E Katikiko Te Atua Nakoina

BUKIN NANOKOKORAKIA TABEMAN: A bati aika a kakoauaa te Atua ake a a namakinna bwa a raroanako mairouna. E taku Nei Christina ae kaain Ireland are e iriri n taromauri ni katoa wiki: “I bon tii iangoia bwa te Atua ae karikii bwaai ni kabane ma I aki kinaa raoi. Akea te tai ae I a tia n namakinna iai bwa I kaan ma ngaia.”

TE REIREI MAN ANA TAEKA TE ATUA: E teimatoa ni buokira Iehova ngkana a bwara nanora. E kamataataa Iesu mwannanoara iroun te Atua n te aro aei: “Ngkana iai tebubua ana tiibu te mwaane temanna, ao e tiotionako temanna, tiaki e na kitania ake ruangauni ma ruaman i aoni maunga ao n nako ni kakaaea are e tiotionako?” Tera te reirei iai? “N aron naba anne, e aki tangiria Tamau are i karawa bwa e na bua temanna mai buakoia aika uarereke aikai.”—Mataio 18:12-14.

E rangi ni kakawaki “temanna mai buakoia aika uarereke aikai” iroun te Atua. E na kanga te Atua “ni kakaaea are e tiotionako”? Ni kaineti ma ae e mwaneweaki n te kibu ae ni moan te kaongora aei, e boni katikiia aomata Iehova nakoina.

Iangoa aron te Atua ni mwakuri ibukini katikaia aomata aika raoiroi nanoia. N te moan tienture C.E., e kanakoa te Kristian ae te tia rimwini Kristo ae Biribo te Atua bwa e na butimwaea ana kaa te I-Tiobia ae te mataniwi ao ni maroro ma ngaia ni kaineti ma nanon te taetae ni burabeti n te Baibara are e tabe ni warekia. (Mwakuri 8:26-39) Rimwi riki, e tua te Atua nakon te abotoro Betero bwa e na nakoni mwengan te mataniwi n tautia n Rom ae Korenerio, are e a tia n tatataro ao ni kakorakoraa n taromauria te Atua. (Mwakuri 10:1-48) E kairaki naba iroun te Atua te abotoro Bauro ma raona nakon te karaanga i tinanikun te kaawa ae Biribi. A kaitiboo ikanne ma “te tia taromauria te Atua” ae arana Ruria, ao “e kauka nanon neiei Iehova bwa e na butimwaei” baika taekinaki.—Mwakuri 16:9-15.

E taraia raoi Iehova n rongorongo aikai ni kabane bwa e na reke aia tai ni kinaa te koraki ake a ukoukoria. Antai ni boong aikai ake a kawari auti ao aia tabo botannaomata n tibwaa rongorongon te Atua man te Baibara? A bati aika a na kaeka ni kangai: “Bon Ana Tia Kakoaua Iehova.” Titirakiniko ni kangai: ‘E koaua bwa e kabonganaia te Atua bwa a na katikai nakoina?’ Ti kaumakiko bwa ko na tataro ni butiia te Atua bwa e na buokiko bwa ko na butimwaea ana kakorakora ni katikiko nakoina.a