Ko Ataa Aran te Atua ao ni Kamanena?

Ko kona n iangoia bwa iai raoraom ni kaan ae ko aki ataa arana? E boni bae n akea. E taku te aine ae kaain Bulgaria ae arana Irina: “E boni kangaanga kaanian te Atua ngkana ko aki ataa arana.” E kakukurei bwa n aron ae taekinaki n te kaongora ae imwain aei, e tangiriko te Atua bwa ko na kaania. Mangaia are e a tia ni kabwarabwaraa arana nakoim n te Baibara ngke e kangai: “Bon Iehova Ngai; bon arau aei.”—Itaia 42:8, BG.

E kakawaki iroun Iehova ataakin arana ao kamanenaana ke e aki? Iangoa aei: E kaania 7,000 te tai aran te Atua n te taetae n Ebera ae e ataaki bwa te Tetragrammaton, n te moani Baibara n Ebera. E rangi n okioki riki nakon aara riki tabeua aika a aki toki ni mwaneweaki n te Baibara. Ni koauana, e oti n aei bwa e tangirira Iehova bwa ti na ataa arana ao ni kamanena.a

Ma e ngae n anne, a bae n namakinna tabeman bwa kioina ngkai e tabu te Atua ao moan te mwaaka, e na bon aki karineaki ngkana e kamanenaaki arana. Ni koauana, bon te kairua kamanenaan aran te Atua n te aro ae aki riai, n aron ae ko aki kamanena aran raoraom ni kaan n te aro ae aki riai. Ma e ngae n anne, bon nanon Iehova bwa aomata aika a tangiria a boni karinea arana ao ni kaotiotia. (Taian Areru 69:30, 31; 96:2, 8) Uringnga bwa e reireinia taan rimwina Iesu bwa a na tataro ni kangai: “Tamara are i karawa, e bia katabuaki aram.” Ti kona n uataboa katabuan aran te Atua ngkana ti kaotiotia. Ni karaoan aei, ti a kaaniaki riki ma ngaia.—Mataio 6:9.

E kaotaki n te Baibara bwa e mutiakinia te Atua n te aro ae okoro “akana iangoa arana.” (Maraki 3:16, BG) E berita Iehova ni kaineti ma te aomata anne ni kangai: “N na kawakina ane e aranai bwa Iawe. Ngkana e weteai, ao N na kaekaa; ngkana e kainnano, ao N na mena i rarikina.” (Taian Areru 91:14, 15, BK) E kakawaki ataakin ao kamanenaan te ara ae Iehova ngkana ti kani karekea ara iraorao ae kaan ma ngaia.