TITIRAKI AIKA KAEKAAKI MAN TE BAIBARA
A kona ni kabwaraaki ara bure?
E bebete karekean akoara iroun te Atua
Ni kaineti ma ae taekinaki n te Baibara, a bane ni bure aomata. Ti ituaki n tangiran te bure mairoun te moan aomata are Atam. Ngaia are n tabetai, ti karaoi baika bubuaka ao imwina ti kona n uringaaba iai. E kabwakaa bon ara bure Natin te Atua ae Iesu Kristo rinanoni matena ibukira. A kona ni kabwaraaki ara bure man ana karea ni kaboomwi. Bon aei te bwaintituaraoi mairoun te Atua.—Wareka I-Rom 3:23, 24.
A a tia aomata tabeman ni karaoi buure aika kakaiaki ao a iangoia bwa tao a kona ni kabwaraaki iroun te Atua ke a aki. E kakukurei bwa e taekinaki ae kangai n Ana Taeka te Atua: “E kaitiakira raraan Natina ae Iesu man te bure ni kabane.” (1 Ioane 1:7) E kukurei Iehova ni kabwarai buure aika kakaiaki naba ngkana ti raraoma ni koaua.—Wareka Itaia 1:18.
Tera ae ti riai ni karaoia bwa e aonga ni kabwaraaki ara bure?
Ngkana ti tangira Iehova ae te Atua bwa e na kabwarai ara bure, ti riai n reiakina ana aro nako, ana taeka n reirei ao ana kaetieti. (Ioane 17:3) E tituaraoi Iehova ni kabwarai aia bure ake a rairi nanoia man aia bure ao ni kataia ni bitii aroia.—Wareka Mwakuri 3:19.
E bebete karekean akoara iroun te Atua. E atai mamaarara Iehova. E nanoanga ao e akoi. Ibukin ana akoi ae boto i aon te tangira, tiaki ngkanne kan reiakina ae bati riki ibukin arora ni kakukureia?—Wareka Taian Areru 103:13, 14.