E Nori Kaa Aika Kaanga Aai Eritai ao Ngkoe ko Nori Naba?

E ukoukora ana burabeti te Atua ae Eritai uean Turia ao e toui mwini mwanekana nakon te kaawa ae Totan ae otabwaniniaki n taian tabuki. E kanakoia aoti ma kaa ni buaka ao taanga n tautia te tia tautaeka i Turia nako Totan. Ngke e a karangaina, a a otabwaninia te kaawa ana taanga ni buaka.​—2 Uea 6:​13, 14.

Ngke e teirake ana tia ibuobuoki Eritai ao n otinako, e a noriia naake a nang katika te burabeti ao e tang ni kangai: “Akea ngai, au toka! tera arora ae ti na karaoia?” E taku Eritai nakoina: “Tai maku: ba a maiti riki aika mena i roura nakoia ake a mena i rouia.” Imwin anne, e tataro te burabeti ni kangai: “Iehova, I butiko ba Ko na kaure matana ba e na noraba.” E reitaki nako te rongorongo ni kangai: “Ao Iehova E kaure matan te rorobuaka arei; ao e noraba: ao noria, e on te maunga arei irouia aoti ma kaa-ni-buaka, aika kanga aai, aika otabwaninia Eritai.” (2 Uea 6:​15-17, BG) Tera reireiara man aei ao bwaai tabeua ake a riki ni maiun Eritai?

E rau nanon Eritai e ngae naba ngke e a otabwaniniaki n ana taanga ni buaka Turia, ibukina bwa e onimakina Iehova ao e nora aroni mwamwakurini mwaakana ni kamanoa. Ti aikoa kantaningai kakai ni boong aikai, ma ti ataia bwa e boni kamanoia ana aomata ni kabane Iehova. Ai aron ae ti a otabwaniniaki naba irouia aoti ma kaa aika kanga aai. Ngkana ti ‘noriia’ ni matara n onimaki ao ngkana ti onimakina Iehova n taai nako, ti na bon ‘anganaki te mweraoi’ ao n nori kakabwaiaara mairouna. (Taian Areru 4:​8, BK) Ti na maroroakina ngkai arora ae ti na kona ni kakabwaiaaki iai mani baike a riki ni maiun Eritai.

E MOANA ANA BEKU ERITAI I RARIKIN ERIA

N te tai teuana ngke e tabe ni kamaraua tanon te tawaana teuana Eritai, e a roko irouna te burabeti are Eria ao e kaaki ninirana i aona. E ataa nanon anne Eritai. Ngaia are e a karaoa te baka n amwarake, e kaboo ma tamana, tinana, e kitana mwengana n nako ni buoka Eria. (1 Uea 19:​16, 19-21) Ibukina bwa e a tauraoi Eritai n anga ngaia bwa e na beku ibukin te Atua n aron ana kabanea ni kona, e a riki iai bwa te bwai ni mwakuri iroun Iehova ao n tokina e a beku bwa te burabeti n onea mwin Eria.

E beku Eritai i rarikin Eria i nanon tao onoua te ririki. Inanon te tai anne, bon Eritai “are nurakina te ran i aoni bain Eria.” (2 Uea 3:​11, BG) A taneiai aomata ni boong akanne n amwarake ma baia, n akea kainiwaiteke, biiti, ke bwainnamwarake riki tabeua. Imwin te amwarake, e kabwaroa te ran te toro i aoni bain ana toka bwa e na kaitiakii. Mangaia are a boni mangori ana mwakuri Eritai tabeua. Ma e ngae n anne, e iaiangoia bwa bon te kakabwaia te riki bwa ana tia ibuobuoki Eria.

Ni boong aikai, a bati Kristian aika kabwanina aia tai ni mwiokoaia aika kakaokoro n aron naba anne. Ni karaoan anne, a a kaungaaki man aia onimaki bwa a na kani kamanenai korakoraia ni beku ibukin Iehova n aron aia kabanea ni kona. Tabeua mai buakoni mwiokoaia, a bon riai ni kitani mwengaia ao ni mwakuri tao n te Betaera, te mwakuri ni kateitei, ao a a bati riki ake a kona aomata aika bati n iangoia bwa a mangori. Akea te Kristian ae na iangoi aeka ni mwioko akanne bwa a aki kakawaki ke ni mangori bwa a rangi ni kakawaki iroun Iehova.​—I-Ebera 6:10.

E TEIMATOA NI KARAOA MWIOKOANA ERITAI

Imwain ‘uotakirakean Eria n te ukeukennanti nako karawa’ iroun te Atua, e boni kanakoa te burabeti mai Kirekara nako Beta-era. E iangoia Eria bwa e na aki iraki iroun raona ni mwakuri aei, ma e kaeka Eritai ni kangai: “N na aki kitaniko.” Ngke a waakinaanako kawaia, uoua riki ana tai Eria ni kaumaka Eritai bwa e na tiku n te tabo arei, ma e bon aki roko n te tiku. (2 Uea 2:​1-6, BG) N aron Ruta n nimta Naomi, ao ai aron naba Eritai n nimta Eria. (Ruta 1: 8, 16, 17) Bukin tera? E teretere raoi bukina bwa e rangi ni kakawaki iroun Eritai mwiokoana mairoun te Atua are e na riki bwa ana tia ibuobuoki Eria.

E katea te katoto ae manena ibukira Eritai. Ngkana ti anganaki mwiokoara teuana i nanon ana botaki te Atua, e na rangi ni kakawaki iroura ngkana ti ururingnga ae ti beku ibukin Iehova. Akea riki te mwioko ae rangi ni karineaki nakon aei.​—Taian Areru 65:4; 84:10.

“BUTIAI AE N NA KARAOIA NAKO IM”

Ngke a tabe ni mwananga mwaane aika uoman aikai, ao e taku Eria nakon Eritai: “Butiai ae N na karaoia nako im, ngkai I tuai n anaki mai roum.” N aron ana bubutii Toromon are e karaoia n ririki ake rimoa are e boto i aon ana onimaki, ao aia aron naba ana bubutii Eritai. E bubutii bwa e na ‘mena i aona nanon Eria ni kauoua.’ (1 Uea 3:​5, 9; 2 Uea 2:​9, BG) E riai n reke uoua tibwangan te moan nati te mwaane man ana bwai tamana i aon Iteraera. (Te Tua-Kaua 21:​15-17) Ibukin anne, e bubutii Eritai bwa e na kinaaki bwa te tia onea mwin Eria ni mwiokoana mairoun te Atua. Irarikin anne, e teretere bwa e tangiria Eritai bwa e na reke irouna te nano ae ninikoria n aron Eria are e “tauanen i bukin Iehova.”​—1 Uea 19:​13, 14, BG.

Tera ana kaeka Eria nakon ana bubutii ana tia ibuobuoki? E taku te burabeti anne: “Ko bubuti te bwai ae kanganga: ma ngkana ko norai ngkana I anaki mai roum, ao e na reke i roum; ma ngkana ko aki norai, ao e aki reke.” (2 Uea 2:​10, BG) E taraa n ae iai uoua iteran ana kaeka Eria aika kakawaki. Te moan, bon tii te Atua ae kona ni baireia bwa tao e na reke ana bubutii Eritai irouna ke e na aki. Te kauoua, ngkana ngaia bwa e na reke irouna e riai n teimatoa n titiku irarikin Eria n aki ongei baika kona n riki.

TE BWAI AE NORIA ERITAI

Tera ana iango te Atua ngke e bubutiaki nanon Eria ni kauoua iroun Eritai? E taekinaki ae kangai n te rongorongo: “Ao ngke a kume ni waki, ma n taetae, ao noria, e kaoti te ka te ai, ma aoti aika aai, ao a karaureia uake uoman; ao e aerake Eria n te ukeukenanti nako karawa. Ao e noria Eritai.”a Anne ana kaeka Iehova nakon ana bubutii Eritai. E nora Eria ngke e anaaki mairouna Eritai ao a a reke irouna nanon Eria aika uoua ao e a riki bwa te tia onea mwina ni burabeti ni mwiokoana iroun te Atua.​—2 Uea 2:​11-14, BG.

E anaaki niniran Eria iroun Eritai are bwaka mai aona ao e karinna. E a kinaaki ngkai Eritai man te ninira anne bwa ana burabeti te Atua. Iai riki kakoauaani mwiokoana aei ae teretere raoi bwa e karaoa te kakai imwina riki ngke e bwenauaa ranin te Karaanga ae Ioretan.

Akea te nanououa bwa bon te bwai ae rangi ni kamimi iroun Eritai noran Eria n aerake n te ukeukennanti. Ni koauana, e aki kona te aomata n nora te kaa ni buaka ao aoti aika kaanga aai ni katoabong! Ma boni bwaai ni kakoaua ni kaineti ma kaekaan ana bubutii Eritai nakon Iehova. Ngkana e kaekai ara tataro te Atua, ti aki anganaki te miitara ibukin te kaa ni buaka ma aoti aika kaanga aai. Ma ti kona n ataia bwa e kabongana mwaakana ae korakora te Atua bwa e na taraia raoi bwa e karaoaki nanona. Ngkana ti noria bwa e kakabwaiaa ana botaki ae i aon te aba, ni koauana, ti a ‘nora’ ana kaa ni buaka i karawa ni mwakuri.​—Etekiera 10:​9-13, BG.

A bati baike a riki nakon Eritai ao e a kakoauaa iai mwaakan Iehova ae moan te korakora. Ni koauana, e buokaki te burabeti aei n te taamnei ae raoiroi mairoun te Atua bwa e na kona ni karaoi kakai aika 16 ae uoua te tai okiokin ake e karaoi Eria.b E nori aoti ao kaa ni buaka aika kaanga aai Eritai n te kauoua n tai n tain te kangaanga are e riki i Totan ae kabwarabwaraaki ni moan te kaongora aei.

E ONIMAKINA IEHOVA ERITAI

E ngae ngke e otabwaniniaki Totan irouia taani kairiribai, ma e bon teimatoa naba Eritai n rau. Bukin tera? Ibukina bwa e korakora irouna onimakinan Iehova. Ti kainnanoa naba te aeka n onimaki anne. Mangaia are ti bia tataro ni bubutii te taamnei ae raoiroi mairoun te Atua bwa ti aonga ni kona ni kaotiota ara onimaki ao uaan te taamnei ake tabeua riki.​—Ruka 11:13; I-Karatia 5:​22, 23.

E reke naba aan onimakinan Iehova ao ana taanga ni kamanomano aika anera iroun Eritai n te bwai are e riki i Totan. E ataia te burabeti bwa e a tia te Atua ni baireiia ana tia ibuobuoki aika anera aika rangi ni bati bwa a na otabwaninia te kaawa ma taan ninia te tabo. A kamaiuaki Eritai ma ana toro n te aro ni kakai iroun te Atua ngke e oreiia taani kairiribai ni kamatakia. (2 Uea 6:​17-23) E boni kaotiota ana onimaki Eritai n te tai ni kangaanga anne, ai uana naba ma taai ake tabeua riki, ao e onimakina raoi Iehova.

Ti bia kakairi iroun Eritai n onimakina naba Iehova ae te Atua. (Taeka N Rabakau 3:​5, 6) Ni karaoan anne, “e na nanoangaira te Atua, ma ni kakabaiaira.” (Taian Areru 67:​1, BG) Ti kakoauaa ae ti aki otabwaniniaki raoi ni kaa ma aoti aika kaanga aai. Ma e na boni kamanoira Iehova rinanon te botaki n itaritari ae katobibia te aonnaba n tain te “rawawata ae korakora” ae e a kaan roko. (Mataio 24:21; Te Kaotioti 7:​9, 14) Ti bia ururingnga mangkai ni karokoa te tai anne bwa boni “nera ni kamaiu te Atua.”​—Taian Areru 62:​8, BG.