Bukin Tera Bwa A Taekinna Aomata Bwa E Ribuaka te Atua?

KO MIMI ngkai ko nora te titiraki ae i tinanikun te maekatin aei? A boni mimi iai tabeman, ma a bati ni boong aikai aika a iangoia bwa e ribuaka te Atua ke e aki ke a kakoauaa bwa e ribuaka. Bukin tera?

A titiraki ni kangai tabeman ake a maiu imwini kabuanibwai aika karina: “Bukin tera bwa e aki katoki baika a riiriki aikai te Atua? E aki tabeakinira? Ke e ribuaka?”

A karawawataaki n aron naba anne ake tabeman riki ngkana a wareka te Baibara. A wareki rongorongo n aron taekan Noa ao te Ieka, ao a iango ni kangai: ‘Bukin tera ngkai e kamateia aomata akanne ni kabane te Atua ae tatangira? E ribuaka?’

A rio n tabetai titiraki aikai n am iango? Ke ko noria bwa e kangaanga iroum kaekaan aia titiraki te koraki ake a iangoia bwa e ribuaka te Atua? Iangoa te titiraki ae kaokoro ae kona n ibuobuoki n itera aika uoua aikai.

BUKIN TERA BWA TI RIBAA TE RIBUAKA?

E teretere raoi bwa ti ribaa te ribuaka ibukina bwa ti ataa ae eti ao ae kairua. Ti rangi ni kaokoro ma maan ni kaineti ma anne. E karikira ara tia Karikiriki “ba katotongana.” (Karikani Bwaai 1:​27, BG) Tera ae nanonaki n anne? E anganira te konabwai ni katotonga aroarona ao ni kakairi n ana kaetieti ibukin te aroaro ni maiu ae riai ma n ataa ae eti ao ae kairua. Iangoa aei: Ngkana ti karekea ataakin ae eti ao ae kairua mairoun te Atua, ao ti ribaa te ribuaka, e aki ngkanne kakoauaaki n anne bwa e ribaa naba te ribuaka te Atua?

E kakoauaaki n te Baibara bwa ngkai ti ribaa te ribuaka, e a rangi ni korakora riki ribaakina iroun te Atua, bwa e karau nanora ni kangai n te Baibara: “Ai aron naba arou nako, ba a rietata riki nakon aromi nako, ao nanou nako nakon nanomi nako.” (Itaia 55:​9, BG) Mangaia are ngkana ti iangoia bwa e ribuaka te Atua, ti aki ngkanne kaitaraa n te aro are ti a taekinna bwa a rietata riki arora nakon arona? Ni koauana, ti wanawana ngkana ti karekei bwaai ni kakoaua aika bati riki imwain ae ti na iango n aron anne. Ti riai n titirakinira tiaki ibukina bwa tao e ribuaka te Atua ke e aki, ma ibukin ana mwakuri tabeua ake e karaoi ake ti a kona n iangoia iai bwa e ribuaka. Ibukini buokara, ti na iangoa te bae e nanonaki raoi n “te ribuaka.”

Ngkana ti taekina temanna bwa e ribuaka, ti bon iangoia bwa a kairua ana iango. E ribuaka te aomata ae kukurei n noriia aomata bwa a rotakibuaka, ke e aki bwerengaki n rawawataia. Ngaia are te tama ae e katuuaaea natina ibukina bwa e kukurei ni kammaraka nanona, bon te tama ae ribuaka. Ma e raoiroi te tama ae katuuaaea natina n reireinna ke ni kamanoa. Kioina ngkai ti aki kona n ota n taai nako bwa e aera ngkai a karaoa te aro anne tabemwaang, e a bebete iroura bwa ti na aki ota n aia iango.

Ti na iangoi bukina aika uoua ngkai a iangoia tabeman bwa e ribuaka te Atua n rikini kabuanibwai aika karina ake ti nori ni boong aikai ao n ana motikitaeka ake ti wareki taekaia n te Baibara. E kaotaki raoi ni koaua akanne bwa e ribuaka te Atua?