Akea te Aeka ni Maiu ae Raoiroi Riki Nakon Aei

Tera ae ko kona ni karaoia bwa ko aonga ni kaan ma te Atua? Ti a tia n rinanoi aanga aikai ake ko kona ni karikirakea iai am iraorao ae kaan ma ngaia:

1. Ataa aran te Atua ao kamanena.

2. Katoatai ni maroro ma ngaia rinanon te tataro ao reiakinan ana Taeka ae te Baibara.

3. Karaoa ae e kukurei iai Iehova n taai nako.

Ngkana ko kabotoa am iango i aoni baika a riai n reke aikai, ko a kona n taekinna bwa ko karaoi baika a riai n reke ibukini kaaniam ma te Atua? Iai aroarom aika ko namakini bwa ko kona ni katamaroai? E mataata bwa e kainnanoaki te kakorakora ma iaiangoani mwia.

E taku Jennifer man te United States: “E manena am kakorakora ni kabane ibukini karikirakean am iraorao ae kaan ma te Atua. E boni karekei kakabwaia aika bati te iraorao aei: ko a onimakina riki te Atua, ko a ota raoi n aroarona, ma ae moan te kakawaki i buakon aikai, ko a tangiria riki. Akea te aeka ni maiu ae raoiroi riki nakon aei!”

Ngkana ko kani karekea am iraorao ae kaan ma te Atua, a na boni kukurei Ana Tia Kakoaua Iehova ni buokiko. A kona ni baireia bwa ko na reirei ma ngaiia n te Baibara n akea boona. Ko kaoaki naba bwa ko na ira aia bobotaki aika boto man te Baibara n aia Tabo n Taromauri n aia aono, ike ko na boni kukurei iai ni bobotaki ma naake e rangi ni kakawaki irouia aia iraorao ma te Atua.a Ni karaoan aei, ane ko na namakina are e namakinna naba te tia areru are e kangai: “E raoiroi i rou te kaania te Atua.”—Taian Areru 73:28, BG.