Te Koaua Bwa E Korakora Am Iraorao ma Iehova?

1. Bukin tera bwa ti riai ni kakorakoraa ara iraorao ma Iehova?

KO A TIA ni katabua maium, ni bwabetitoaki ao n riki bwa te tia Kakoaua ibukin Iehova? Ngkana ko a tia, e a reke iroum te bwai ae rangi ni kakawaki ae te iraorao ma te Atua. E ngae n anne, e kataaki n uruanaki te iraorao anne tiaki tii man ana aonnaba Tatan ma boni man rikiara naba ae te aki kororaoi. A bane naba Kristian ni kaaitara ma te aekaki aei. Mangaia are, ti riai ni kakorakoraa ara iraorao ma Iehova.

2. (a) Tera te iraorao? (Nora te kabwarabwara ae i nano.) (b) Ti na kangaa ni kakorakoraa ara iraorao ma Iehova?

² Te koaua bwa e korakora am iraorao ma Iehova? Ko kani kakorakoraa riki? E taekinaki aroni karaoana n Iakobo 4:8 ni kangai: “Kaania te Atua, ao ane e na kaaningkami.” E kona ni karaoaki aei n aanga aika uoua.a E na kaanira te Atua ngkana ti kaania moa. E na kakorakoraaki ara iraorao ma Iehova ni karaoan aei. N tokina, e na riki ara iraorao bwa te bwai ae koaua raoi iroura. Ti kona ni karekea iroura te aki nanokokoraki are e reke iroun Iesu ngke e kangai: “E boni koaua teuare e kanakomaiai, ao . . . I ataa ngai teuarei.” (Ioa. 7:28, 29) Baikara aanga aika ko kona ni karaoi bwa ko na kaaniaki riki iai ma Iehova?

3. Tera ae na kanakoraoa reitakira ma Iehova?

³ Te anga teuana ae kakawaki ibukini kaaniakira riki ma Iehova bon te katoatai n reitaki mangaia. Ko na kangaa n reitaki ma te Atua? Ko na kangaa n reitaki ma raoraom ae ko raroanako mangaia? Ko na bon bae ni katoatai ni kororeta ao n tareboon mangaia. Ti maroro ma Iehova rinanon te katoatai n tataro nakoina. (Wareka Taian Areru 142:2.) Ngkana ko katoatai ni wareka ana Taeka ao ni kananoa am iango iai, ko a kariaia iai bwa e na taetae Iehova nakoim. (Wareka Itaia 30:20, 21.) Ti na nori aanga aika uoua ake ti kona n reitaki iai ma Iehova ibukini kakorakoraan ara iraorao mangaia, bwa e aonga n riki bwa raoraora ni koaua.

E TAETAE IEHOVA NAKOIM N REIAKINAN TE BAIBARA

4, 5. E kangaa n taetae Iehova nakoim rinanon Ana Taeka? Aanga te katoto.

⁴ Ti kakoauaa bwa te Baibara bon ana rongorongo te Atua ibukia aomata nako. E koaua bwa e taekinaki n te Baibara arom ae ko kona iai ni kaaniaki riki ma Iehova? E boni koaua. Ni kangaa? Ngkana ko katoatai ni warekia ao n reiakinna, n iaiangoa te baere e taekinaki iai ao arom ni kamanenai, ko a kariaia iai bwa e na taetae Iehova nakoim. E na kaaniaki riki am iraorao mangaia ni karaoan aei.—Ebera 4:12; Iak. 1:23-25.

⁵ Te katoto, wareka ao kananoa am iango i aon ana taeka Iesu ae kangai: “Katoka kaikoan ami bwai aika kakawaki i aon te aba.” Ngkana ko namakinna bwa ko a tia ni kabanea maium ibukin te Tautaeka n Uea, ko a kamoamoaaki iai iroun Iehova. N te itera are teuana, ngkana ko noria bwa ko kainnanoa kabebeteani maium ao ni kaatuua riki am beku ibukin te Tautaeka n Uea, e a kauringko iai Iehova bwa te itera raa ae ko riai ni kekeiaki iai bwa ko aonga ni kaaniko riki mangaia.—Mat. 6:19, 20.

6, 7. (a) E kangaa n rotaki ara tangira ibukin Iehova ao tangirara irouna man reiakinan te Baibara? (b) Tera ae ti uaiakinna ni karaoan ara reirei i bon iroura?

⁶ Ngkana ti reiakina te Baibara, ti a buokaki iai ni katamaroai riki arora n te itera n taamnei. E buokira naba bwa ti na karababaa riki ara kakaitau n aroaron Iehova aika raraoi are ti a kairaki iai bwa ti na tangiria riki. Ngkana e a rikirake tangiran te Atua iroura, e na kairaki iai bwa e na tangirira riki, are nanona bwa e a rangi ni matoa reitakira mangaia.—Wareka 1 I-Korinto 8:3.

⁷ Ngkana ti na kaania Iehova, e kakawaki bwa ti na reiakina ana taeka ni kaineti ma bukina ae eti. E kangai Ioane 17:3: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” Ngaia are, ti aki riai n tii karekea te atatai ma ti riai naba ni karekea ‘ataakin’ Iehova n aron ae bon te Aomata.— Wareka Te Otinako 33:13; TaiAre. 25:4.

8. (a) Tera te raraoma ae kona n reke man te baere e karaoia Iehova nakon te Uea are Ataria n aron ae kabwarabwaraaki n 2Uea 15:1-5? (b) Bukin tera ngkai kinaakin Iehova e kairira bwa ti na aki raraoma ni baike e karaoi?

⁸ Ngkana ti a kinaa riki Iehova ao ni kaaniaki riki mangaia, ti na bon aki raraoma ngkana e aki kabwarabwaraaki raoi n te Baibara ana mwakuri ake e karaoi. Te katoto, tera arom ni butimwaea te baere e karaoia Iehova nakon Uean Iuta are Ataria? (2Uea 15:1-5, BG) E ngae ngke “a anganga nako naba karea aomata ma ni kakabuoki karea aika boiarara n taabo ake a rietata,” ma “e kakaraoa ae riai i matan Iehova” Ataria. Ma, “e orea te uea Iehova, ao e riki n rebera ni karokoa ana bong ni mate.” Bukin tera? E aki taekinaki anne n te rongorongo. E riai n aki rau nanora ke ni mimi ngke e orea Ataria Iehova n akea raoi bukina? E aki riai n riki anne ngkana ti atai ana kawai nako. E irekereke naba ma ataakin ae e tauraoi n anganiko te reirei ni kaetieti ae “te motikitaeka ae riai.” (Ier. 30:11, BG) Ti a buokaki n anne bwa e ngae ngke ti aki ataa bukin te baere e karaoia Iehova nakon Ataria, ma ti bon onimakinna bwa e eti Ana motikitaeka.

9. Baikara rongorongo ake ti buokaki iai n ataa bukini katuuaaean Ataria n te rebera iroun Iehova?

⁹ Ibukin aei, a kona n tauraoi rongorongo tabeua n te Baibara ibukira. E aranaki naba te Uea ae Ataria bwa te Uea ae Utia. (2Uea 15:7, 32) Ti reiakina te rongorongo ae titeboo ma aei n 2 Rongorongo 26:3-5, 16-21 (BG), bwa e ngae ngke e raoiroi Utia i matan Iehova ma imwina ao e a manga “karietataki nanona, ao e karaoa ae buakaka iai.” E kaota te aki karinerine ngke e karaoi mwakuri ake a tii kariaiakaki ibonga ni karaoi. E kaitaraaki irouia waningaun ma temanna ibonga ake a kakorakoraia ni kaetia. Tera aron Utia ni butimwaea kaetana? E kaota raoi arona ni kamoamoa. E “un” nakoia ibonga. Maroaka are e a boni katuuaaeaki n te rebera iroun Iehova!

10. Bukin tera bwa ti aki riai n titiraki ibukini baike e karaoi Iehova, ao ti na kangaa ni kateimatoa onimakinan ana mwakuri aika raoiroi?

¹⁰ Tera reireiara ae kakawaki? Iangoia bwa tera ae na riki ngke arona bwa a aki bane ni kabwarabwaraaki rongorongo man te Baibara? Ko na titiraki bwa e bon eti te bae e karaoia Iehova? Ke tao ko iangoia bwa a bon tau rongorongo man te Baibara are ko a kakoauaa iai bwa e kakaraoa ae eti Iehova? (TuaKau. 32:4) Ngkana ti a kinaa riki Iehova n aron ae bon te Aomata, e na rikirake tangirana ao onimakinana iroura n te aro ae ti aki kainnanoa kabwarabwaraani baike e karaoi. Ko na kaaniaki riki ma Iehova ngkana ko reiakina ana taeka ao ni kananoa am iango iai. (TaiAre. 77:12, 13) N te aro anne, e na kakorakoraaki riki am iraorao ma Iehova ao ko na kaaniaki riki mangaia.

KO TAETAE MA IEHOVA N TE TATARO

11-13. Ti kangaa n ataia bwa e bon ongoraei tataro Iehova? (Nora te taamnei ni moan te kaongora aei.)

¹¹ Ngkana ti tataro ao ti a kaaniaki riki iai ma Iehova. Ti neboia iai, ti karabwaa iai ao ti bubutiia ibukin ana kairiri. (TaiAre. 32:8) Ngkana ko tangiria bwa e na kaan am iraorao ma Iehova, ko riai ni kakoauaa bwa e bon ongoraei am tataro.

¹² A kakoauaa aomata tabeman bwa te tataro bon tii ibukini kabebetean te iango. A taku naba bwa ngkana ko iangoia bwa e kaekaaki am tataro, e riki anne ngkana ko bunra nanom, ko taekin raoi am kangaanga ao ko kaatuua am iango i aoni karekean te ibuobuoki. Irarikini kakabwaia aika rereke iroum, ko kangaa n ataia bwa e bon ongoraei Iehova am tataro aika nako mai nanom?

¹³ Iangoa aei: Ngke e maiu Iesu i karawa imwain rikina n aomata, boni ngaia ae moan nora Iehova ni kaekai aia tataro Ana toro aika aomata. E kabongana te tataro Iesu ni maroroakina iai ana namakin ma Tamana are i karawa ibukin ana mwakuri ni minita i aon te aba. Ngkana e iangoia Iesu bwa e aki ongoraeaki ana tataro iroun Iehova, e na kabanea ana tai n tataro ni kangainaa? (Ruka 6:12; 22:40-46) Ngkana e iangoia bwa te tataro bon tii ibukini karauan te nano, e na reireinia ana abotoro? E mataata raoi bwa e ataa kakawakin te tataro Iesu bwa bon te anga ni maroro ma Iehova. N te tai teuana, e taku Iesu: “Tamau, I kaitauko ngkai ko ongo irou. I ataia bwa ko bon ongongo irou.” Ti kakoauaa naba bwa bon Iehova ae “ongo tataro.”—Ioa. 11:41, 42; TaiAre. 65:2, BG.

14, 15. (a) Ti na kangaa ni kakabwaiaaki ngkana ti taekina raoi te bwai ae ti kainnanoia n ara tataro? (b) E kangaa ni buokaki te tari te aine temanna man ana tataro bwa e na kaaniaki riki ma Iehova?

¹⁴ Ngkana ko taekina raoi te bwai ae ko kainnanoia n am tataro, ko bae ni kan ataa ana kaeka Iehova e ngae ngkana e iremwe. Ti kakoauaa bwa iai Iehova ngkana e kaekai ara tataro. Irarikin anne, ti a kaaniaki riki ma Iehova ngkana ti bunra raoi nanora nakoina.

¹⁵ Iangoa rongorongon Nei Kathy.b E aki unga nanona n te mwakuri ni minita, e ngae ngke e katoatai n iriria. E kabwarabwaraa ni kangai: “I aki tangira te uarongorongo. Ae I nanonna iai bwa I bon aki tatangiria. Ngke I a ritaea man au mwakuri, e tuangai te unimwaane temanna bwa I kona n riki bwa te urekura bwaiania, ao e bon anganai naba te booma. I a motikia bwa N na bwaiania, ao I a katoabong n tataro nakon Iehova bwa I aonga n tangira te mwakuri ni minita.” E kaekaaki ana tataro iroun Iehova? E taku: “Ai au katenua n ririki ngkai ni bwaiania. Imwini kabanean au tai ae mwaiti n te mwakuri ni minita ao n reirei mairouia taari aine tabemwaang, I a rikirake ni mwaatai n te uarongorongo. Ngkai I a aki ti tatangira te mwakuri ni minita ma e a bon rangi ni mamate nanou iai. Ma ae kakawaki riki, e a rangi ni kaan au iraorao ma Iehova nakon are mai imwaina.” Ni koauana, e buokaki Nei Kathy man ana tataro bwa e na kaan riki ana iraorao ma Iehova.

KARAOANI MWIOKOARA

16, 17. (a) Tera ae ti riai ni karaoia bwa ti aonga ni kateimatoa ara iraorao ma Iehova? (b) Tera ae e na maroroakinaki n te kaongora are i mwina?

¹⁶ E kona n rikirake ara iraorao ma Iehova n uaa tokini maiura. Ti riai n teimatoa ni kaania ngkana ti tangiria bwa e na teimatoa n tataetae nakoira. Ngaia are, ti bia kateimatoa ara maroro ma Atuara rinanon reiakinan te Baibara ao te tataro. Ibukin anne, ti a kona ni buokaki n tokanikai i aoni kataakira ngkana e rikirake ara iraorao ma Iehova.

¹⁷ E ngae ngke ti kakorakoraira n tataro, ma ti bon teimatoa naba ni boo ma kangaanga. E kona n rotaki onimakinan Iehova iroura ngkana ti kaaitara ma kangaanga. Ti kona n iangoia bwa e a aki ongoraei ara tataro Iehova ke ti a aki riki bwa raoraona. Tera ae ko riai ni karaoia ngkana ko iangoa anne? E na kabwarabwaraaki aei n te kaongora are i mwina.