Antai Aran te Atua?

Ngkana ko kani kinaa temanna, ko na bae ni kan titiraki moa ni kangai, “Antai aram?” Ngkana ko na titirakina te Atua te titiraki aei, tera ae e na taekinna?

“Bon Iehova ngai. Bon aei arau.”​—Itaia 42:8.

E boou te ara aei iroum? E boni bae bwa a bati taan rairai n te Baibara aika aki bati ni kabongana aran te Atua, ke a bon aki kabongana. A aki toki n onea mwina n te nakoa ae “TE UEA.” Ma bon iai aran te Atua 7,000 tabun te tai n te moan taetae are koreaki iai te Baibara. Iai aua manin te koroboki n te taetae n Ebera n te ara anne aika YHWH ke JHVH, ao a a maan n rarairaki bwa “Iehova” n te taetae ni Kiribati.

Iai aran te Atua n te koroboki n te taetae n Ebera ao n rairai aika bati

BUKINI KAKAWAKIN ARAN TE ATUA

E kakawaki te ara aei iroun te Atua. Akea ae e ingoana te Atua, ma boni ngaia ae e bairea arana. E taku Iehova: “Bon arau aei n aki toki ao aei te aro ae N na ururingaki iai man te roro teuana nakon te roro teuana.” (Te Otinako 3:15) E bati riki okiokin aran te Atua n te Baibara nakon nakoana aika, Moan te Mwaaka, te Tama, te Uea, ke te Atua, ao e bati naba nakon araia aomata n aron Aberaam, Mote, Tawita, ke Iesu. Ao bon nanon naba Iehova bwa e na ataaki arana. E kangai te Baibara: “Ke a ataiko aomata ae Iehova aram, bwa bon tii ngkoe Teuare Moan te Rietata n te aonnaba ni kabutaa.”​—Taian Areru 83:18.

E kakawaki te ara aei iroun Iesu. N te tataro are e araranaki bwa Tamara are i Karawa ke Ana Tataro te Uea, ao e reireinia iai taan rimwina Iesu bwa a na bubutiia te Atua n te taeka ae: “E bia katabuaki aram.” (Mataio 6:9) Bon Iesu ae tataro nakon te Atua ni kangai: “Tamau, neboa aram.” (Ioane 12:28) E moanibwaia neboan aran te Atua Iesu ni maiuna, ao ibukin anne e a kona n tataro ni kangai: “I a tia ni kaota aram nakoia ao N na boni manga kaotia.”​—Ioane 17:26.

E kakawaki te ara aei irouia naake a ataa te Atua. A ataia ana aomata te Atua rimoa bwa e irekereke kamanoaia ao kamaiuaia ma aran te Atua ae okoro aei. “Aran Iehova bon te taua ae korakora. E biri nako nanona ane e raoiroi ao e reke kamanoana.” (Taeka N Rabakau 18:10) “Ane e taboa aran Iehova e na kamaiuaki.” (Ioera 2:32) E kaotaki n te Baibara bwa e kona aran te Atua ni kaotaraeia naake a beku irouna ao ake a aki. “Bwa a na bane te botannaomata teuana ma teuana n nakonako n aran atuaia, ma ti na nakonako ngaira n aran Iehova ae Atuara n aki totoki.”​—Mika 4:5; Mwakuri 15:14.

TE BWAI AE KAOTAKI N TE ARA AEI

E okoro te ara aei tii nakon te Atua. A bati taan rabakau ake a taku bwa te ara ae Iehova nanona, “E Karaoia Bwa E na Riki.” E kaota nanon arana Iehova ae te Atua ngke e taekinna i bon irouna nakoni Mote ni kangai: “N na Riki bwa te Bwai ae I Rineia bwa N na Riki Iai.” (Te Otinako 3:14) Ngaia are e bati riki ae kaotaki n aran te Atua nakon ae tii nakoana ae te tia Karikii bwaai ni kabane. E kaotaki n arana bwa e kona ni karikia i bon irouna ao ana karikibwai, bwa te bwai ae kainnanoaki ibukini kakororaoan ana kantaninga. E ngae ngke a kona nakoan te Atua ni kabwarabwaraa raoi arona ma mwaakana n tautaeka, ke korakorana, ma bon tii arana ae Iehova ae tei ibukini bwaai nako are e kona ni kakororaoi iai baike e tangiri.

E kaotaki n te ara aei bwa e tabeakinira te Atua. E katereaki n nanon aran te Atua, ana tangira ae teimatoa ibukia ana karikibwai, aika ngaira naba. Ma ae moamoa riki, e oti man aron te Atua n tia ni kaota arana bwa e tangiria bwa ti na ataia. Ibukin anne, e biririmoa n tuangira arana e ngae ngke ti kona n titirakinna bwa antai arana. E teretere bwa e aki tangiria te Atua bwa ti na iangoia bwa te Atua ae aki otara raoi ma n raroanako, ma ti na iangoia bwa bon te Aomata ae ti kona ni kaan ma ngaia.​—Taian Areru 73:28.

Kabonganaan aran te Atua e kaota kan ataakina iroura. Ibukini kamatataana, ko kona ni butiia temanna ae ko kan raoraonna bwa e na kabongana aram. Tera am namakin ngkana e rarawa te aomata anne ni kabongana aram? Tao ko na bae n iangoia bwa e boni kan raoraoniko ke e aki. Ao ai aron naba te Atua. E a tia Iehova n tuangia aomata arana ao e kaungaia bwa a na kakabongana. Ngkana ti kakabongana, ti kaotia iai nakon Iehova bwa ti kani kaania. Maroaka ae e tabeakinia naba “te koraki ake a kananoi aia iango i aon [ke, “kakawakina,” kabwarabwara mai nano] arana”!​—⁠Maraki 3:⁠16.

Ataakin aran te Atua bon te moani mwaneka ae rangi ni kakawaki. Ma tiaki tii aei. Ti riai naba n ataia ao tiaki tii arana. Ti riai naba n ataia bwa aekakira aroaron te Atua.