Titiraki Aika Kaekaaki Man Te Baibara

Tera te Bong ni Motikitaeka?

N taai ake a karakinaki n te Baibara, e kamanenaia taani motikitaeka te Atua ni kamaiuia ana aomata man te ribuaka. (Taani Motiki-Taeka 2:18) E kabwarabwaraaki n te Baibara taekan te Bong ni Motikitaeka n te tai ae na roko bwa te tai ni kukurei, ike e nang kamaiuia iai ana aomata Iehova ae te tia Motikitaeka i aonnaba ni bane man te ribuaka.—Wareka Taian Areru 96:12, 13; Itaia 26:9.

E mwiokoaki Iesu iroun te Atua bwa e na anga te kaetitaeka ae riai nakoia aomata aika maiu ao aika mate. (Mwakuri 10: 42; 17:31) A mwaiti aika mate n akea ataakin te Atua irouia. N tain te Bong ni Motikitaeka, e na manga kautiia aomata akanne Iesu bwa a aonga n ataa te Atua ni koaua ao n tangiria naba.—Wareka Mwakuri 24:15.

Bukin tera ngkai tenga te ririki maanin te Bong ni Motikitaeka?

A na kautaki maate i nanon tenga te ririki. (Te Kaotioti 20:4, 12) A kainnanoa te tai ibukin reiakinani kawain te Atua ao n ongeaba naba irouna. Ni kaitaraan te iango ae taabangaki irouia aomata, e kaotaki n te Baibara bwa a na motikaki taekaia aomata ni kaineti ma baike a karaoi imwini mangautiia.—Wareka I-Rom 6:7.

E kabwarabwaraaki naba n te Baibara bwa e na karina n roko te bong ni motikitaeka imwaini moanakin ririki ake tenga. E aranaki naba te bong anne bwa te toki n aron are e kabwarabwaraaki ni kaongora aika mai moa n te maekatin aei. N te bong anne, e na kamaunaia aomata te Atua aika a aki karinea ao aika buakaka. (2 Betero 3:7) Mangaia are ti riai n taraia raoi bwa ti na kaotiota tangiran te Atua.—Wareka 2 Betero 3:9, 13.