabwaiaaki ao ni kawakinaki iai. Nora te katoto ni kaineti ma tuua ibukin te karikibwai, ake a tautaekana aron te korakora ao te bwai ae iai rabwatana. Akea ngurengureia aomata ibukini karawawataaia n tuua akanne. Ma a butimwaei ao ni kakaitau bwa a ataia ae a kakabwaiaaki iai. N aron naba anne, a kaotiotaki ana kaetieti Iehova ibukin te onimaki ni koaua, ao te aroaro ni maiu ae riai n “te tua are kororaoi” mairouni Kristo ake a na kakabwaiaaki iai aomata.
7 Irarikin are e riki te tua n inaomata bwa kamanoara, e buokira naba ni karaui nanora ni baike ti tangiri aika riai, n akea ruanikaira ke kakeaani bongaia tabemwaang ao inaomataia. Te kawai ibukini karekean te inaomata ni koaua ni karaoan ae ti tangiria, boni karikirakean tangirani baika riai ake a boraoi ma aroaron Iehova ao ana kaetieti. E nanonaki n aei bwa ti riai n reireinira aron Iehova n tangira te raoiroi ao n ribaa te buakaka, ngkai bon anne are e buokira iai te tua ibukin te inaomata bwa ti na karaoia.—Amota 5:15.
8, 9. Baikara kakabwaiaaia naake a nimta te tua n inaomata? Kabwarabwaraa.
8 Ti kabokorakora ma tangirani karaoan ae bure ibukina bwa ti aki kororaoi. Ma ti kona ni karekei inaomatara n taai aikai, ngkana ti kakaonimaki n nimta te tua n inaomata. N te katoto: E a tibwa reirei n te Baibara Jay are e tautoronaki n tangiran te baakee. E a karaoa ana motinnano ngke e a ataia ae e aki kukurei te Atua n arona aei. E na teimatoa teuaei n ira nanona ke e na ongeaba iroun Iehova? E wanawana n rinea te toro iroun te Atua, e ngae ngke e rangi n tangira te moko. Tera ana namakin ngke e a tokanikai n ana kangaanga aio? E taku imwina riki: “I a rangi n inaomata ao e rotai te kukurei ae bati.”
9 E a ataia Jay man ana kangaanga bwa inaomataia aomata ae kairiia nakoni “kaibwabwarun te rabwata,” bon tautoronakia n te bure. Ma te inaomata are mairoun Iehova e nanonaki iai “iaiangoani bwain te taamnei,” are e na kainaomataira ao ni kairira nakon “te maiu ao te rau.” (I-Rom 8:5, 6) E karekea ia korakorana Jay are e a tokanikai iai i aon tautoronakina? Tiaki mairouna ma boni mairoun te Atua. E taku: “I katoatai n ukeuke n reirei n te Baibara, I tataroa te taamnei ae raoiroi ao ni butimwaea te ibuobuoki ae aanaki n te tangira man te ekaretia ni Kristian.” Ti kona ni bane ni buokaki ni karaoani baikai bwa ti na karekea te inaomata ni koaua. Ti na nora aroni karekeana.
TIROTIROI ANA TAEKA TE ATUA
10. Tera ae nanonaki n ‘tirotiroan’ ana tua te Atua?
10 E taekinaki ae kangai n Iakobo 1:25: “Ane tirotiroa te tua are kororaoi are karekea te inaomata ao n teimatoa iai . . . e na kukurei ngkai e karaoia.” E rairaki te moan taetae ni Kuriiti nakon te taeka ae “tirotiroa” ae nanonaki iai “baraaki n taraia raoi” ao e tangiraki iai te kakorakora. Ngaia are ngkana ti tangira te tua n inaomata bwa e na rota ara iango ao nanora, ti riai n taningamarau n ukeuke n reirei n te Baibara ao ni kananoi ara iango n te bae ti warekia ao n tataroi.—1 Timoteo 4:15.
11, 12. (a) E kanga Iesu ni katuruturua kainnanoakini bwainan te koaua bwa anuani maiura? (b) N aron ae kabwarabwaraaki mai eta, tera te kangaanga ae a riai riki n tarataraia mai iai rooro n rikirake?
11 Ti riai n “teimatoa” ke n nanomwaaka ni maiuakina Ana Taeka te Atua n te tai naba anne, bwa e aonga n riki te koaua bwa anuani maiura. E taekina naba te iango anne Iesu ngke e kangai nakoia tabeman ake a kakoauaa: “Ngkana kam teimatoa n taua au taeka, ao bon taan rimwiu ngkami, ao ane kam na ataa te koaua, ao e na kainaomataingkami te koaua.” (Ioane 8:31, 32) E taekinaki n te boki teuana bwa te taeka ae “ataa” e nanonaki naba iai, “te kakaitau ibukina bwa e rangi ni kakawaki ke ni manena te bwai ae ‘ataaki’ iroun ane e ataia.” Ngkanne ti a kona n “ataa” raoi te koaua ngkana e a riki bwa anuani maiura. Imwina, ti a kona n taekinna bwa e “mwamwakuri” i nanora “ana taeka te Atua,” ni bitii maiura n te aro are ti a katotonga riki Tamara are i karawa.—1 I-Tetaronike 2:13.
12 Titirakiniko ni kangai: ‘I ataa raoi te koaua? E a riki bwa anuani maiu? Ke I teimatoa n tangira te “inaomata” are irouia aomata?’ E uringa aroni kaikawaana irouia ana karo aika Kristian te tari te aine ae te roro n rikirake, ao e korea ae kangai: “E memena Iehova i rarikim n taai nako ngkana ko kaikawaaki n te koaua. Ma e kaokoro ma ae riki nakoiu bwa I aki roko n te ataa te Atua. I aki reireinai ribaakini baike e ribai. I aki kakoauaa ae e tabeaianga ni baike I karaoi. Ao I aki ataia ae I riai n tataro nakoina ngkana iai au kangaanga. I bon onimakina oin au ataibwai, are I a ataia ngkai bwa bon te iango n nanobaba ibukina bwa bon akea au atatai iai.” E kakukurei bwa e iangoia te tari aio rimwi riki bwa e kairua ana iango, ao e a karaoi bitaki aika korakora. E a karaoa ngkai te mwakuri n regular bwaiania.
E KONA NI KAINAOMATAKO TE TAAMNEI AE RAOIROI
13. E kanga te taamnei ae raoiroi mairoun te Atua ni buoka kainaomataakira?
13 Ti wareka ae kangai n te 2 I-Korinto 3:17: “Ike e mena iai taamnein Iehova ao iai te inaomata iai.” E kanga te taamnei ae raoiroi ni buoka kainaomataakira? I buakoni bwaai riki tabeua, e karikirakei i nanora aroaro aika a kainnanoaki ibukin te inaomata n aron “te tangira, te kimwareirei, te rau, te taotaonakinnano, te akoi, te raoiroi, te onimaki, te nimamannei, ao te taubaang.” (I-Karatia 5:22, 23) A aki kona aomata n inaomata raoi ngkana akea aroaro akanne, ai moarara riki te tangira, ae te aroaro ae kakoauaaki n te aonnaba bwa e kainnanoaki ni boong aikai. E kakannongora bwa imwini karinanakin uaan te taamnei iroun te abotoro Bauro, e a korea ae kangai: “Akea te tua ae ekinako baikai.” Tera ae e nanonna iai? E aki tiatianaki uaan taamnein te Atua n tuua ake a kona n totokoi rikiraken aroaro aikai. (I-Karatia 5:18) Ngaia are tera kakawakin te tua anne? Bon nanon Iehova bwa ti na karikirakei aroaro ake e kaotiotii Kristo, ao ni maiuakini n aki toki.
14. N aaro raa are a a tautoronaki iai te koraki ake a kairaki n nanon aon te aba?
14 A kona n iangoia te koraki ake a tautoronaki n nanon aon te aba, ao ake a katoki nanoia ni kaibwabwarun te rabwata bwa a inaomata. (Wareka 2 Betero 2:18, 19.) Ni koauana, a aki ataia ae a bon tautoronaki. A rangi ni bati tuua ao kaetieti ake a kona n tiani naano ao aroaro aika kammaraki. E taku Bauro: “E aki kateaki te tua ibukin te aomata ae raoiroi, ma e kateaki ibukia aomata aika buakaka ma aika akiako.” (1 Timoteo 1:9, 10) A a riki naba bwa ana toro te bure, ngke a kairaki bwa a na karaoi “baike e tangiri te rabwata” ae mataniwin te ribuaka. (I-Ebeto 2:1-3) A riki aomata akanne bwa kaanga maan aika bingingi ake a kawakawa nako nanon te boora ni kamwaimwai. Ibukin nanoia n tangira kanoan te boora anne, ao n te tai ae e aki maan a a noria bwa a mwane.—Iakobo 1:14, 15.
TE INAOMATA AE REKE N TE EKARETIA NI KRISTIAN
15, 16. Tera kakawakin ara iraorao ma te ekaretia, ao baikara inaomatara ake ti karekei?
15 Ni moanakin am iraorao ma kaain te ekaretia ni Kristian, ko a aikoa iririi kirabu n takaakaro n aekaia nako. Ma ko a rin n te ekaretia bwa e katikiko Iehova. (Ioane 6:44) Tera are e kairia bwa e na karaoa anne? E nora te aomata ae raoiroi ae mamaaka te Atua? Ko na bae ni kangai: “Tiaki ngaia anne!” Ma tera ae noria te Atua? E nora te nano ae ongeaba nakon te tua n inaomata, ao ni butimwaea ana kairiri ae akoi. E a tia Iehova ni kanuaiko n amwarake n taamnei i nanon te ekaretia, e kainaomatako man aia kewe Aaro ao reirei aika boto i aoni maakakia taimonio, ao e reireiniko naba arom ni karikirakei aroaroni Kristo. (Wareka I-Ebeto 4:22-24.) N tokina, ko na kakabwaiaaki ngkana ko a mena i buakoia naake a tau n aranaki bwa “aomata aika inaomata” n te aonnaba.—Iakobo 2:12.
16 Iangoa aei: Ko namakina te maaku ngkana ko mena i buakoia ake a tangira Iehova ma nanoia ni kabane? Ko tabeakinaki ngkai ko a tibwa iri? Ngkana ko maroro n te Tabo n Taromauri, ko taui ni kamatoai am bwai bwa a rawa n anaaki? Ko na bon aki! Ko namakina te rau ao te inaomata. Ko namakina aekakin anne i buakoia aomata aika bati n taabo riki tabeua? Ko bae n aki! Ma ae kakawaki riki, te inaomata ngkai ae ko karekea i buakoia ana aomata te Atua, boni bannan te inaomata ae imwaim.
“TE INAOMATA AE RIANAKO ARONA AE REKE IROUIA NATIN TE ATUA”
17. E kanga n irekereke “kaotakia natin te Atua” ma kainaomataakin te botannaomata?
17 E korea ae kangai Bauro ni kabwarabwaraa te inaomata are e katauraoia Iehova ibukia ana toro i aon te aba: “A bane n ingainga baika karikaki ni kariariaa kaotakia natin te Atua.” E a manga taku: “A na manga kainaomataaki baika karikaki man te tautoronaki i aan te mka, ma ni karekea te inaomata ae rianako arona ae reke irouia natin te Atua.” (I-Rom 8:19-21) Nanoni “baika karikaki” bon te botannaomata ake a kantaningaa te maiu n aki toki i aon te aba, aika a na kakabwaiaaki mani “kaotakia” natin te Atua aika taamnei aika kabiraki. E na moanaki kaotakia “natin” te Atua ngkana a kautaki nakon te aba n taamnei, ike a na uataboa kamaunaakin te buakaka n te aonnaba ma Kristo, ao ni kawakina itiakia “te koraki ae uanao” n te waaki ae boou.—Te Kaotioti 7:9, 14.
18. E na kanga n rikirake inaomataia botannaomata aika ongeaba, ao tera te inaomata are a na karekea n tokina?
18 A na rinanon te inaomata ae okoro te botannaomata ake a kainaomataaki man ana kariri Tatan ao ana taimonio. (Te Kaotioti 20:1-3) Ai karaunanora anne! Imwina, a na teimatoa Kristo ma raona n uea ao n ibonga ake 144,000, ni kainaomataia botannaomata rinanon te karea ni kaboomwi teutana imwin teutana, ni karokoa reken te inaomata ni koaua man te aki kororaoi ao ana bure Atam. (Te Kaotioti 5:9, 10) Imwin norani kakaonimakia aomata ni kataakia, a na anganaki te inaomata ae kororaoi iroun Iehova ae “te inaomata ae rianako arona ae reke irouia natin te Atua,” are ana moani kantaninga ibukia. Iangoia! Ko na aki manga kabokorakora ni karaoa ae raoiroi i matan te Atua, bwa a na kororaoi bwain rabwatam ni kabane ao a na onikaki ni kaineti ma katotongan aroaron te Atua.
19. Tera ae ti riai ni karaoia ni boong aikai, ngkana ti kan teimatoa n nakonako ni kawain te inaomata ni koaua?
19 Ko kariariaa “te inaomata ae rianako arona ae reke irouia natin te Atua”? Ngkana ngaia anne, kariaia kairan am iango ma nanom n “te tua are kororaoi are karekea te inaomata.” Eng, taningamarau n ukeuke n reirei n te Baibara. Maiuakina te koaua. Tataroa te taamnei ae raoiroi. Karekei kakabwaia man amwarake n taamnei ake e katauraoi Iehova ao irirakini bobotaki n ekaretia ni Kristian. Tai kariaia Tatan bwa e na mwamwanaiko n aron are e karaoia nakon Ewa bwa ko na iangoia ae a rangi ni matoatoa irakin nanon ana tua te Atua. Ni koauana, e kona n rangi n nanowanawana te Riaboro. Ma n aron ae ti na noria n te kaongora ae imwina, ti riai n aki “konaaki iroun Tatan, ngkai ti aki babanga n ana kunemwaan.”—2 I-Korinto 2:11.
[Taamnei n iteraniba 14]
E korakora irou tangiran te “inaomata” are irouia aomata?
[Taamnei n iteraniba 14]
E riki te koaua bwa anuani maiu?