Ko Riai n Tataro?

Ko bae n titiraki ni kangai: ‘Ngkana ngaia bwa e atai bwaai ni kabane te Atua n ikotaki naba ma au iango ao baika I kainnanoi, e aera ngkanne bwa I riai n tataro?’ E boni kakawaki te titiraki anne. E aki taekinna Iesu bwa ‘e atai baika kam kainnanoi te Atua imwain ae kam butiia’? (Mataio 6:8) E ataa aei aia Uea tibun Iteraera rimoa are Tawita ao e korea ae kangai: “Noria, akea te taeka teuana i neweu, Ae aki bane n ataki i Roum, Iehova.” (Taian Areru 139:4, BG) Bukin tera ngkanne bwa ti riai ni kawara te Atua rinanon te tataro? Ibukini kaekaan anne, ti na rinanoi baika a taekinaki n te Baibara ibukin aia tataro taan taromauria te Atua.a

TI KAANIAKI MA TE ATUA N TE TATARO

E ngae ngke e taekinaki n te Baibara bwa e atai bwaai ni kabane Iehovab ae te Atua, ma e kaotaki naba iai bwa e aki kukurei n tii boboti rongorongoia taan taromauria. (Taian Areru 139:6; I-Rom 11:33) E kaokoro ana ururing ae akea tiana ni kabotauaki ma te kaombiuta ae kakawakin rongorongoia aomata. Ni koauana, e rangi ni kan atai ara iango aika i nanora te Atua ibukina bwa e tangirira bwa ti na kaanira riki ma ngaia. (Taian Areru 139:23, 24; Iakobo 4:8) Anne bukina ngke e kaungaia taan rimwina Iesu bwa a na tataro, e ngae naba ngke e atai raoi Tamana baika ti kainnanoi ni maiura. (Mataio 6:6-8) Ti na kaaniaki riki ma ara tia Karikiriki ngkana ti kabatiaa riki kaotiotan ara iango nakoina.

N tabetai, ti kona n noria bwa e kangaanga ataakin raoi baika ti riai ni bubutii n ara tataro. N rikin aei iroura, e kona te Atua n nori baika bati riki irarikin ara namakin aika ti aki taekin ao ni kamanena wanawanana ae kororaoi ni kaineti ma baika ti aitara ma ngaai ao n anganira baika ti kainnanoi. (I-Rom 8:26, 27; I-Ebeto 3:20) Ti namakina kaaniara ma te Atua ngkana ti ota raoi ni baike e a tia ni karaoi ibukini maiura ao n aaro naba aika aki rang n otara.

E KAEKAI TATARO NAKO TE ATUA?

A karauaki nanora n te Baibara bwa e taekinaki iai ae e kaekai aia tataro ana toro aika kakaonimaki te Atua ae Moan te Mwaaka, ma e kaotaki naba iai bukin aki ongoraean tataro tabeua. N te katoto, n te tai are e a butanako iai te tiritiri irouia tibun Iteraera rimoa, e a tuangaki te burabeti ae Itaia iroun te Atua bwa e na tuangia aomata ni kangai: “Ngkana kam kabatiai naba ami tataro, ao I aki kan ongo: a on baimi n te raraa.” (Itaia 1:15, BG) E teretere n anne bwa a aki kona ni kantaningaa te Atua bwa e na ongoraei aia tataro naake a aki karinei ana tua te Atua ke a tataro ma nanoia aika kairua.—Taeka N Rabakau 28:9; Iakobo 4:3.

N te itera are teuana, e taekinaki ae kangai n te Baibara: “Ngkana ti bubutiia te bwai teuana ae boraoi ma nanona ao e bon ongo iroura.” (1 Ioane 5:14) Nanon anne ngkanne bwa e na angania taan taromauria te Atua bwaai ni kabane aika a bubutii n akea aia kakorakora? Tiaki ngaia anne. Iangoa rongorongon te abotoro Bauro are e bubutiia te Atua tenua te tai bwa e na kanakoa ‘te bwai ni kateketeke n rabwatana.’ (2 I-Korinto 12:7, 8) Tao e mwengabuaka Bauro n aorakini matana ae rangi ni maan. Ai kabwarananora anne irouni Bauro! E a tia n anganaki te bwaintituaraoi ae te kona ni katoki aoraki ao e a tia naba ni kauta temanna, ma e ngae n anne e riai n nanomwaaka n aorakina. (Mwakuri 19:11, 12; 20:9, 10) E ngae ngke e kaekaaki ana bubutii Bauro n te aro ae bobuaka ma are e tangiria, ma e boni butimwaea ana kaeka te Atua ma te nano ni kakaitau.—2 I-Korinto 12:9, 10.

Ni koauana, a boni kaekaaki n te aro ae kamimi aia tataro tabeman aomata aika taekinaki n te Baibara. (2 Uea 20:1-7) Ma aeka ni kaeka akanne bon tiaki te aro ae taneiai te aba iai ao n taai naba ake a karakinaki n te Baibara. A karawawataaki tabeman taan onimaki ngke e a taraa n aki kaekaaki aia tataro iroun te Atua. E titiraki ni kangai te Uea ae Tawita: “Iawe, ko na kaki taekau n ua ningai? n aki toki?” (Taian Areru 13:1, BK) Ma ngke e a ataia te mwaane ae kakaonimaki anne bwa e aki toki ni kamaiua Iehova, e a manga kamatoaa n taekina onimakinan te Atua irouna. E reitia ni kangai n ana tataro naba anne: “I onimakina am akoi.” (Taian Areru 13:5, BK) A riai taan taromauria te Atua ni boong aikai ni botumwaaka n tataro ni karokoa a kaekaaki aia tataro n aron naba Tawita.—I-Rom 12:12.

ARON TE ATUA NI KAEKAI TATARO

E kaekai ara bubutii te Atua ni baika ti boni kainnanoi.

Iai bukina ae riai ngkai a aki angania natiia baika a bubutii n taai nako, kaaro aika mwamwannano n te tai are a bubutii iai. N aron naba anne, e kona n aki anganira te Atua baika ti bubutii n aron ae ti iangoia ke n te tai ae ti kantaningaia iai. Ma ti kona ni koaua raoi bwa e na anganira baika ti boni kainnanoi n te tai ao n te aro ae riai, ara tia Karikiriki n aron te karo ae tatangira.—Ruka 11:11-13.

E kona te Atua ni kaekai ara bubutii n aaro aika aki rangi n otara.

Ma tera arora ngkana ti tataro ibukini kabebeteara man ara kangaanga ae teimatoa n riiriki? Ti riai n iangoia bwa e bon tuai mani kaekai ara bubutii Iehova ngkai akea kaekaaia aika kamimi? Ni kaitaraan anne, ti na karaoa ae riai ngkana ti iangoia bwa tao e a tia te Atua ni boutokaira n aaro aika aki rangi n otara aika bati riki ke e tuai. N te katoto, tao e karaoa ae kona ni buokira iai te rao ae mwamwannano n taina raoi ae riai. (Taeka N Rabakau 17:17) E kona Iehova ni kaira te rao ane mwamwannano anne bwa e na buokira? Irarikin anne, e kona te Atua ni kaekaa te bubutii ni kani buokaki rinanon te Baibara. Ti kona ni kunea i nanona te atatai ae ti kainnanoia bwa ti aonga n tokanikai i aon te kangaanga ae kakaiaki.— 2 Timoteo 3:16, 17.

E aki toki n angania ana aomata te Atua te korakora ae a kainnanoia bwa a aonga n tokanikai i aon aia kangaanga, n oneani mwin are e na kanakoi. (2 I-Korinto 4:7) N te katoto, ngke e bubutiia Tamana Iesu bwa e na kanakoa rawawatana bwa e aonga n aki kabuakakaaki aran te Atua, e a kanakoa te anera Iehova bwa e na kakorakoraa Natina. (Ruka 22:42, 43) N aron naba anne, e kona te Atua ni kaira raoraora ni kaan bwa e na anganira te taeka ni kaungaunga n te tai are ti rangi ni kainnanoia iai. (Taeka N Rabakau 12:25) Ibukina bwa e aki rangi n otara aroni kaekaan ara bubutii, ti riai ngkanne ni kamatairikira riki nakon ana anga te Atua ni kaekai ara tataro.

A kaekaaki ara bubutii tabeua n te tai are e baireia te Atua.

E taekinaki n te Baibara bwa e kaotiota ana tangira “n taina ae riai” te Atua ae Moan te Mwaaka nakoia aika a kananorinanoia. (1 Betero 5:6) Ai ngaia are ngkana e taraa ni baenikai Iehova ni kaekai ara bubutii aika nako mai nanora, ti riai n aki iangoia bwa e aikoa tabeakinira. Ma ibukina bwa e rangi ni bati riki ae e ataia ara tia Karikiriki ae mwamwannano, akea te nanououa bwa e boto rinanoan ara bubutii n te bwai ae e ataia bwa te kabanea n tamaroa ibukira.

Ibukini kamatataana: Iangoia bwa iai natim te mwaane ae uarereke ao e bubutiiko ana bwatika. Ko nang bon anganna naba te bwai are e bubutii n akea te bwai ae e karaoia moa? Ngkana ko namakinna bwa e tuai n rabakau ni bwatika, tao ko na iangoa kabooana rimwi riki. Ma imwin tabeua te tai, tao ko nang kariaia ana bubutii ngkana ko ataia bwa karaoan anne bon te bwai ae moan te tamaroa ibukina. N aron naba anne, tao e na anganira te Atua “baikana [a] tangiri nanora” n taina ae riai ngkana ti teimatoa n tataroi.—Taian Areru 37:4, BG.

KAKOAUAA BWA E BON ONGORAEI AM TATARO IEHOVA

A kaumakaki Kristian ni koaua n te Baibara bwa a na kakoauaa ae e rangi ni kakawaki te tataro. A kona ni kangai tabeman: ‘E bebete taekinan anne nakoni karaoana.’ Ni koauana, ngkana ti a tia n nanomwaaka i aan ara kangaanga i nanon te tai ae maan ke aeka n ribuaka tabeua, ti kona n namakinna bwa e kangaanga iroura tataningaani kaekaana mairoun te Atua. Ma ti wanawana ngkana ti ururinga ana reirei Iesu ni kaineti ma te botumwaaka n tataro.

E taekina te kaikonaki Iesu ni kaineti ma te aine ae e a tia ni mate buuna ae maiu ni kainnano are e teimatoa ni kawara te tia moti ae ribuaka ibukini karekean te moti ae riai. (Ruka 18:1-3) E ngae ngke e rawa te tia moti anne ni buoka te aine aei n te moantai, ma n tokina e a taetae i bon irouna ni kangai “N na taraia ngkai bwa e na baireaki te moti ae riai nakoina, bwa e aonga n aki manga roroko ni katabeaiangaai ni kaboraai.” (Ruka 18:4, 5) Ni kaineti ma ae taekinaki n te kibu aei n te moan taetae, e mutiakina te aine anne te tia moti bwa e aonga n aki “oreaki matana” n te aro ni kaikonaki iroun neiei ke “ni kabuakakaaki taekana.”c Ngkana ngaia bwa e buoka te aine anne te tia moti ae ribuaka ae rawa ni kabuakakaaki taekana, a na mwaitira riki ngkanne karaoan te kaetitaeka ae riai iroun te Atua ae tatangira nakoia te koraki “ake a tang nakoina ni ngaina ao ni bong”? N aron are e taekinna Iesu, “e na boni kawaekoaa karekean te kaetitaeka raoi nakoia” te Atua.—Ruka 18:6-8.

E ngae ngkai n tabetai ti kona ni kua ni bubutii buokara ke akoara, ma ti aki riai ni kabwarai nanora. Ngkana ti botumwaaka n tataro, ti a kaotiota iai koauan raoi nanora ni kan nora ana ibuobuoki te Atua i nanoni maiura. Ti reiakina naba ataakini kaekaan ara bubutii iroun te Atua ao ibukin anne ti a kaanira riki nakoina. Eng, ti kona ni kakoauaa raoi bwa e na boni kaekai ara tataro aika nako mai nanora Iehova ngkana ti teimatoa ni bubutii ma te onimaki.—Ruka 11:9.