A Aera Aomata Ngkai A Tataro?

Ko katoatai n tataro? A karaoa anne aomata aika bati ao tabeman naba ake a aki kakoauaa te Atua. Ma a aera aomata ngkai a tataro? E taekinaki n te kakaae teuana i aoni Buranti bwa a tataro ke ni kananoi aia iango n taai tabetai iterani mwaitiia kaaina “tii ibukini kabebeteaia.” A aki tataro ibukin neboan te Atua, n aroia naba kaain Eurobe aika bati. Ma a ukera “karauan nanoia n te tataro.” N te itera are teuana, a kawara te Atua taan onimaki tabeman tii ngkana iai baika a kainnanoi ao ni kantaningaia bwa a na kaekaaki aia bubutii n te tai ae waekoa.—Itaia 26:16.

Tera arom iai? Ko iangoa te tataro bwa bon tii te kawai are e na buokiko ni kanakoraoa am iango? Ngkana ko kakoauaa te Atua, ko nora buokam n te tataro? Ke n taraana iroum, a aki kaekaaki am tataro? Ko kona ni buokaki n te Baibara n iangoa te tataro bwa tiaki tii te kawai ibukin te kabebeteaki, ma bon te kawai ae rangi ni kakawaki ibukini kaaniara ma te Atua.