Bukin Tera Bwa E Aki Katoka te Rawawata te Atua?

TERA ANA NAMAKIN TE ATUA IBUKIN RAWAWATARA?

Michelle: Mauri Sophia. I kukurei ni manga kaitiboo ma ngkoe ni mwengam.

Sophia: Ao ngai naba.

Michelle: N rokou ae nako ao ti maroroakina aron ana namakin te Atua ibukin rawawatara.a Ko taekinna ngkoa bwa anne te bwai ae ko tabe n iaiangoia i nanon te tai ae maan, ai moarara riki imwin ikoakin tinam ni kuratinakina n te kaa. Ma imwain ae ti waaki nako, e uara moa tinam?

Sophia: E nakoraoi n taai tabetai ao e a manga rawawata n taai tabetai. Ma e marurung n te bong aei.

Michelle: I rangi ni kukurei n ongo anne. E boni kangaanga bwa e na aki bwara nanom n te bae ko aitara ma ngaia aei.

Sophia: E boni koaua am taeka. N tabetai I kona ni manga iangoia bwa tao e na maanra ngaia n rinanon te rawawata aei.

Michelle: Anne te bwai ae riiriki. Ko bae n uringnga bwa ni kabanean ara maroro n rokou ngkoa ao I katuka te titiraki ae bukin tera bwa e aki katoka te rawawata te Atua ma e reitinako, e ngae ngke iai mwaakana ni katokia.

Sophia: Eng, I uringnga.

Michelle: Ma imwain ae ti na nora kaekaana man te Baibara, ti na rinanoni moa iango tabeua ake ti a tia ni maroroakin n rokou ae nako.

Sophia: A a ngaia.

Michelle: Bukina teuana, ti a ataia ae e iango naba n aron anne te aomata ae kakaonimaki n taai ake a karakinaki n te Baibara bwa e aera ngkai e aki katoka te rawawata te Atua. Ma e aki takuia te Atua ibukin ana titiraki anne ao e aki tuangnga naba bwa e riai ni kakorakoraa ana onimaki.

Sophia: Anne te iango ae boou irou.

Michelle: Ti reiakinna naba ae e aki tangirira Iehova ae te Atua bwa ti na rawawata. N te katoto, e taekinaki n te Baibara bwa ngke a rinanon te rawawata ae korakora ana aomata ao “e bon rawawata naba.”b E aki ngkanne karaunano ataakin ae e bon tabeakinira te Atua ngkana ti rawawata?

Sophia: Eng, e rangi ni karaunano anne.

Michelle: Te kabanea, ti boraoi n iangoia ae ngkai iai mwaakan ara tia Karikiriki ae rangi ni korakora, ni koauana bon iai ana konabwai n ibuobuoki ao ni katoka te rawawata n te tai are e taku.

Sophia: Anne te bwai ae I aki rangi n oota iai, bwa bukin tera ngkai e aki katoki mwakuri aika buakaka ni kabane te Atua ngkai iai mwaakana?

ANTAI AE TAEKINA TE KOAUA?

Michelle: Ti kona ni moana kakaaeani kaekaan am titiraki ni warekani moani bokin te Baibara ae Karikani Bwaai. Ko taneiai ma rongorongoia Atam ma Ewa ao uaan te kai are tabuaki?

Sophia: Eng. I a kaman reiakina te karaki anne n te reirei n Taabati. E tuangia te Atua bwa a aki riai ni kana uaan te kai teuana ma a boni karaoa anne ao a kanna.

Michelle: E eti anne. Ma ti na kaatuua ngkai taekani baika riki ake a kairaki iai Atam ao Ewa nakon te bure. Iai irekerekeni baika riki akanne ma te titiraki ae bukin tera bwa ti rawawata. Ko kona n taiaoka ni wareka Karikani Bwaai mwakoro 3, kibuna 1 nakon 5?

Sophia: Ngaia. E kangai: “Ao e nanowanawana riki te naeta nakoia manin te tawana ni kabaneia aika E karaoiia Iehova ae te Atua. Ao e taku nakon te aine arei, E koaua ke e aki ba E kangai te Atua, Kam na tai amarake mani kaai ni kabane aika i nanon te ne n aroka aei? Ao e taku te aine nakon te naeta arei, Ti boni kona n amarake man uaani kain te ne n aroka aei: ma aio taekan uaan te kai ane i nukan te ne n aroka aei, ba E kangai te Atua, Kam na tai kanna, ao tai ringnga naba, ba kam kawa ni mate. Ao e taku te naeta nakon te aine, Kam na bon aki mate: ba E ataingkami te Atua ba n te bong ae kam na kanna iai, ao a na kaureaki matami, ao kam na riki ba kaanga te Atua n ata te raoiroi ma te buakaka.”

Michelle: Ko rabwa. Ti na rinanoni kiibu aikai tabeua te miniti. Te moan, ko noria bwa e taetae te naeta nakon te aine ae Ewa. Ni kabwarabwaraana riki n te kibu teuana n te Baibara ao e kamatataaki bwa bon Tatan te Riaboro are e taetae nakon neiei rinanon te naeta.c E titiraki Tatan nakon Ewa ibukin ana tua te Atua ni kaineti ma te kai teuana. Ko ataia bwa tera mwini kanakin uaan te kai irouia Atam ao Ewa are a tuangaki iroun te Atua?

Sophia: A na boni mate.

Michelle: Eti anne. Ngkanne n ana taeka Tatan ake e taekin imwina riki, e a bukina te Atua n te aro ae kakaiaki. Nora ana taeka aei: “Kam na bon aki mate.” E aranaki te Atua iroun Tatan bwa te tia kewe!

Sophia: I tuai man ongongo iteran te karaki anne mai mwaina.

Michelle: Ngke e a tia n arana te Atua bwa te tia kewe, e a tabeka ngkanne te titiraki Tatan are e kainnanoaki iai te tai ae maan ibukini kaekaana. Ko a ataa ngkanne bukina?

Sophia: Kaanga I tuai mataata raoi.

Michelle: E raoiroi, tao N na kaikonakia ni kangai. Ti na iangoia bwa n te taina ao I a mwananga bwa N na kawariko ao n tuangko bwa I rangi ni korakora riki nakoim. Ko na kanga ni kakeweai?

Sophia: Tao N na riai ni kataa moa korakoram.

Michelle: Ngaia raoi anne. Tao ti kona ni kakaaea te bwai ae tinebu ao n noria bwa antai iroura ae kona ni mwemwekia. Ni koauana, e na oti raoi bwa antai ae korakora riki iroura.

Sophia: I a ota n te bae ko nanonna.

Michelle: Ma tera arom ngkana I taekinna bwa I bwaina te koaua riki nakoim n oneani mwin are N na taekinna bwa I korakora riki? E na kangaanga riki iangoan anne?

Sophia: Eng, e na bae ni kangaanga riki irou.

Michelle: Ni koauana, bwainan te koaua bon tiaki titeboo ma te korakora are kona ni kakoauaaki n te tutuo ae kakaraoaki.

Sophia: Bon tiaki ngaia anne.

Michelle: N etina, te anga ae na kanakoraoaki iai te kangaanga boni karekean te tai ae maan bwa a na kona n norira aomata bwa antai ae bwaina riki te koaua iroura.

Sophia: E mataata anne.

Michelle: Taraa riki te rongorongo ae ni Karikani Bwaai. E taekinna Tatan bwa e korakora riki nakon te Atua?

Sophia: E aki.

Michelle: E kona te Atua ni waekoa ni kaota kairuan Tatan. Ma n oneani mwin anne, e bon taekinna Tatan bwa e bwaina te koaua riki nakon te Atua. Ibukin anne, e taku nakon Ewa: ‘E kekeweiko te Atua ma I tataekina ngai te koaua.’

Sophia: E kakannongora anne.

Michelle: Ibukina bwa e wanawana te Atua, e ataa te anga ae tamaroa bwa e kariaia te tai ae maan ibukini kaetan te kangaanga. N tokina, e na bon oti raoi bwa antai ae taekina te koaua ao antai ae kewe.

TE TITIRAKI AE KAKAWAKI

Sophia: Ma ngke e mate Ewa, e aki ngkanne kakoauaaki bwa e taekina te koaua te Atua?

Michelle: N etina, e bon taekina te koaua te Atua. Ma e bati riki te bwai ae riai n ataaki ibukin ana kariri Tatan. Nora riki are ni kibuna 5. Ko noria bwa tera riki are e tuangaki Ewa iroun Tatan?

Sophia: E taekinna bwa a na kaureaki matana ngkana e kana uaan te kai.

Michelle: Ngaia anne, ao e na riki bwa kaanga “te Atua n ata te raoiroi ma te buakaka.” Ngaia are e taekinna Tatan bwa e karabaa te bwai ae raoiroi te Atua mairouia aomata.

Sophia: Aa, I a oota raoi.

Michelle: Ao anne naba te kangaanga ae kakaiaki.

Sophia: Tera ae ko nanonna?

Michelle: E kaotaki man ana taeka Tatan bwa a aki kainnanoa ana kairiri te Atua te botannaomata ni kabane ao Ewa. Ao ibukin aio, e ataa te kawai ae tamaroa Iehova ibukini kaetan te kangaanga bwa boni kariaiakan Tatan bwa e na kaota koauan ana iango. Ngaia are e kariaiakaki Tatan iroun te Atua bwa e na tautaekana te aonnaba aei i nanon te tai ae maan. Anne are e a kabwarabwaraaki iai bukina ngkai ti a otabwaniniaki n te rawawata ae korakora kioina ngkai Tatan boni ngaia te tia tautaekana te aonnaba ao tiaki te Atua.d Ma iai naba te rongorongo ae raoiroi.

Sophia: Ae tera?

Michelle: Ti reiakinaki n te Baibara koaua aika uoua aika tamaroa ibukin te Atua. Te moan, e tatauraoi Iehova ni buokira ngkana ti rawawata. N te katoto, iangoi ana taeka te Uea are Tawita n Taian Areru 31:7, (BK). E rinanon te rawawata ae bati Tawita n ana tai ni maiu, ma nora te baere taekinna ngke e tataro nakon te Atua. Ko kona ni wareka te kibu anne taiaoka?

Sophia: Ngaia. Ao e kangai: “N na kabaia ma ni kimareirei ba ko akoi. Ko nora kananoangau, ko ata rawawatan nanou.”

Michelle: Ngaia are e ngae ngke e rinanon te rawawata Tawita, ma e reke kabebetean nanona n ataan ae e nori bwaai ni kabane Iehova ake e rinanoi. E karaunano iroum iangoan ae e atai bwaai ni kabane Iehova ao ara namakin naba aika kammaraki ake a aki kona n oota raoi iai aomata?

Sophia: Eng, e karaunano anne.

Michelle: Te kauoua ni koaua ae tamaroa bon ataan ae e bon aki kariaia te rawawata te Atua bwa e na waakinako n aki toki. Ti reiakinna man te Baibara bwa e na waekoa ni katoka ana waaki n tautaeka ae buakaka Tatan. Ao e na kaoki bwaai ni kabane aika buakaka aika riki nakon aroia ae raoiroi n ikotaki naba ma bwaai aika riki nakoim ao nakon tinam aika kam rawawata iai. I kona ni manga okiriko n te wiki ae na roko ao ni kaota bukini kakoauaan ae e na waekoa te Atua ni kamauna te rawawata ni kabane?e

Sophia: E raoiroi anne.