Titiraki Aika Kaekaaki Man te Baibara

Te aeka n aomata raa te Atua?

Bon te taamnei ae aki kona n noraki te Atua. E karika karawa, te aonnaba ao bwaai aika maiu ni kabane. Bon akea ae karika te Atua ao akea naba moana. (Taian Areru 90:2) E tangiriia aomata te Atua bwa a na ukoukoria ao n ataa te koaua ibukina.​—Wareka Mwakuri 17:24-27.

Bon te aomata te Atua ae ti kona ni kinaa n arana. Ti kona naba n atai aroarona tabeua rinanon iaiangoani baike e a tia ni karaoi. (I-Rom 1:20) Ma ngkana ti kani kinaa raoi te Atua, ti riai n reiakina ana Taeka ae te Baibara. Ti reiakina iai aroaron te Atua ae tatangira.​—Wareka Taian Areru 103:7-10.

Tera ana iango te Atua ibukin te ribuaka?

E ribaa te ribuaka ara tia Karikiriki ae Iehova. Ao e karikiia aomata bwa katotongana. (Te Tua-Kaua 25:16) Anne bukina ngkai angiina mai buakora a bon ribaa te ribuaka. E bon aki riki te ribuaka ae bati n te aonnaba aei mairoun te Atua. E angania aomata te Atua te inaomata ni karaoa ae a tangiria. Ma e kananokawaki bwa a bati aomata aika a aki kamanena raoi te inaomata anne ike a a kaotiota iai te ribuaka. E bon rawawata nanon Iehova.​—Wareka Karikani Bwaai 6:5, 6; Te Tua-Kaua 32:4, 5.

E tangira te kaetitaeka ae riai Iehova, ao e na aki taotaona nanona nakon te ribuaka n aki toki. (Taian Areru 37:28, 29) E beritanaki n te Baibara bwa n te tai ae waekoa ao e nang katoki aaro n ribuaka ni kabane te Atua.​—Wareka 2 Betero 3:7-9, 13.