Ko Mamaroro ma te Atua?

E ngae ngkana a maroro i marenaia aomata ke a tareboon, a meeri n te intanete, n te viteo, ke te reta, ma a bon riai ni maroro n aki toki n aron aia konaa aomata aika a kaan aia iraorao. Ai ngaia are ngkana ti na kaaniaki ma te Atua, ti riai ni katoatai ni maroro ma ngaia. Ma e na kangaa ni karaoaki aei?

Ti kona n taetae nakon Iehova rinanon te tataro. Ma e kaokoro te tataro nakon te Atua ma te maroro ae manennanti ae e bae n reke ma tabonrorora. Ti riai n ataia bwa ngkana ti tataro, ti a taetae iai ma ara tia Karikiriki ae Moan te Rietata n te iuniweeti. Ti kaungaaki n aei bwa ti na tataro ma te karinerine ae bati. Ti riai naba ni kaboraoi maiura ma tuua tabeua bwa a aonga ni butimwaeaki ara tataro iroun te Atua. Aikai tenua mai buakoia.

Te moan, ti riai n tataro tii nakon Iehova ae te Atua, ma tiaki Iesu, te bouannanti ke te aomata ae aongkoa e tabu. (Te Otinako 20:4, 5) E kamatataaki n te Baibara ni kangai: “A na kaotaki ami bubutii ni bwaai ni kabane nakon te Atua n te tataro ma te kakorakora n tataro ni bubutii n raonaki n te katituaraoi.” (I-Biribi 4:6) Te kauoua, ti riai n tataro rinanon aran Natin te Atua ae Iesu Kristo. E kabwarabwaraa taekana Iesu ni kangai: “Akea ae e na nakon te Tama ma tii ane rirou.” (Ioane 14:6) Te katenua, a riai ni boraoi ara tataro ma nanon te Atua. E taekinaki ae kangai n te Baibara: “Ngkana ti bubutiia te bwai teuana ae boraoi ma nanona ao e bon ongo iroura.”a—1 Ioane 5:14.

Ni koauana, e na aki teimaan te iraorao ae kaan ngkana e a boni kakarabakau nako naba temanna. N aron ae a kukurei raao n uaia ni kakarabakau, ti riai naba ni kariaia te Atua bwa e na kataetaeira ao ti riai ni kakauongo. Ko ataia bwa tera aron te Atua ni kataetaeira?

Ni boong aikai ao e “kataetaeira” Iehova ae te Atua rinanon ana Taeka ae koreaki ae te Baibara. (2 Timoteo 3:16, 17) E aera bwa ti taekina anne? Aio kamatataana: Iangoia bwa aongkoa e roko am reta mairoun raoraom ni kaan. Imwini warekana, ko bae n ingainga ni kani kangai nakoia tabemwaang: “I a tibwa tia n ongora mairoun raoraou!” Ma e ngae n anne, bon te maroro ae a aki taetaenikawai iai, ma bon rinanon te reta. N aron naba anne, ngkana ko wareka te Baibara, ko a boni kariaia iai kataetaeam iroun Iehova. Ai ngaia are, e taku Gina are e mwaneweaki n te moani kaongora n te maekatin aei: “I iangoia bwa ngkana I tangira te Atua bwa e na iangoai bwa raoraona, I riai n nenera ana ‘reta’ nakoira ae te Baibara.” E reitia riki ni kangai: “I a tia ni kaaniaki riki ma te Atua mani warekan te Baibara ni katoabong.” Ko kariaia kataetaeam iroun Iehova n taai nako rinanoni warekan ana Taeka ae te Baibara ni katoabong? Ko na namakinna iai bwa ko a kaaniaki riki ma te Atua ni karaoan aei.