TITIRAKI AIKA KAEKAAKI MAN TE BAIBARA

Antai aran te Atua?

Bon iai arara ni kabane aika kakaokoro nako n ara utu. Iai naba araia maan! Tiaki bwa e riai naba n iai aran te Atua? A bati nakoan te Atua n te Baibara n aron te Atua ae Moan te Mwaaka, te Uea ae Moan te Rietata, ao te tia Karikiriki ma bon iai naba oin arana.​—Wareka Itaia 42:8.

A bati rairai n te Baibara aika kaota aran te Atua n aron Taian Areru 83:18. N te katoto, e taekinaki ae kangai n te kibu anne n TE BAIBARA (BG): “Ba a aonga n ataiko, ae Iehova aram, ba bon ti Ngkoe Teuare Moan te Rietata i aonaba ni bane.”

Bukin tera bwa ti riai ni kamanena aran te Atua?

E tangirira te Atua bwa ti na boni kamanena arana. Ngkana ti maroro ma aomata aika ti tangiriia, n aroia raoraora ake ti kaani ma ngaiia, ti boni kamanenai naba araia. E riai ni kaokoro anne ngkana ti maroro naba ma te Atua? Irarikin anne, e kaungaunga Iesu Kristo bwa e na kamanenaaki aran te Atua.​—Wareka Mataio 6:9; Ioane 17:26.

Ma ngkana ti kan riki bwa raoraon te Atua, e bati riki ae ti riai n ataia ibukina nakon tii ataakin arana. N te katoto, tera aroaron te Atua? E koaua bwa ti kona ni kaanira ma te Atua? Ko kona ni karekei kaekaan titiraki akanne n te Baibara.