TITIRAKI MAIROUIA TAANI WAREWARE
E aera ngke a tiinako rannimatan Iesu imwaini kautan Rataro n aron ae taekinaki n Ioane 11:35?
Ngkana e mate temanna ae ti tangiria, n aron ae riiriki a tiinako rannimatara ibukina bwa ti nang aki manga noria. E ngae ngke e tangiraki Rataro iroun Iesu, ma a aki tiinako rannimatana ibukini maten Rataro. A bon tiinako rannimatana ibukin nanoangaaia ana utu Rataro ao raoraona n aron ae taekinaki n ana rongorongo Ioane.—Ioane 11:36.
Ngke e moan ongo Iesu bwa e aoraki Rataro, e aki nako naba ngkekei nakoni mwengan Rataro ni katoka aorakina. E taekinaki ae kangai n te rongorongo: “Ngke e ongo [Iesu] ae e aoraki Rataro, ao e tiku riki uabong n te tabo are e mena iai.” (Ioane 11:6) Tera bukini baenikaina? Iai bukini karaoan aei irouna. E taku: “Tiaki te aoraki ni mate te aoraki aei, ma bon ibukin neboan te Atua, bwa e aonga n reke iai karinean Natin te aomata.” (Ioane 11:4) E aki riki te “mate” aei imwin aorakin Rataro. E iangoia Iesu bwa e na kamanena maten Rataro “ibukin neboan te Atua.” N te aro raa? I aoni kawaina ngkai Iesu ni karaoa te kakai ae kamimi ni kautan raoraona ae tatangiria man te ruanimate.
Ni maroron Iesu ma taan rimwina n te tai aei, e kabotaua te mate ma te matu. Anne bukina are e tuangia iai bwa e ‘na nako ikekei bwa e na kauta [Rataro] mani matuna.’ (Ioane 11:11) Iroun Iesu ngke e kauta Rataro, titeboo ma aron te karo are e kauta natina ae matu. Mangaia are akea bukin nanokawakina ni maten Rataro.
Ma tera are karika tiinakon rannimatan Iesu? E a manga kaekaaki naba anne n te rongorongo. Ngke e kaitiboo ma mwaanen Rataro are Maria ao n noria ma tabeman riki bwa a tang, e “ngirangira Iesu i nanona, ao e rawawata nanona.” N noran nanokawakia, e a namakina iai te nanokawaki Iesu ni karokoa ae e a ‘ngirangira i nanona.’ Anne bukina ngke “a tiinako rannimatan Iesu.” E korakora nanokawakin Iesu n noraia raoraona ake e tangiriia bwa a rangi n rawawata.—Ioane 11:33, 35.
E kaotaki n te rongorongo aei bwa iai mwaakan Iesu ni kona ni manga kaoki maiuia ao marurungia naake ti tangiriia n te waaki ae boou ae imwaira. E kaotaki naba nakoira bwa e nanoangaia aomata ake a a tia ni bua raoia aika tangiraki irouia n te mate are mairoun Atam. Reireiara riki teuana man te rongorongo aei, bwa ti riai n nanoangaia te koraki ake a nanokawaki ni maten temanna ae tangiraki irouia.
E ataia Iesu bwa e na boni kauta Rataro. Ma e ngae n anne, a bon tiinako naba rannimatana ibukini korakoran tangiraia ao nanoangaaia raoraon Rataro. N aron naba anne, ti kairaki bwa ti na ‘tang ma aomata aika tang’ man arora ni uataboa rawawataia iai. (I-Rom 12:15) Tiaki nanona bwa ngkana e karaoa anne temanna ai akea ngkanne onimakinan te kantaninga ibukin te mangauti. Ma e rangi n tonu raoi ana katoto Iesu ibukini kaotiotan te nanoanga ni koaua nakoia aika rawawata n tiinakon rannimatana, e ngae naba ngke e nang kauta Rataro.