KAONGORA IBUKIN TE REIREI 24
Iehova—Te Tia Kabwarai Buure ae Kakannato
“Ko raoiroi ngkoe ae Iehova, ao ko tauraoi ni kabwarabure, e bati am tangira ae koaua ibukia te koraki ni kabane ake a weteiko.”—TAIARE. 86:5.
ANENE 42 Ana Tataro Ana Toro te Atua
KANOANAa
1. Tera te koaua are e kaotia te Uea ae Toromon? (Te Minita 7:20)
E KOREA aei te uea are Toromon: “Akea te aomata ae raoiroi n te aonnaba ae kakaraoa ae raoiroi n taai nako ao e aki bubure.” (TeMin. 7:20) Ai koauara anne! Bon taani bure ngaira ni kabane. (1Ioa. 1:8) Ngaia are ti bane ni kainnanoa kabwaraakin ara bure iroun te Atua ao raora n aomata.
2. Tera am namakin ngkana e kabwaraaki am bure iroun raoraom ni kaan?
2 Ko bae n uringa te tai ae ko a tia ni kauna iai raoraom ni kaan temanna. Ko kani kaoka am iraorao ma ngaia, ngaia are ko a kabwaraa am bure nakoina. Tera am namakin ngkana arona bwa e tauraoi ni kabwaraa am bure raoraom anne? E na rau nanom? Eng, ao ko na kukurei naba!
3. Tera ae na rinanoaki n te kaongora aei?
3 Ti tangira Iehova bwa e na riki bwa Raoraora ni kaan, ma ti kona n tabetai n taekina ke ni karaoa te bwai ae e kona n un iai. Ma e aera ngkai ti kona ni kakoauaa ae e ingainga Iehova ni kani kabwarai ara bure? Tera kaokoron aron Iehova ni kabwarai buure ma arora ni kabwarai buure? Ao antai aika a na kona ni kabwaraaki aia bure iroun te Atua?
E TATAURAOI IEHOVA NI KABWARAI BUURE
4. E aera ngkai ti kona ni kakoauaa ae e tatauraoi Iehova ni kabwarai buure?
4 E beritanaki n te Baibara bwa Iehova e tatauraoi ni kabwarai buure. Ngke e kaoti Iehova nakoni Mote n te Maunga ae Tinai, e a taekina aei rinanon te anera: “Iehova, Iehova, ae te Atua ae nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua. E kaota te tangira ae koaua nakoia rooro aika nga ma nga, e kabwarai kairua ma buure.” (TeOti. 34:6, 7) Iehova bon te Atua ae akoi ao n nanoanga, ao e tatauraoi ni kabwarai aia bure naake a rairi nanoia.—Neem. 9:17; TaiAre. 86:15.
E atai Iehova bwaai ni kabane aika riki ni maiura ake e a ueke mai iai aroaroni maiura (Nora barakirabe 5)
5. Tera ae e na karaoia Iehova ngkai e rangi ni kinaira? (Taian Areru 103:13, 14)
5 Ngkai bon Iehova ara tia Karikiriki, e atai raoi bwaai ni kabane ibukira. Ai boni kamimira moa ngkai e kona Iehova n atai aroaroia nako aomata ni kabane n te aonnaba aei! (TaiAre. 139:15-17) E kona n nori aki kororaoira ake rikiara mairouia ara karo. E nori naba baika a a tia n riki nakoira are e a kairaki iai aroni maiura. Tera ae e na karaoia Iehova ngkai e rangi ni kinaira? E na bon nanoangaira.—TaiAre. 78:39; wareka Taian Areru 103:13, 14.
6. E kangaa Iehova ni kaotia bwa e ingainga ni kani kabwarai buure?
6 E a tia Iehova ni kaotia bwa e ingainga ni kani kabwarai buure. E ataia ae ti bane ni bure ao ni mate imwin ana mwakuri te moani mwaane are Atam. (IRom 5:12) Ao bon akea ara aanga ke te aomata riki temanna ae na kona ni kainaomataira man anne. (TaiAre. 49:7-9) Ma e nanoangaira Atuara ae tatangira, ao e karaoa te bwai teuana ibukini kainaomataara. Ae tera? E kaotaki n Ioane 3:16 bwa Iehova, e kanakoa Natina ae ana rikitemanna bwa e na mate ibukira. (Mat. 20:28; IRom 5:19) E onea mwira Iesu ni kammarakaki n te mate, bwa a aonga ni kainaomataaki naake a kaotiota onimakinana. (Ebera 2:9) Ai korakorara naba marakin Iehova n noran Natina ae tangiria, ni kamateaki n te aro ae kammaraki ao ni kamaamaa! Ngke arona bwa e aki kani kabwarai ara bure Iehova, e na bon aki kariaia Natina bwa e na kamateaki n te aro aei.
7. Baikara katoto n te Baibara tabeua ibukia aomata ake e a tia Iehova ni kabwarai aia bure?
7 A rangi ni bati katoto n te Baibara ibukia aomata ake a a tia ni kabwaraaki aia bure iroun Iehova. (IEbe. 4:32) Antai ae ko iangoia? Tao te Uea ae Manate. E karaoa te bure te mwaane aei nakon Iehova n aaro aika kakaiaki. E kairiia aomata nakon te taromauri ae kewe. E tiringia oin natina ao e kareania nakoia atua ni kewe. E boni karaoa naba ae riao riki, ngke e a kaaki katotongan te atua temanna ae kewe i nanon ana tembora Iehova ae tabu. E kangai taekan teuaei n te Baibara: “E karaoa ae buakaka n te aro ae rangi ni korakora i matan Iehova, ni kaunna iai.” (2Rong. 33:2-7) Ma ngke e kaotia Manate bwa e a raira nanona ni koaua, e bon tauraoi Iehova ni kabwaraa ana bure. E boni kaokaki naba nakoana n uea iroun te Atua. (2Rong. 33:12, 13) Tao ko iangoa naba te Uea ae Tawita, are e karaoi naba buure aika kakaiaki nakon Iehova, n aron te wene ni kimoa ao te tiritiri. Ma ngke e raira nanona ni koaua Tawita ao ni kariaia kairuana, e boni kabwaraaki naba ana bure iroun Iehova. (2Tam. 12:9, 10, 13, 14) Eng, ti boni kakoauaa ae e ingainga Iehova ni kani kabwarai buure. Ao n aron ae ti na noria, e rangi ni kaokoro aron Iehova ni kabwarai buure ma aroia aomata.
E KAOKORO ARON IEHOVA NI KABWARAI BUURE
8. Tera ae irekereke ma aron Iehova ni kabwarai buure ngkai bon tii ngaia te tia Moti ae rianako?
8 Bon “te tia motika taekan te aonnaba ni kabutaa” Iehova. (KBwaai 18:25) E riai te tia moti ae raoiroi n oota raoi n taian tua. E koaua raoi aei ni kaineti ma Iehova, ibukina bwa tiaki tii ara tia Motikitaeka ngaia, ma bon ara tia Karaotua naba. (Ita. 33:22) Tii Iehova ae e ataa raoi ae e eti ao ae kairua. Tera riki ae e riai ni karaoia te tia moti ae raoiroi? E riai n rinanoi raoi taekani bwaai ni kabane, ake a irekereke ma te baere e boowiaki imwain ae e na kanakoa ana moti. Ngaia are bon tii Iehova ae riai n riki bwa ara tia Motikitaeka, bwa e kona n atai rongorongoni bwaai ni kabane.
9. Tera ae e ataia Iehova ibukin te aomata ngkana e na baireia bwa e na kabwaraa ana bure ke e na aki?
9 E kaokoro Iehova ma tia moti aika aomata, bwa e kona n atai raoi rongorongoni bwaai aika riki. (KBwaai 18:20, 21; TaiAre. 90:8) E kaokoro ma aomata ake a tiatianaki baike a kona n nori ao n ongo. E atai nako aroaron te aomata ae ueke mani karikana, kaikawaana, te tabo are e nako mai iai, n ikotaki ma ana namakin ao marurungina. E kona naba Iehova n nori naano. E kai atai bukini karaoani bwaai iroun temanna, ana kantaninga ao baike e tangiri. Bon akea te bwai ae kona ni karabaaki mai matan Iehova. (Ebera 4:13) Ngaia are e boto aron Iehova ni kabwarai buure man otana ae tabwanin raoi.
E kaetitaeka Iehova n te aro ae riai ao e aki inanonano. E aki kona naba ni butimwaea te bwai ni kamaraato (Nora barakirabe 10)
10. E aera ngkai ti kona n taekinna bwa a eti n taai nako ana motikitaeka Iehova? (Te Tua-Kaua 32:4)
10 A eti n taai nako ana motikitaeka Iehova. E aki kona n inanonano ao ni kabotoa kabwaraan te bure man taraakin te aomata, kaubwaina, kinaakina ke ana konabwai. (1Tam. 16:7; Iak. 2:1-4) E aki kona naba ni kairoroaki bwa e na karaoa te bwai teuana, ke e na butimwaea te bwai ni kamaraato. (2Rong. 19:7) E aki kona n rotaki ana babaire man te un ke te taetaenikawai. (TeOti. 34:7) E bon tau Iehova n riki bwa ara tia Moti, bwa e atai raoi bwaai ni kabane ibukira ao e ota naba n ara kangaanga.—Wareka Te Tua-Kaua 32:4.
11. Tera kaokoron Iehova ni kabwarai buure?
11 A ataia naba taani korea te Koroboki ae Tabu n te taetae n Ebera, bwa e rangi ni kaokoro aron Iehova ni kabwarai buure. N tabetai, a kamanena te taeka n Ebera teuana, ae e kabwarabwaraaki nanona n te boki teuana ni kangai, “E tii kamanenaaki te taeka anne ibukin aron te Atua ni kabwarai buure, ao e aki kona ni kaineti te taeka anne ibukia aomata ni kabwarai buure.” Bon tii Iehova ae iai mwaakana ni kabwaraa raoi ana bure te tia bure ae raira nanona. Tera ae e na riki ngkana e kabwarai ara bure Iehova?
12-13. (a) Tera ana namakin temanna ngkana e a kabwaraaki ana bure iroun Iehova? (b) Kaanga maanra kakabwaiaara mani kabwaraan ara bure iroun Iehova?
12 Ngkana ti kakoauaa ae e a tia Iehova ni kabwarai ara bure, ti a boni karekea ngkanne kukureira n “taai ni kakamaiu,” n ikotaki ma raun ara iango ao te mataniwinnano ae itiaki. A aki kona n reke baikanne mairouia aomata, ma e tii kona n reke “mairoun Iehova.” (Mwa. 3:19) Ngkana e kabwarai ara bure Iehova, e a kariaia iai okin ara iraorao ma ngaia, kaanga ai aron are ti tuai mani bure nakoina.
13 N te tai are e kabwaraaki iai ara bure iroun Iehova, e nang aki ngkanne manga uringi kairuara ke ni katuuaaeira ibukin ara bure. (Ita. 43:25; Ier. 31:34) E na kararoai ara bure Iehova “n ai aron raroan otin taai ma bungin taai.”b (TaiAre. 103:12) Ngkana ti iaiangoa raoi aron Iehova ae rianako ni kabwarai buure, ti na bon rangi ni kakaitau ao ni karinea riki. (TaiAre. 130:4) Ma antai aika a kona ni kabwaraaki aia bure iroun Iehova?
ANTAI AIKA A NA KABWARAAKI AIA BURE IROUN IEHOVA?
14. Tera ae ti a tia n reiakinna ngkai ibukin aron Iehova ni kabwarai buure?
14 N aron ae ti noria, e aki boto aron Iehova ni kabwarai buure mani kakaiakin ke bebeten ana bure temanna. Ti ataia naba bwa Iehova, e kamanena wanawanana ngkai ara tia Karikiriki, ara tia Karaotua, ao ara tia Motikitaeka ngkana e na kabwaraa ana bure temanna. Ma baikara baike e iaiangoi Iehova imwaini bairean ae e na kabwarai buure ke e na aki?
15. Tera te bwai ae e iaiangoia Iehova? (Ruka 12:47, 48)
15 Teuana te bwai ae e iaiangoia Iehova, bon aroaron te tia bure, bwa e bon ataia ae e karaoa ae bure ke e aki. E kamataataa anne Iesu n aron ae taekinaki n Ruka 12:47, 48. (Warekia.) Te aomata ae bon nanona ni kani karaoa ae buakaka, ao e ataia raoi ae e kona ni kauna Iehova iai, e boni karaoa ae bure n te aro ae kakaiaki. E ruanikai maiun te aomata anne ibukina bwa e na kona n aki kabwaraaki ana bure. (Mareko 3:29; Ioa. 9:41) Ti riai ni kakoauaa bwa n tabetai, ti a bon ataia ae e bure te baere ti karaoia. E na kona ni kabwaraaki ara bure n anne? Eng! Ao ti a kairaki n aei nakon te bwai riki teuana ae e iaiangoia Iehova.
Ti kona ni kakoauaa bwa e na kabwarai ara bure Iehova ngkana ti raira nanora ni koaua (Nori barakirabe 16-17)
16. Tera ae nanonaki n te rairannano ao e aera ngkai e kakawaki anne ibukini kabwaraakin ara bure iroun Iehova?
16 Te bwai riki teuana ae e iaiangoia Iehova, bon te tia bure bwa e raira nanona ni koaua ke e aki. Tera ae nanonaki n te rairannano? Te rairannano, bon “aroni bitakin ana iango temanna, aroarona ao ana kantaninga.” E irekereke aei ma arona n uringaaba ao n rangi n nanokawaki, ibukini baike e karaoi ake a kairua ke ibukin aki karaoani baike e riai ni karaoi. E aki tii nanokawaki te aomata ae raira nanona ibukini karaoan ae kairua, ma ibukin naba mamaaran ana onimaki are e a kairia nakoni baika kairua akanne. Uringnga are te Uea ae Manate ao Tawita, a kaai ni karaoi buure aika kakaiaki, ma e ngae n anne, e boni kabwarai naba aia bure Iehova ibukina bwa a rairi nanoia ni koaua. (1Uea 14:8) Eng, e riai Iehova n nori bwaai ni kakoaua ibukin te rairannano bwa e aonga ni kabwarai buure. Ma e aki tau ae ti na tii nanokawaki ibukin te bure are ti karaoia. Ti riai naba n tauraoi ni karaoa te bwai teuana.c Ao ti a kairaki n anne nakon te bwai riki teuana ae iaiangoia naba Iehova.
17. Tera ae nanonaki n te bitaki n te aroaro ni maiu, ao e aera ngkai e kakawaki anne nakoira ngkana ti na rarawa nakoni manga karaoan ara bure ake rimoa? (Itaia 55:7)
17 Bitakin te aroaro ni maiu bon te bwai riki teuana ae kakawaki ae e iaiangoia Iehova. Bitakin te aroaro ni maiu e nanonaki iai “rairakinako man te buakaka.” N taekana riki teuana, e riai ni bita maiuna te aomata n arona ni katoki aroarona aika bubuaka, ao ni maiuakina te aroaro ni maiu ae e tangiria Iehova. (Wareka Itaia 55:7.) E riai n onika ana iango te aomata bwa e aonga ni kairiraki n ana iango Iehova. (IRom 12:2; IEbe. 4:23) E riai naba ni kamatoaa nanona bwa e na kitan aroarona rimoa n iaiango ao ni mwakuri. (IKoro. 3:7-10) Ni koauana, e kabwarai ara bure Iehova ao e kaitiakira man ara bure, ibukina bwa ti onimakina ana karea Kristo. E na kabwarai ara bure Iehova rinanon te karea ni kaboomwi, ngkana e norira ni kakorakoraira ni bitii aroarora.—1Ioa. 1:7.
ONIMAKINA KABWARAAN AM BURE IROUN IEHOVA
18. Tera ae ti a tia ni maroroakinna ibukin aron Iehova ni kabwarai buure?
18 Ti na rinanoi ngkai tabeua reirei aika kakawaki ake ti a tia ni maroroakin. Bon te tia Kabwarai Buure Iehova ae moan te kakannato n te iuniweeti. Bukin tera ngkai ti kona n taekina aei? Te moan, e tatauraoi ni kabwarai buure. Te kauoua, e atai aroarora ni kabane. E ota raoi n aroaroni maiura ao bon tii ngaia ae e kona n ataia bwa ti raira raoi nanora ke ti aki. Ao te katenua, ngkana e kabwarai ara bure Iehova, ai aron ae e a kaitiakira raoi man ara bure. Ibukin anne, ti a kona ni karekea iai te mataniwinnano ae itiaki ao akoara irouna.
19. E ngae ngke ti aki kororaoi ao n teimatoa ni karaoa ae bure, ma e aera ngkai ti boni kona n teimatoa ni kimwareirei?
19 Ni koauana, ibukina bwa ti aki kororaoi ti na bon teimatoa ni karaoa ae bure. Ma e reke raun nanora n taeka aika n te Insight on the Scriptures, Volume 2, iteraniba 771: “Ibukina bwa e rangi n nanoanga Iehova ao n iaiangoa mamaaraia ana toro, a aikoa riai ana toro n namakina te uringaaba ibukin aia bure are man rikiaia are te aki kororaoi. (TaiAre. 103:8-14; 130:3) A na boni kukurei ngkana a kabanea aia konaa n toua kawain Iehova. (IBir. 4:4-6; 1Ioa. 3:19-22).” Ai boni kaungananora anne!
20. Tera ae e na rinanoaki n te kaongora are imwina?
20 Ti kakaitau bwa e tatauraoi Iehova ni kabwarai ara bure ngkana ti kaotia raoi bwa ti nanokawaki n ara bure. Ma ti na kangaa ni kakairi n aron Iehova ni kabwarai buure? N aaro raa ake titeboo iai arora ni kabwarai buure ma aron Iehova ni kabwarai buure, ao n aaro raa ake ti kaokoro iai? E aera ngkai e kakawaki ataakin te kaokoro anne? A na kaekaaki titiraki aikai n te kaongora are imwina.
ANENE 45 Baika I Iaiangoi Aika Memena i Nanou
a E beritanna Iehova nakoira n te Baibara bwa e kukurei ni kabwarai aia bure taani bure ake a rairi nanoia. Ma n tabetai, ti kona n iangoia bwa e aki tau ni kabwaraaki ara bure. N te kaongora aei, ti na maroroakinna bwa e aera ngkai ti kona ni kakoauaa ae e tatauraoi Atuara ni kabwarai ara bure ngkana ti raraoma ni koaua.
b Nora te boki ae Kaaniko Riki ma Iehova, mwa. 26, bar. 9.
c KABWARABWARAANA: E kaineti te taeka ae “Rairannano” ma bitakin ana iango temanna, ae irianaki n te uringaaba ni koaua ibukin aroaroni maiuna rimoa, ana mwakuri aika kairua, ke te bwai are e kabwaka ni karaoia. Te rairannano ni koaua, e karika te uaa ae bitakin te aroaro ni maiu.