ATUN TE MAEKATIN | KO KONA NI KAANIA TE ATUA
Ko Namakinna Bwa Ko Kaan ma te Atua?
“Ngkana e kaan am iraorao ma te Atua, ko a namakinna bwa ko kamanoaki, e bane nanom iai ao ko tei n nene. Ko namakinna naba bwa titeboo ma e teimatoa n tarataraiko te Atua bwa a na nakoraoi bwaai ni kabane ibukim.”—CHRISTOPHER, TE ROROBUAKA MAI GHANA.
“E noriko te Atua n am tai ni maroaa ni kabane, e kaotiota tangiram ae bati riki ao ni mutiakiniko n riaon are ko kona ni butiia.”—HANNAH AE 13 ANA RIRIKI MAI ALASKA, U.S.A.
“Bon te namakin ae moan te kakawaki ao ni karaunano ataakin ae iai am iraorao ae kaan ma te Atua!”—GINA, TE AINE MAI JAMAICA AE 40 TABUN ANA RIRIKI.
Tiaki tii Christopher, Hannah ao Gina aika a namakina anne. A bati aomata ni katobibia te aonnaba aika a kakoauaa bwa e iangoia te Atua bwa raoraona. Ao ngkoe tera am iango? Ko namakinna bwa ko kaan ma te Atua? Ke ko kani kaaniko ke ni kaan riki ma ngaia? Ko bae n iango ni kangai: ‘E koaua bwa e kona n reke ana iraorao te aomata ae mangori ma te Atua ae Moan te Mwaaka? Ngkana ngaia anne, ao n te aro raa?’
KO BONI KONA NI KAANIA TE ATUA
Ni kaineti ma ae taekinaki n te Baibara, e kona n reke am iraorao ae kaan ma te Atua. E taekinaki n te Baibara bwa e atongaki te baatua are kaain te baronga ae Ebera are Aberaam iroun te Atua bwa ‘raoraona.’ (Itaia 41:8, BG) Nora naba te kakao ma te tangira n Iakobo 4:8 aei: “Kaania te Atua, ao ane e na kaaningkami.” Ngaia are e teretere raoi bwa e kona n reke te iraorao ke te reitaki ae kaan ma ngaia. Ma kioina ngkai e aki kona n noraki, ko na kangaa ngkanne ni “kaania” ao ni karekea am iraorao ae kaan ma ngaia?
Ni kaekaan te titiraki anne, iangoia bwa tera ae riki ngkana e karikirakeaki te iraorao irouia aomata. N angiin te tai, e moanaki anne mairouia aomata aika uoman ake a uaia n atai araia. Imwina, e a rikirake ngkanne aia iraorao kioina ngkai a katoatai ni maroro, a ibuokanibwai n aia iango ao aia namakin. Ao ngkana a kakorakoraia ni karaoi bwaai ibukia, e a kakorakoraaki iai aia reitaki. E kona n taekinaki ae titeboo anne ma karikirakean te iraorao ae kaan ma te Atua. Ti na noria bwa e kangaa n riki anne.