TITIRAKI MAIROUIA TAANI WAREWARE

A riai kaaro aika Kristian n tekateka ma natiia ae kabaneaki ni bobotaki n te ekaretia?

Bon akea bukina ngkai e na rangi n tabeaianga te aba, ni kaineti ma te tabo are e tekateka iai n te Tabo n Taromauri te aomata ae kabaneaki man te ekaretia. E katauraoaki te maekatin aei ma te kantaninga bwa e na kaungaia kaaro aika Kristian ngkana a nora riaina n anga te ibuobuoki ni bwaai n taamnei nakon natiia ae kabaneaki, are e teimatoa naba ngkai ni maeka ma ngaiia. N aron ae taekinaki n Te Taua-n-Tantani ae bwain Ritembwa 1, 2001, iteraniba 15-17, a kona naba kaaro n reirei n te Baibara ma natiia ae kabaneaki ae tuai n inaomata mairouia are e teimatoa ni maeka ma ngaiia. Bon te kantaninga n aei bwa e na reke te kaungaunga ae riai nakon natiia anne ibukini kaetani maiuna.a

Ibukini ngkanne bairean te tekateka n te Tabo n Taromauri, e na taraa n akea te kangaanga ngkana e tekateka n rau i rarikia ana karo te nati are kabaneaki ae tuai n inaomata mairouia. Kioina ngkai e aki katauaki te aomata ae kabaneaki bwa e na tekateka mai buki n te Tabo n Taromauri, bon akea ngkanne bukina ae riai ngkai e na aki kariaiakaki te ataei ae kabaneaki bwa e na tekateka i rarikia ana karo n te tabo are a tekateka iai. Ngkai a tabeakina ana onimaki natiia anne kaaro, a bon tangiria bwa a na kakoauaa ae e kakauongo raoi ao ni karekei kakabwaiaana mani bobotaki. E kona n ibuobuoki n te itera aei ngkana e tekateka natiia anne ma ngaiia n oneani mwin are e na katukaki ao n aki tabeakinaki.

Ma tera aron te ataei ae kabaneaki man te ekaretia are e a aikoa maeka ma ana karo? E nanonaki ngkanne n aei bwa e aki kona n tekateka ma ana karo? N taai aika nako ao e a tia ni kamatataaki raoi n ara boki, aron te Kristian ae riai ni kakorakoraa ni kateimatoa ngkana e kaaitara ma reitakina ma ana koraki are kabaneaki ae e a aki maeka ma ngaia.b Mangaia are e bon rangi ni kaokoro aron te aomata ae kabaneaki are e tekateka n rau i rarikia ana koraki n tain te botaki ma te aomata are e ukoukora te kan reitaki ma a na koraki anne n akea riaina. Ngkana a karaoa ae riai kaain te utu aika kakaonimaki nakon aia koraki ae kabaneaki man te ekaretia ao a kakorakoraia ni karinea te reirei ni kairiri man te Baibara ni kaineti ma te reitaki ma ngaia, e taraa n ae akea ngkanne riaia bwa a na tabeaianga ibukina.​—1 I-Korinto 5:​11, 13; 2 Ioane 11.

Ngkana tao e tekateka te aomata ae kabaneaki i rarikin ana koraki ke kaain te ekaretia riki temanna, akea riain te tabeaianga ngkana e noraki bwa e tekateka n rau. E kona ni karikii kangaanga aika kakaokoro tiatianakin ana tabo n tekateka te aomata anne ni kaineti ma are e tangiria. Ngkana a kakorakoraia ni karinei booto n reirei man te Baibara ake a kaineti ma te aomata ae kabaneaki, naake a roko ni kabane n ikotaki naba ma ana koraki aika kakaonimaki ao n aki karika ana tabo n tekateka bwa te bwai ni kabwakabwaka nakoia taari, ai akea ngkanne riaia n tabeaianga ibukini bairean taabo n tekateka nakoia naake a kaakaei bobotaki ni Kristian.c