4 E Ribuaka te Atua e Koaua Anne?

Tao ko a tia n ongongo aei: “E tautaekana te aonnaba aei te Atua, ao a a riki bwaai ni kabane ibukin nanona. Kioina ngkai e onrake te aonnaba n te inanonano, te rawawata ao te ribuaka, e riai ni bukinaki iai te Atua.”

Ana reirei te Baibara: Tiaki nibwan te ribuaka te Atua. E kabwarabwaraaki aron Iehova n te Baibara ni kangai: “Moan te raoiroi ana makuri; Ba bon te kaeti-taeka ae riai ana aro ni kabane.”—Te Tua-Kaua 32:4, BG.

E tituaraoi te Atua nakoia aomata nako, n ikotaki naba ma akana buakaka. N te katoto, “e kaotaa taai i aoia aomata aika buakaka ma aika raoiroi, ao e kabwakaa te karau i aoia aika eti aroia ma aika aki eti.” (Mataio 5:45) E tabeakinia aomata ni kabane aika a kaokoro aia reeti ke kateiia ma te kaeti taeka ae riai, n aron ae kaotaki ni Mwakuri 10:34, 35 ae kangai: “E bon aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.”

Tera ngkanne nibwan te ribuaka? A rineia aomata aika bati bwa a na inanonano, ao a na aki katotonga aroaron te Atua ae te kaetitaeka ae riai. (Te Tua-Kaua 32:5) Irarikin anne, e kaotaki n te Baibara bwa e kariaia te Atua bwa e na tautaekana te aonnaba te tia kairiribai are te Riaboro.a (1 Ioane 5:19) Ma e ngae n anne, e nangi waekoa n toki kariaiakan ana tautaeka Tatan iroun te Atua. E a kamani katauraoi baika kainnanoaki ibukin ‘uruakan ana mwakuri te Riaboro.’—1 Ioane 3:8.

Buokam n ataan te koaua: Ko bae n tabeaianga n rongorongon te babakanikawai, te rawawata ao mwakuri n ribuaka aika taraa n akea tokia. E buokiko ataakin nibwani kangaanga nako aikai bwa ko na ataa bukini korakoran te buakaka n te aonnaba, ao bukin naba kabwakan aia kekeiaki aomata ni karika te aonnaba bwa te tabo ae raoiroi riki. (Taian Areru 146:3) N oneani mwini kabanean te tai ao te korakora ae bati ibukini karaoani bitaki nakon te waaki ae ngkai aika a na aki teimatoa, ko a kona ni karekea te kantaninga ae nene ibukin taai aika imwaira aika boto i aon onimakinan ana berita te Atua.—Te Kaotioti 21:3, 4.

Ti na buokaki ngkana ti rotaki n te kangaanga n ataakin nibwan te mwakuri n ribuaka. Ngkana e ribuaka temanna nakoira, ti kona n takarua n aron ana toro te Atua ae Abakuka ni kangai: “E mamara te tua, ao e bon aki oti nako te kaeti-taeka ae riai n tokanikai.” (Abakuka 1:4, BG) E aki takuaki Abakuka iroun te Atua ibukin ana taeka aei. Ma e karaua nanon ana toro aei te Atua, bwa E a tia ni bairea te tai ibukini kaetani kangaanga aikai ni kabane, ao e buoka Abakuka bwa e na kukurei, e ngae ngke e kaaitarai kangaanga n taai akanne. (Abakuka 2:2-4; 3:17, 18) N aron anne, e kona n anganiko te raunnano onimakinan ana berita nako te Atua ni kaineti ma kaetani mwakuri n ribuaka ni kabane.

[Kabwarabwara ae nano]

[Kabwarabwaraan n iteraniba 7]

E riai ni bukinaki te Atua ibukin te rawawata ao mwakuri n ribuaka?

[Picture Credit Line n iteraniba 7]

© Sven Torfinn/Panos Pictures