Karekea Reireiam Man Ana Taeka te Atua
Tera ae na Riki n te Bongi ni Motikitaeka?
A na rinanoaki titiraki aika ko bae n tia n tabeki n te kaongora aei, ao ni kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.
1. Tera te Bongi ni Motikitaeka?
N aron ae kaotaki n te taamnei ae n te angaatai, a bati aomata ake a iangoia bwa n te Bongi ni Motikitaeka ao a na tei i matan ana kaintokanuea te Atua birion ma birion aomata, bwa a na motikaki taekaia ni baike a kakaraoi rimoa ike a a kona iai n anganaki tabeman kaniwangaia ae te maiu i karawa, ao ake tabeman a na kabuekaki n te ai ni moone n aki totoki. Ma e ngae n anne, e taekinaki te Bongi ni Motikitaeka n te Baibara bwa boni kamaiuakia aomata man te ribuaka. (Taian Areru 96:13) E a tia n rineaki Iesu iroun te Atua bwa te tia Moti are e na kaoka te kaetitaeka ae riai nakoia botannaomata.—Wareka Itaia 11:1-5; Mwakuri 17:31.
2. E na kanga ni kaokaki te kaetitaeka ae riai n te Bongi ni Motikitaeka?
Ngke e karitei te moan aomata are Atam nakon te Atua, a a bane naba kanoana n turaki n te bure, te rawawata ao te mate. (I-Rom 5:12) Ni kaetan te ribuaka anne iroun Iesu, e nang kamaiuia ke ni kautiia aomata aika birion ma birion man te mate. E kaotaki n te boki ae Te Kaotioti bwa e na karaoaki aei i nanon tenga te ririki are e na tautaeka iai Kristo Iesu.—Wareka Te Kaotioti 20:4, 11, 12.
A na motikaki taekaia ake a kautaki, tiaki man te bwai are a karaoia imwaini mateia, ma bon i aon te bwai are a karaoia imwini kaotani kanoan “nira ni boki” ake a taekinaki n Te Kaotioti mwakoro 20. (I-Rom 6:7) E taekinna te abotoro Bauro bwa e na reke aia tai “akana raoiroi ma akana aki raoiroi” n reiakina taekan te Atua i buakoia te koraki ake a na kautaki.—Wareka Mwakuri 24:15.
3. Tera ae na kakororaoaki n te Bongi ni Motikitaeka?
A nang reke aia tai ni bitii maiuia ao ni karaoi mwakuri aika raraoi naake a mate n akea ataakin te Atua ae Iehova ao n aki beku ibukina. Ngkana a karaoa anne, e na riki kautaia bwa “te mangauti are te maiu.” Ma iai tabeman i buakoia aika kautaki ake a na rawa n reiakini kawain nako Iehova. Boni ngaiia ake a na nakon “te mangauti are te kabuakakaaki.”—Wareka Ioane 5:28, 29; Itaia 26:10; 65:20.
N tokin te Bongi ni Motikitaeka ae abwakina tenga te ririki, e nang tia ni kaoka iai te kororaoi are n te moantai Iehova nakon te botannaomata ae ongeaba. (1 I-Korinto 15:24-28) Ai raoiroira te kantaninga anne ibukia aika ongeaba ni kabane! N te kabanea ni kataaki, ao e na kaotinakoaki Tatan te Riaboro iroun te Atua man te kinono are e kabaeaki i nanona n te maan ae tenga te ririki. E na manga kataia riki Tatan ni katikiia nako aomata mairoun Iehova, ma a na karekea te maiu n aki toki i aon te aba te koraki ake a rarawa nakon Tatan.—Wareka Itaia 25:8; Te Kaotioti 20:7-9.
4. Tera te bong ni motikitaeka teuana are a na kakabwaiaaki iai te botannaomata?
E kabonganaaki naba te taeka ae “te bong ni motikitaeka” n te Baibara ibukin te bwai ae na riki are e na karokoa tokin te waaki ae ngkai i aon te aba. E na rina n roko te bongi ni motikitaeka aei n aron te Ieka n ana bong Noa are a kamaunaaki iai aomata ni kabane aika buakaka. E kakukurei bwa e a rangi ni kaani kamaunaakia “aomata ake a aki karinea te Atua” ike e nang kaitiakaki iai te kawai ibukini karekean te botannaomata ae boou i aon te aba are “e na mena iai te raoiroi.”—Wareka 2 Betero 3:6, 7, 13.
Ibukin rongorongona riki tabeua, nora iteraniba 213-215 n te boki, Tera Ana Reirei ni Koaua te Baibara?, aei ae boreetiaki irouia Ana Tia Kakoaua Iehova.
Taamnei n iteraniba 16]
“Te Kabanea ni Motikitaeka,” Iroun Gustave Doré 1832-1883
[Taamnei ni iteraniba 16]
Engravings by Doré