Buokiia Raao n te Onimaki Aika Buuraure N te Aro Raa?

Ko bae n ataa temanna ae buuraure ao tao a bati naba aika rinanon anne. E riki anne ibukina bwa e a rangi ni bwabwainaki te buuraure. N te katoto, e kaotaki n te kakaae i Poland bwa a bae ni buuraure n angiin te tai aomata aika 30 aia ririki ni maiu ake a a tia n tekateka n taanga i nanon tenua nakon onoua te ririki, ma e aki onoti te buuraure tii nakon te roro anne.

Ni koauana, e ribootinaki aei n te Botaki Ibukin te Tua ni Kaineti ma te Utu i Tibein: “N tauani mwin te buuraure [i aon Eurobe] ao a buuraure iterani mwaitiia ake a a tia ni mare.” E riiriki naba aei n aaba aika kaubwai.

NAMAKIN AIKA KARINA NI BITAKI

Tera ae irekereke ma te bwai ae taabangaki rikina aei? E taku te tia anga taeka n reirei ibukin te mare ae mwaatai i Eurobe Mainiku: “E kaotaraeaki n te buuraure baika a a kaman riki n aron uruakin te reitaki ao mwina bon te maenako, ae te bwai ae rangi ni kananokawaki.” E reitia neiei ni kangai: N angiin te tai, e taorimwiaki anne n “namakinan te rawawata ae korakora, te un, te uringaaba, te maneang, te bwarannano ao ai te maamaa.” E kauekeaki naba man aei n tabetai te iango ni kani bakabure. “Ngkana e a reke te kabanea ni moti man te boowi bwa ai te buuraure, e a moanaki ngkanne te bwai ae na riki imwina. Ngkana e a taonakinako te aomata ae buuraure n namakinan ae ai akea uaana ao ribaakina, e a kona n iango ni kangai: ‘Ngkai I a buuraure ai antai raoi ngai? Tera uaani maiu?’”

E taku Ewa ngke e uringi ririki tabeua aika nako: “I namakina te maamaa ae korakora bwa imwin au buuraure, a aranai kaain rarikiu ao raou ni mwakuri bwa ‘te aine ae kitanaki irouni buuna.’ I rangi n un. Ibukina bwa I a tiku ma natiu aika uarereke aika uoman, I a riki iai bwa te tina ao te karo nakoia.”a E taku Atam ae beku bwa te unimwaane n te ekaretia ae karineaki i nanon 12 te ririki: “E a bua onimakinau i bon irou n te aro are n tabetai I a bon rangi n un, ao I a iangoia bwa N na kararoaai ma aomata ni kabane.”

TE KABOKORAKORA NI KAREKEA AE RIAI

Ibukina bwa a karawawataaki tabemwaang n raraomaeakinan taai aika a na roko, a a kabokorakora ni karekea ae riai, e ngae naba ngkana ai iraua te ririki imwin aia buuraure. A kona n iangoia bwa a aikoa tangiraki irouia tabemwaang. Irarikin anne, e taekinna temanna te tia kororongorongo i aon te buuraure bwa a riai ngkai nakanne ni “bitii kateiia ao n reiakina aroia ni kaaitarai aia kangaanga.”

E ururing rikaaki Stanisław ao e taku: “Ngke ti buuraure ao e riribaai neiere au moannei bwa N na noriia natiu aine aika uoman aika uarereke. Ibukin anne, I a namakinna bwa ai akea ae tabeakinai ao tao e a tia ni kitanai naba Iehova. Ai bon akea tangiran te maiu aei irou. Imwin te tai ae aki maan, I a ataia ae a boni bure au iango.” E namakina te tabeaianga ibukin taai aika a na roko, te aine ae raraoma ae Wanda are e buuraure ao e kangai: “I kakoauaa raoi bwa imwin tabeua te tai, a na aki kaotiota tangirau ma natiu aomata n ikotaki naba ma raao n te onimaki. Ma e ngae n anne, I a kona ngkai n nora korakoran nanoia taari ni kaai ni mwakuri ni boutokaira ao ni buokai ni kataia ni kaikawaia natiu bwa a na riki bwa taan taromauria Iehova.”

Ko kona n ataia mani kakarabakau akanne bwa iai tabeman aika a taonakinako n iango aika bubuaka imwin te buuraure. A kona ni karikirakea te iango ae buakaka ibukia n aron are a iangoia bwa a aikoa rangi ni manena ao a a aki riai n tabeakinaki. Irarikin anne, a kona ni moanna n tiribureia aomata ake i rarikia. A kona ni moanna n iangoia kaain te ekaretia bwa a ribuaka ao n aki nanoanga mani karaoan anne. Ma e kaotaki n rongorongoia Stanisław ma Wanda bwa a a tia naake a buuraure n ataia ae a boni kona n tabeakinaki raoi irouia tariia ma mwaaneia n te onimaki. Ni koauana, a a tia raao ni Kristian ni kaotiota aia mwamwannano ae moan te raoiroi, e ngae naba ngkana e aki namakinaki aia ibuobuoki n te moantai.

NAMAKINAN TE MAROAA N URINGAABA AO TE RIBAAKI N AKEA ATAAKINA

Uringnga bwa n aki ongea karaoan ara kabanea n tamaroa nakoia raao n te onimaki aika buuraure, ma a boni kona naba n rotaki n te maroaa n uringaaba n te tai teuana ma teuana. Ma e a moamoa riki, a kona n iangoia taari aine ake a a tia ni buuraure bwa a karako aomata aika a tangiriia. E kakoauaa anne Alicia ao e taku: “Ai wanua te ririki imwin au buuraure. Ma e ngae n anne, I bon teimatoa naba n namakinna bwa ai akea uaau. N taai akanne, I rangi ni kan tiku n tii ngai ao n tang ao n namakinna bwa I a kananoanga.”

E ngae ngkana a bati n riiriki namakin aika kabwarabwaraaki aikai iroun te aomata ae rinanon te buuraure, ma bon iai te reirei ni kairiri n te Baibara ae e riai te aomata n aki kaokoroa ma tabemwaang. Ngkana ti aki karaoa nanon te reirei ni kairiri aei, ti a kona ngkanne n rarawa nakon “te rabakau ni kabanea.” (Taeka N Rabakau 18:1, BG) Ma e riai n ota ane e namakina te maroaa n uringaaba bwa bon te bwai ni kakoaua aei ibukin te rabakau bwa e na totokoa okiokin ukeran te reirei ni kairiri ke kabebeteana mairoun temanna ae tiaki raona ni mwaane ke n aine. Mangaia are a na akea te bwai ae na kauekea rikiraken iango ni kaitaataan aika aki riai.

A kona raora n te onimaki aika buuraure n okioki ni kaaitara ma namakin aika kaminonano n ikotaki naba ma te raraoma ibukin taai aika a na roko ao namakinan te maroaa n uringaaba ke te riribaaki naba. N ataakin ae a bati n nonoraki aeka n namakin akanne ao ni kangaanga te tokanikai i aoia n te tai naba anne, ti riai ni kakairi iroun Iehova rinanon ara kakaonimaki ni boutokaia taari akanne. (Taian Areru 55:22; 1 Betero 5:6, 7) Ti kona ni kakoauaa raoi bwa a na butimwaeaki ma te nano ni kakaitau ara ibuobuoki ni kabane aika ti karaoi nakoia. Ni koauana, a na bon reke buokaia mairouia raao ni koaua i nanon te ekaretia!—Taeka N Rabakau 17:17; 18:24.