Iai Aran te Atua?

Kaeka aika taabangaki:

▪“Aran te Atua bon te Atua.”

▪“Akea ae bon oin arana.” Tera ae e taekinna iai Iesu?

▪“Ma ngaia ae kam na tataro ni kangai: Tamara are i karawa, E na tabuaki aram.” (Mataio 6:9)

E kakoauaa Iesu bwa iai aran te Atua.

▪“I a kamani kaota aram nako ia, ao N na boni kaotia; ba e na mena i nanoia te tangira are Ko tangirai iai, ao Ngai i nanoia.” (Ioane 17:26) E kaotiota aran te Atua Iesu.

▪“Kam na aki manga norai, ni karokoa kam na kangai iai, E na karaoiroaki Teuae nako mai n aran Iehova.” (Ruka 13:35; Taian Areru 118:26) E kabongana aran te Atua Iesu ao ni weteia iai.

E BON tuangira te Atua arana. E koreaki ana taeka ni kangai: “Bon Iehova Ngai; bon arau aei.”a (Itaia 42:8) Te ara ae Iehova bon te ara ae rangi n ataaki n te taetae n Ingiriti n aron aran te Atua n te taetae n Ebera are e bon aranna i bon irouna iai. Tao ko na boni mimi n ataan ae te ara n Ebera ae onoti aei e kamanenaaki nga ma nga te tai n nira ni boki aika Baibara rimoa. Ni koauana e rangi ni mwaiti te tai ae kamanenaaki iai n te Baibara nakon aara riki tabeua.

Tao a kona tabeman ni kaekaa te titiraki ae “Antai aran te Atua?” ni kangai, “bon te Atua.” Ma ni koauana bon akea okoron te kaeka ae aki mataata anne ma kaekaan te titiraki ae kangai, “Antai ae moanna n te rinerine?” ngkana ko kangai, “Te tia kan rineaki.” Kaeka akana uoua akanne a bon aki kaekaa raoi te titiraki kioina ngkai “te Atua” ao “te tia kan rineaki” bon tiaki aara raoi ma tii nakoa.

Bukin tera bwa e kaota arana nakoira te Atua? E karaoa anne bwa ti aonga ni kona ni kinaa riki. N te katoto, e kona n atongaki te aomata temanna bwa Sir, te Mataniwi, Bwabwa, ao Bwa ni kaineti ma baika a riki ni maiuna. A kaotiota aroaron te aomata anne nakoa aikai, ma bon tii aran te aomata arei ae e kauringira bwaai ni kabane ake ti atai ibukina. N aron naba anne, nakoa aika te Uea, te Atua ae Moan te Mwaaka, te Tama, ao te tia Karikiriki, a buokira n ataa aekan ana mwakuri nako te Atua aika kakaokoro. Ma bon tii oin arana ae Iehova ae kona ni kauringira aroni bwaai ni kabane ake ti atai ibukina. Ko na kanga ni kona ni kinaa raoi te Atua n akean ataakin arana?

E kakawaki bwa ti na aki tii ataa te ara anne ma ti na kakabongana naba. Bukin tera? Ibukina bwa e taekinaki n te Baibara ae kangai: “Ane taboa aran Iehova ao e na kamaiuaki.”​—I-Rom 10:13, NW; Ioera 2:32.

[Kabwarabwara ae nano]

[Taamnei n iteraniba]

E kona n atongaki te aomata temanna bwa Sir, te Mataniwi, Bwabwa, ao Bwa ni kaineti ma baika a riki ni maiuna. Ma bon tii oin arana ae e kauringira aroni bwaai ni kabane ake ti atai ibukina