Tiaki Tokini Bwaai Nako te Mate!

Bon te kaawa ae uarereke Betania ae 3 te kiromita raroana mai Ierutarem. (Ioane 11:18) E riki te kangaanga ikanne tabeua te wiki imwaini maten Iesu. E karina n taonaki n te aoraki ae kakaiaki Rataro ae temanna mai buakoia raoraon Iesu ni kaan ao e mate.

Ngke e moan ongo te rongorongo aei Iesu, ao e tuangia taan rimwina bwa e matu Rataro ao e nangi nako ni kautia. (Ioane 11:11) Ma a aki ota raoi taan rimwin Iesu n te bwai are e nanonna, ai ngaia are e a karaua ni kamataataa ni kangai: “E a boni mate Rataro.”​—Ioane 11:14.

E roko Iesu i Betania abong imwin te taunimate ao e kakorakoraa ni kabebetea nanoni Mareta are mwaanen teuare mate. E taku Mareta: “Ngke arona bwa ko mena ikai, ao e na bon aki mate mwaaneu.” (Ioane 11:17, 21) E taku Iesu nakoina: “Boni ngai te mangauti ao te maiu. Ane onimakinai, ao e ngae ngke e mate, ma e na manga maiu.”​—Ioane 11:25.

Ibukini kaotan ae a boni koaua taeka akanne, e keerake nako rarikin te ruanimate Iesu ao e takarua ni kangai: “Rataro, nakomai otinako!” (Ioane 11:43) Ao a a rangi ni mimi taani mataku ngke e a otinako te mwaane are e a tia ni mate.

E a bon tia Iesu ni kautiia uoman aika mate imwain aei. N te tai teuana e kauta te teinnaine ae ataei are natin Iairo. Imwaini kautan te teinnaine anne iroun Iesu ao e boni kabwarabwaraa naba bwa e matu.​—Ruka 8:52.

Noria bwa ni kaineti ma kautan Rataro ao natin Iairo are te aine, ao e kabotaua te mate Iesu ma te matu. E tonuraoi te kabotau aei. Bukin tera? Te matu bon te aro ae akea te namakinaaba iai ao e kaotaki raoi te iango ae te motirawa man te maraki ao te rawawata. (Te Minita 9: 5; nora te bwaoki ae raon te kaongora aei ae kangai: “Titeboo te Mate ma te Matunako.”) A mataata raoi taan rimwin Iesu ake rimoa n te bwai ae bon riki n te mate. E taekinaki ae kangai n te Encyclopedia of Religion and Ethics: “Te mate bon te matu irouia taan rimwin Iesu, ao te ruanimate bon te tabo ni motirawa ibukia naake a mate ma aia onimaki.”a

E kabebeteaki nanora n ataakin ae a matu maate n te ruanimate ao a aki kammarakaki. Ai ngaia are ti a ota n te bwai ae riki n te mate ao ti aikoa maaku.

“NGKANA TAO E MATE TE AOMATA, AO E NA MANGA MAIU KE E AKI?”

Ngkana ti motirawa ni matu raoi n te tairiki, antai ae kan reitaanako matuna n aki toki? Tera te kantaninga ae iai iroura ae e na manga maiu te aomata ae wene ni matu n te ruanimate n aron Rataro ao natin Iairo are te aine?

E bon tabeka naba te titiraki anne te baatua are Iobi ngke e namakinna bwa e a kaani mate. E titiraki ni kangai: “Ngkana tao e mate te aomata, ao e na manga maiu ke e aki?”​—Iobi 14:14, BG.

E taetae nakon te Atua ae Moan te Mwaaka Iobi ao e kaekaa ana titiraki i bon irouna ni kangai: “Ko na weteai ao N na kaekako, ao ko na mataiakinai, ngai ae ko a tia ni karikai.” (Iobi 14: 15, BK) E kakoauaa raoi Iobi bwa e ingainga Iehova ni kariariaa te bong are E na kautiia iai Ana toro aika kakaonimaki. E ingainga nanon Iobi nakon te bwai ae aki kona n riki? Tiaki ngaia anne.

Ibukina bwa e a tia Iesu ni kautiia ake a mate, e teretere iai te bwai ni kakoaua bwa e anganaki te mwaaka i aon te mate iroun te Atua. Ni koauana, e taekinaki n te Baibara bwa iai ngkai iroun Iesu “kiingin te mate.” (Te Kaotioti 1:18) Ai ngaia are e na kauki mataroan te ruanimate aika rokanaki n aron are e tua bwa e na karabinoaki nako atibun ruanimaten Rataro.

E okioki n taekinaki te berita ibukin te mangauti aei n te Baibara. E karauaki nanon te burabeti ae Taniera iroun te anera ni kangai: “Ko na motika rawam, ao ko na tei n tibangam, n tokini boong.” (Taniera 12:13, BG) E tua ae kangai Iesu nakoia mataniwi n te baronga ae Iuta ake Tarukaio aika kakewea te berita ibukin te mangauti: “Kam kairua, ibukina bwa kam aki ataa te Koroboki ae Tabu ke mwaakan te Atua.” (Mataio 22:23, 29) E taku te abotoro Bauro: “Iai ae I kantaningaia mairoun te Atua . . . a na boni mangauti akana raoiroi ma akana aki raoiroi.”​—Mwakuri 24:15.

A NA UTI N NINGAI MAATE?

A na kautaki n ningai aika raoiroi ao aika aki raoiroi? E tuangaki Taniera are raoiroi aroarona iroun te anera bwa e na teirake “n tokini boong.” N aron naba anne, e kakoauaa Mareta bwa e na “kautaki n te mangauti n te kabanea ni bong” mwaanena ae Rataro.​—Ioane 11:24.

E kairekerekeaki n te Baibara te “kabanea ni bong” aei ma Ana Tautaeka n Uea Kristo. E korea ae kangai Bauro: “Bwa e riai n tautaeka [Kristo] bwa te uea ni karokoa kamenaaia akana kairiribai nakoina ni kabane i aani waena iroun te Atua. Ao e na boni kamaunaaki te tia kairiribai are te kabane, are te mate.” (1 I-Korinto 15:25, 26) Aio bukina ae rangi ni kakawaki ngkai ti riai n tataroa Ana Tautaeka n Uea te Atua bwa e na roko ao e na kakororaoaki nanon te Atua n te aonnaba.b

N aron ae e ataia raoi Iobi, bon ana kantaninga te Atua bwa e na kautiia maate. E na boni kamaunaaki te mate ngkana e roko te bong anne. Ao ai bon akea ae na manga titiraki ni kangai: “Tokini bwaai nako te mate?”