TE BAIBARA A kamanena te Baibara ni kaekai iai au titiraki ni kabane!

AROU RIMOA:

Ngke I bungiaki ao bon iai abaia au karo ae uarereke are a kawakinia iai maan n te kaawa ae tionako i Galicia i meangi-maeaon Tibein. Bon te kaaman ngai i buakoia tariu aika waniman. Ti boni kukukurei i nanon ara utu. N te tai anne, n aia katei kaain Tibein e riai temanna te nati man te utu n rin n te kuura n tama ke n aia tabo tiina. Bon teniman man ara utu aika a karaoa anne.

Ngke ai 13 au ririki, I a rin n aia tabo tiina i Madrid n aron naba tariu are karimoau. E bon aki kaotiotaki te itangitangiri n aia tabo tiina. Akea iai te reitaki ma bon tii taian tua, te tatataro ao ai kakeaani bwaikorakin te maiu aei. Ti bobotaki n te karangaina n te umwantabu ibukini kananoan ara iango, e ngae naba ngkana akea te bwai ae I kananoa au iango iai. Imwin anne, ti anenei kunan te Aro ao n ira te Tutia n te taetae n Ratine ni kabane. Bon akea otau ae reke ao I namakinna bwa kaanga e raroanako te Atua mairou. Ti katabuaki n taetae teutana naba te tai i marenara ni boong akanne ni kabane. E ngae naba ngkana I kaitiboo ma tariu, ti tii kona ni kangai, “Ko na mauri n arani Maria ae moan te raoiroi.” Ti kariaiakaki irouia tiina ni kakaraki imwin te amwarake n taai nako tii i nanon te iterana te aoa. Ai boni kaokorora aei ma maiu are kakukurei n au utu ni mwengau! I namakinna bwa I a kaokoroaki n tii ngai ao n angiin te tai I bon tang.

E ngae ngke I tuai man namakinna bwa I kaaniaki ma te Atua, ma I boni karaoa au berita bwa N na riki bwa te tina ngke 17 au ririki. Ni koauana, I bon tii karaoa te bwai ae I kantaningaaki iai, ma n te tai ae waekoa I a moanna n iaiangoia bwa e rineai te Atua ke e aki. A taneiai n taekinna tiina bwa tokia akana reke irouia aeka n raraoma aikai, a na boni kamaunaaki n te ai ni moone. Ma e ngae n anne, I bon teimatoa naba n raraoma. I ataia bwa e aki kaokoroa Iesu Kristo ma e teimatoa ni katabetabea n reireinia ao ni buokiia tabemwaang. (Mataio 4:23-25) Ngke ai 20 au ririki, bon akea bukina ae I riai iai n teimatoa n riki bwa te tina. I boni mimi ngke e a tuangai te mataniwi n tina bwa ngkana I aki koaua raoi ae I riai n tina ke I aki, e raoiroi riki ngkana I waekoa n nako. N au iango, tao e maaka are I kona ni kariria tabemwaang. Ai ngaia are I a kitana te tabo n tina.

Ngke I a okira mwengau, a a rangi n nanoangaai au karo. Ma kioina ngke akea te mwakuri ae kona n reke n ara kaawa, I a kitana abau ao ni mwaing nako Tiaman are e maeka iai temanna mwaaneu. E boni kaaina te kurubu teuana ae mwakuri korakora n te tautaeka n Tibein ake a Komuniti aika taan rabanako. I boni mwengaraoi i buakoia aomata akanne bwa a buaka ibukini baika a riai n reke irouia taani mwakuri ao kaboraoakia mwaane ma aine. Ngaia are I a riki naba bwa te Komuniti ao n tokina I a mare ma temanna mai buakoia kaain te kurubu anne. I iangoia bwa e rangi ni manena te bwai ae I karaoia n aron tibwaakin nako aia boki Komuniti ao irirakin taiani mwaati ibukini kaotan te aki kukurei.

Imwin tabeua te tai, e a manga bwara nanou. I noria bwa a kabwaka Komuniti ni maiuakini baike a reiakinia iai aomata. N 1971, e a rikirake ni korakora riki raraomau ngke a a kabueka ana Aobiti te tia Tei mai Tibein ae mena i Frankfurt tabeman rooro n rikirake man ara kurubu. A karaoa anne ibukin aki kukureia n ana ribuaka te tautaeka ae tuamatoa i Tibein. Ma I kakoauaa bwa e bure aroni kaotan aki kukureia aei.

Ngke I a tia ni bungia au moan nati te mwaane, I a tuanga kaainnabau bwa N nang aki irira aia taromauri Komuniti. I boni botu bwa ai akea raoraou rimoa aika a kakawarai ma natiu. I bon iangoia naba bwa iai manenan te maiu ke akea. E koaua bwa e manena te kakorakora ni kanakoraoa maiuia botannaomata?

ARONI BITAKINI MAIU MAN TE BAIBARA:

N 1976 ao a a karebwerebwe n ara mataroa uoman taani Kakoaua aika kaain Tibein ao a anganai booki tabeua aika aanaki man te Baibara, ao I butimwaei. N aia kauoua n roko, I a tabeki titiraki aika bati teuana imwin teuana ni kaineti ma te karawawata, te kakaokoroaki ao te ribuaka. I boni mimi bwa a kabongana te Baibara ni kaekai iai au titiraki ni kabane! I a bon ingainga ni kan reiakina te Baibara.

N te moantai, I tii kukurei n reiakini baika koaua. Ma e a bitaki au iango ngke I a moanna n iririi bobotaki ma kaainnabau n aia Tabo n Taromauri Ana Tia Kakoaua Iehova. Ao n te tai anne ai uoman natira. A bon akoi taani Kakoaua bwa a katokaira n aia kaa ao ni buokira naba n tararuaia natira n taini bobotaki. E a rikirake tangiraia taani Kakoaua irou.

Ma e ngae n anne, a bon teimatoa naba n tiku n au iango raraomau tabeua ibukin te Aro. I a iangoia bwa N na nako n noria au utu i Tibein. E kataia ai tamau ae te mitinare ni kabwaraa nanou man reiakinan te Baibara, ma e korakora aia ibuobuoki nakoiu taani Kakoaua ake n au kaawa. A boni kaekai naba au titiraki man te Baibara taani Kakoaua n au kaawa n aroia naba ake i Tiaman. E a moti au iango bwa N na manga moana au reirei n te Baibara ngkana I okira Tiaman. E ngae ngke e iangoia kaainnabau bwa e na aki tomaanako ana reirei n te Baibara, ma I boni moana au reirei ao ni kakoroa nanon au motinnano. N 1978, I a bwabetitoaki ao n riki bwa Ana Tia Kakoaua Iehova.

AROU NI KAKABWAIAAKI:

E a reke irou te kantaninga ae mataata ao te kairiri ni maiu man te atatai ae eti ni kaineti ma te koaua man te Baibara. N te katoto, a kaungaaki buuaine n 1 Betero 3:1-4 bwa “a na aantaeka” irouia buuia ma “te karinerine ae bati” ao ni karikirakea “te nano ae nimamannei . . . ae moan te kakawaki i matan te Atua.” I a tia ni buokaki ni booto n reirei akanne bwa N na kakororaoa tabeu ngkai te buu te aine ao te tina ngai.

I a tia n riki bwa te tia Kakoaua n te maan ae 35 tabun te ririki. I kukurei ni beku ibukin te Atua ao n riki bwa kaain te botaki n itaritari ae katobibia te aonnaba ao I kimwareirei bwa a karaoa naba anne aman mai buakoia natiu aika niman.