Te Kantaninga Ibukia Maate Bon Te Mangauti

Ko kakoauaa te berita ae n te Baibara ni kaineti ma te mangauti?a E anainano te kantaninga are ti na manga katiteuanaaki ma aomata aika tangiraki iroura ake a a tia ni mate. Ma e koaua te kantaninga anne? Ibukini buokani kaekaan anne, ti wanawana ngkana ti iaiangoi aia katoto ana abotoro Iesu Kristo.

A rangi ni kakoauaa mangautiia maate abotoro. Bukin tera? Iai uoua bukina. Te moan, e boto aia kantaninga i aon te koaua aei: E a bon tia n uti Iesu mai buakoia maate. A bon nora Iesu are e kautaki abotoro ao “taari aika nimabubua tabun n tii te taina.” (1 I-Korinto 15:6) Irarikin anne, e kakoauaaki ao n ataaki mangautin Iesu n aron ae kaotaki n Euangkerio aika aua.​—Mataio 27:62–28:20; Mareko 16:1-8; Ruka 24:1-53; Ioane 20:1–21:25.

Te kauoua, a bon nora Iesu abotoro ni kautiia aomata aika teniman bwa n te moantai i Nain, imwina i Kaberenaum ao te kabanea i Betania. (Ruka 7:11-17; 8:49-56; Ioane 11:1-44) E irekereke te kautiuti ane te kabanea anne ae kabwarabwaraaki n te kaongora aei ma te utu ae kaan riki ma Iesu. Ti na nora te bwai are riki imwina.

“BONI NGAI TE MANGAUTI”

“E na mangauti mwaanem.” E taekina aei Iesu nakoni Mareta ae mwaanen Rataro are e a tia ni mate aua te bong n nako. N te moantai, e bon aki ota Mareta n te bwai ae nanonna Iesu n ana taeka akanne. E kaekaa neiei ni kangai: “I ataia bwa e na kautaki,” ma e iangoia bwa n te tai riki teuana n taai ake imwaina. Iangoa kubanakona ngke e a tia n ongo are e kangai Iesu, “Boni ngai te mangauti,” ao e a noria ni kauta mwaanena man te mate!​—Ioane 11:23-25.

E mena ia Rataro ni boong ake abong imwini matena? Akea ana taeka Rataro bwa tao e maiu n te tabo teuana riki i nanon boong akana aua akanne. Bon akea rabwatan Rataro ae aki mamate ae nako karawa. Ni kautan Rataro iroun Iesu, e bon aki kautia tao ni katikia man te tabo ae kakukurei i karawa ae kaan ma te Atua. E mena ia ngkanne Rataro i nanoni boong akana aua akanne? Ni koauana, e boni matu n te ruanimate.​—Te Minita 9:5, 10.

Uringnga bwa e kabotaua te mate Iesu ma te matu are e kona iai ni kautaki te aomata rinanon te mangauti. Ti wareka ae kangai n te rongorongo: “‘E a rawea motirawana raoraora are Rataro, ma N na nako ikekei bwa N na kautia.’ Mangaia are a taku taan rimwina nakoina: ‘Te Uea, ngkana e motirawa, ao ane e na manga marurung.’ Ma e taekina maten Rataro, Iesu. Ma a taku ngaiia bwa e taekina motirawana ni matu. Mangaia are n te tai anne, e a taku Iesu nakoia n te aro ae mataata: ‘E a boni mate Rataro.’” (Ioane 11:11-14) Ni kautan Rataro iroun Iesu, e boni kaoka maiuna ao e katiteuanaa ma ana utu. Ai bon tamaroara te bwaintituaraoi are e angania kaain te utu anne Iesu!

Taiani kautiuti ake e karaoi Iesu ni menana i aon te aba boni bannani baika e na karaoi n taai aika a na roko, ngkana e a riki bwa te Uea n Ana Tautaeka n Uea te Atua.b N ana tai n tautaeka Iesu mai karawa, e na boni kautiia naake a matu n ruanimateia botannaomata. Anne bukina ngke e kangai: “Boni ngai te mangauti.” Iangoa aroni kukureim ngkana ko a manga noria aomata aika tangiraki iroum! Iangoa naba te kimwareirei are a na rinanona aomata aika kautaki!​—Ruka 8:56.

ONIMAKINAN TE MAIU N AKI TOKI

E taku Iesu nakoni Mareta: “Ane onimakinai, ao e ngae ngke e mate, ma e na manga maiu. Ao aomata nako ake a maiu ma n onimakinai, a na bon aki mate.” (Ioane 11:25, 26) A na kantaningaa te maiu n aki toki te koraki ake e kautiia Iesu n ana tai n tautaeka ae maanna tenga te ririki, tii ngkana a onimakinna ma nanoia ni koaua.

Imwin taekinan taeka akana a kamimi akanne ni kaineti ma te mangauti iroun Iesu, e a tabeka te titiraki ae kammwakura te iango aei nakoni Mareta: “‘Ko kakoauaa aei?’ E taku neiei nakoina: ‘Eng te Uea, I kakoauaa bwa boni ngkoe te Kristo ae Natin te Atua.’” (Ioane 11:26, 27) Ao ngkoe tera arom, ko kani karikirakea onimakinan te kantaninga ibukin te mangauti are e reke irouni Mareta? Te moani mwaneka iai boni karekean te atatai ibukin ana kantaninga te Atua ibukia botannaomata. (Ioane 17:3; 1 Timoteo 2:4) E kona ni kairiri te atatai anne nakon te onimaki. E aera ko aki butiia Ana Tia Kakoaua Iehova bwa a na reirei n te Baibara ma ngkoe i aon aei? A na boni kukurei ni maroro ma ngkoe i aon te kantaninga ae kamimi ni kaineti ma te mangauti.