Tai Kabwaraa Nanom!

A kona rongorongo aika a a tia n riki mai Buritan ni buokiko n ataia bwa bukin tera ngkai ko aki riai ni kabwaraa nanom. Ko na noria naba bwa tera ae ko kona ni karaoia ni “kaaki am berena i aon te ran,” ke ni karekei uaa aika raraoi imwin am mwakuri korakora bwa a aonga ni buokaki te koraki ake a tuai ni butimwaea te koaua.​—Te Minita 11:​1, BG.

E RANG NI KAKAWAKI TE BOTUMWAAKA

Te botumwaaka bon te bwai ae rangi ni kakawaki ae riai n reke iroum. Ko riai n nimta te koaua ao n teimatoa n taromauria Iehova. (Te Tua-Kaua 10:20) Anne te bwai are karaoia Georgina. E rangi n un buuna are Kyriacos ngke e a moana ana reirei n te Baibara neiei ma Ana Tia Kakoaua Iehova n 1970. E kataia ni katoka ana reirei buuna, e ribaia Ana Tia Kakoaua Iehova bwa a na rin n te auti, ao e uotiinako aia boki ake a reke irouna.

E a kororake riki unin Kyriacos ngke e a moanna Georgina ni kakaaei bobotaki n te ekaretia. N te taina, e a nakon te Tabo n Taromauri bwa e na kauntaeka. Ngke e ataia te tari te aine temanna bwa e mwaatai riki Kyriacos n te taetae ni Kuriiti nakon te taetae n Ingiriti, e a tareboonia te tari te mwaane ae kaaini Kuriiti n te ekaretia teuana bwa e na roko ni buokiia. E a butimwaea ana taeka te tari arei Kyriacos ae aanaki n te akoi, ao imwin tabeua te namwakaina a a reirei n te Baibara. Ma imwina riki e a katoka ana reirei Kyriacos.

E teimatoa Georgina ni kaaitara ma te totoko i nanon tenua riki te ririki. E tuanga buuna Kyriacos bwa e na kitanna ngkana e bwabetitoaki. N te bong are e nang bwabetitoaki iai Georgina, e kakorakora n tataro nakon Iehova ibukin Kyriacos bwa e na aki kitanna. Ngke a a roko taani Kakoaua bwa a na kaira Georgina nakon te runga ao e taku Kyriacos nakoia: “Rimoara, bwa ae ti na rimwimi n ara kaa.” E ira kanoan te botaki n te ingabong ao e matakuakina buuna ngke e a bwabetitoaki!

E tabe ni kerikaaki ana mwakuri n totoko Kyriacos’ mwina riki, ao e a moanna ni karaoi bitaki aika kakawaki. Ngke e a kaania 40 te ririki imwini moani kaitiboona ma taani Kakoaua, e a nora buuna Georgina ni bwabetitoaki! Tera ae buoka Kyriacos? E taku: “I rangi ni kukurei iroun Georgina bwa e aki kariaia te bwai teuana bwa e na tukia man taromaurian Iehova.” E taku Georgina: “I bon aki kona ni katoka taromaurian Atuau, e ngae ngke e karaoi mwakuri n totoko kaainnabau. I aki toki n tatataro nakon Iehova n taai nako ao e aki bwara nanou.”

KAKAWAKINI MAUIAKINAN TE AROARO AE BOOU

Te bwai riki teuana are e kona ni buoka buum, boni karikirakean te aroaro ni maiu ni Kristian. E kaumakiia buu aine aika Kristian te abotoro Betero ni kangai: “Kam na aantaeka nakoia oini buumi, bwa ngkana a aki ongeaba buumi nakon te taeka, ao a na anaaki nanoia n aroaromi, e ngae ngke kam aki taetae.” (1 Betero 3:1) E maiuakina te taeka n reirei anne Christine, e ngae ngke e na tokanikai i aoni buuna imwin ririki aika a rangi ni bati. Ngke e riki neiei bwa te tia Kakoaua 20 tabun te ririki n nako, ao bon akea onimakinan te Atua iroun John are buuna. E bon aki tangiria John bwa e na irekereke ma te Aro, e ngae ngke e nora Christine bwa e rangi ni kakawaki irouna ana onimaki ae boou. E taku: “I kona n noria bwa e rangi ni kukurei iai. E bon rikirake bwa te aomata ae korakora ao n onimakinaki ao I a buokaki iai ni kaaitarai kangaanga aika bati.”

E aki roko n te kairoroa buuna nakon ana Aro Christine bwa e kangai John: “E a boni kaman iangoia Christine n te moan tai bwa e raoiroi riki ae e na aki mamaroro ma ngai ibukin ana Aro, ao e taotaona nanona ni katukai bwa N na bon reiakinna ni mwawan au tai n te tai are I taku.” Ngke e nori kaongora Christine n Te Taua-n-Tantani ke te Awake! ae kaineti ma te rongorongo are e na anaaki iai nanon John tao n aron n te rabakau n aonnaba ae te science ao te karikibwai, e kaotii nakoni buuna ao e taku: “I taku bwa ko na rangi ni kukurei ni wareka te rongorongo aei.”

N te tai ae e aki maan, e a ritaea John ao e a ununiki ni mwengana. Ngkai e a mwaawa riki ana tai n iaiangoi titiraki aika nano ibukin te maiu, e a moanna n iaiango ni kangai: ‘Ti manennanti n roko ikai ke iai bukini karikara?’ N te bong teuana, e a titirakinaki John iroun temanna te tari te mwaane are e maroro ma ngaia ni kangai: “Tera am iango n te reirei?” E taku John: “Ngkai I a tia ni kakoauaa te Atua, I a kukurei ni butimwaea ana iango.”

Ai kakawakira bwa e aki roko n te bwara nanon Christine! Imwin tatarona n te maan ae 20 te ririki bwa e aonga ni butimwaea te koaua John, e a boni bwabetitoaki. A a beku ngkai ibukin Iehova ma te ingaingannano. E taku John: “Iai bwaai aika uoua ake a rangi n ringa nanou. Bon te akoi ao aia iraorao taani Kakoaua. Ao ngkana ko mare ma temanna Ana Tia Kakoaua Iehova, e na bon reke buum ae kakaonimaki, e onimakinaki ao e aki bangaomata.” Eng, e boni maiuakin taeka ake n 1 Betero 3:1 Christine ao a uaana!

A KARIKI UAA AIKA RARAOI IMWIN RIRIKI AIKA BATI

Tera aroia tabeman ake a reirei n te Baibara aika kukurei n te moan tai ao imwina e a manga toki nanoia? E korea ae kangai te Uea are Toromon: “Kamae am uaa n ununiki n te ingabong, ao tai motika rawani baim n te tairiki, ba ko aki ata ae na materaoi, ba tao aei ke anne, ao tao a na uaia n raoiroi.” (Te Minita 11:​6, BG) N tabetai, a kainnanoaki ririki aika bati bwa e na bwebwerake te koaua i nanom. Irarikin anne, e kona temanna ni kunea imwina riki aroni kakawakini kaanian te Atua. (Iakobo 4:8) Eng, n te taina ao ko na bae ni karekea te rongorongo ae kakukurei mani kakubanako.

Iangoa Alice are e mwaing mai Inria nako Engiran. N 1974 ao e moana ana reirei n te Baibara. E rabakau n taetae n Hindi ma e kani karaoiroa ana taetae n Ingiriti. E waakinako ana reirei i nanon ririki tabeua, ao e kakaaei bobotaki tabeua n te ekaretia are e kairaki n te taetae n Ingiriti. E bon ataa te baere e reiakinna bwa bon te koaua, ma irouna kaanga ana bwai ni kaakibotu. Irarikin anne, e kaatuua ana iango i aon tangiran te mwane ao kakaaeani bobotaki ni kakukurei. Ao n tokina e a katoka ana reirei.

Ngke e a kaania 30 te ririki imwina riki, e a roko ana reta Stella mairoun Alice are e reirei ngkoa ma ngaia n te Baibara. E kangai kanoana: “Au kantaninga bwa ko na rangi ni kukurei ni kan ataia bwa e a bwabetitoaki n te Bwabwaro aei am reirei n te Baibara are man 1974. Ko a tia ni karaoa te bwai ae rangi ni kakawaki ni maiu. Ko unika koraan te koaua i nanou ma e ngae ngke tao I tuai n tauraoi ngkekei ni katabua maiu nakon te Atua, ma e titiku n au iango ao i nanou koraan te koaua anne.”

Tera are e riki? E kabwarabwaraa Alice bwa e rangi n rotaki n te rawawata imwini mateni buuna n 1997. E tataro nakon te Atua ao tebwina te miniti imwina, a a kawaria n ana auti uoman taani Kakoaua aika rabakau te taetae n Punjabi ao a a katuka te turaeki ae Tera te Kaantaninga Ibukiia Raora aika Tangiraki Aika A Mate? E namakinna Alice bwa e kaekaaki ana tataro ao e a motinnanoia bwa e riai n reitaki ma Ana Tia Kakoaua Iehova. Ma a nang reke ia? E kunea i nanon ana boki rimoa, ana atureti te ekaretia ni Punjabi are e anganna ngkoa Stella. E kawara te Tabo n Taromauri Alice ao e butimwaeaki raoi irouia taari ake a rabakau te taetae n Punjabi. E taku Alice: “E bebete rawawatau are I rinanona n te tai arei n noran te tangira are e kaotiotaki nakoiu ni moan rokou ao ngke N nang oki naba.”

E a moanna ni kakaonimaki ni kakaaei bobotaki ni katoatai ao e a manga moana ana reirei n te Baibara, e reiakina te taetae ao te wareware n Punjabi are e a rangi ni rabakau iai. N 2003, e a bwabetitoaki. E motika ana reta Alice nakon Stella ni kangai: “Ko rangi bati n rabwa ibukin unikani koraa akanne 29 te ririki n nako ao ai am katoto ae raoiroi are I a kakairi iai.”

“Ko bati n rabwa ibukin unikan koraa akanne 29 te ririki n nako ao ai am katoto ae raoiroi are I a kakairi iai.”​—Alice

Tera reireiam man rongorongo aikai? E na maan riki nakon are ko kantaningaia, ma ngkana arona bwa iai ae kan ataa te Atua, e bwabwaina te koaua ao e nanorinano, e na boni kariaia Iehova te koaua are i nanona bwa e na rikirake. Uringa ana taeka Iesu n ana kaikonaki aei: “E bwebwerake te koraa ao e rikirake, n te aro ae e aki ataia [te tia ununiki]. Ao akea bwa e a karikiuaa te tano teutana imwin teutana, ao e riki moa baan te aroka ao imwina te tabonnari, ao te kabanea, ai uaana ae mena n te amwi.” (Mareko 4:​27, 28) E kona te aroka anne n rikirake teutana imwin teuana ke ni bon ‘riki i bon irouna.’ Ni koauana akea te tia uarongorongoa te Tautaeka n Uea temanna ae e ataia bwa e na kanga n riki aei. Ngaia are teimatoa ni kabatiaa am ununiki. Ko na bae naba n taia uaana ae rangi ni bati riki.

Ao tai mwaninga kakawakin te tataro. A teimatoa Georgina ao Christine n tatataro nakon Iehova. Ngkana ko “botumwaaka n tataro” ao n aki kabwaraa nanom “imwini boong aika bati,” ko na manga kunea ngkanne te “berena” are ko a tia n tewenakoa i aon te ran.​—I-Rom 12:12; Te Minita 11:​1, BG.