TITIRAKI AIKA KAEKAAKI MAN TE BAIBARA
Antai aika a na nako karawa ao bukin tera?
Mirion ma mirion aika kantaningaia bwa a na nako karawa ngkana a mate. E taekinna Iesu bwa a na maeka iai ana abotoro aika kakaonimaki. Imwaini matena, e berita bwa e na katauraoa aia tabo i karawa irarikin Tamana.—Wareka Ioane 14:2.
Bukin tera bwa a na kautaki aomata n te aonnaba aei nakon te maiu i karawa? Tera ae a na karaoia ikekei? E tuangia ana abotoro Iesu bwa a na riki bwa ueea. A na tautaekana te aonnaba aei.—Wareka Ruka 22:28-30; Te Kaotioti 5:10.
A na bane n nako karawa aomata aika raoiroi?
N angiin aaba ao tii tabeman ake a riki bwa taan tautaeka. Ngkana e na kautiia aomata nako karawa Iesu bwa a na kona n tautaekana te aonnaba, ti bae naba ni kantaningaia te koraki ake a rineaki bwa tii tabeman mwaitiia. (Ruka 12:32) E taekinaki n te Baibara mwaitiia raoi naake a na tautaeka ma Iesu.—Wareka Te Kaotioti 14:1.
E a tia Iesu ni katauraoi taabo i karawa ibukia tabeman taan rimwina. Ko ataia bwa tera ae a na karaoia ikekei?
Bon tiaki tii naake a na nako karawa n anganaki kaniwangaia. A na kukurei ni maiu n aki toki i aon te aba are e na kaokaki nakon te bwaretaiti, aomata ake a kakaonimaki n aantaeka i aan ana kariri Iesu n te Tautaeka n Uea. (Ioane 3:16) Iai tabeman ake a na rin n te Bwaretaiti ngkana a maiu n taini kamaunaan te waaki ae buakaka aei. Tabeman a na rin iai n tain te kautiuti.—Wareka Taian Areru 37:29; Ioane 5:28, 29.