Titiraki Aika Kaekaaki Man Te Baibara

Antai raoi ae tautaekana te aonnaba aei?

A bati aomata aika a kakoauaa bwa bon te Atua ae koaua are e tautaekana te aonnaba aei. Ma ngkana ngaia anne, e koaua bwa e na onrake te aonnaba aei n te rawawata? (Te Tua-Kaua 32:4, 5) N aron ae taekinaki n te Baibara, e tautaekanaki te aonnaba aei iroun te aomata temanna ae buakaka.—Wareka 1 Ioane 5:19.

E kanga n reke mwaakan te aomata ae buakaka n tautaekana te botannaomata? Ni moani karikaia aomata, e boni karitei te anera temanna nakon te Atua ao e kaumakiia te moan taanga bwa a na kaaitara naba. (Karikani Bwaai 3:1-6) A rineia te taanga aei bwa a na ongeaba iroun te anera ae karitei arei are Tatan ao ni karikia bwa aia tia tautaeka. Bon tii te Atua ae Moan te Mwaaka ae iai riaina n Tautaeka ma e tangiriia aomata bwa a na rinea ana tautaeka ibukin tangirana. (Te Tua-Kaua 6:6; 30:16, 19) E kananokawaki bwa a a tia ni mwamwanaaki angiia te botannaomata bwa a na karaoa aia motinnano ae bure n aroia te moan taanga.—Wareka Te Kaotioti 12:9.

Antai ae na katoki aia kangaanga aomata?

E na kariaia te Atua bwa e na waakina nako ana tautaeka Tatan ae buakaka? E aki! E na kaira Iesu te Atua bwa e na kaitiakii mwini baike a bubuaka ake e a tia ni karaoi Tatan.—Wareka 1 Ioane 3:8.

E na kamaunaaki Tatan iroun Iesu ngkana e anganaki mwaakana iroun te Atua. (I-Rom 16:20) Imwin anne, e nang tautaekania te botannaomata te Atua ao ni kaoka aroni maiuia te botannaomata ae kakukurei ao n rau are e moani kantaningaia.—Wareka Te Kaotioti 21:3-5.