“Manga Rairaki Imwin Am Kairua, ao Ko na Kakorakoraia Tarim”

E KORAKAI n tang Betero imwin taekinan te kewe ni kaineti ma kinaakin Iesu. E ngae ngke e riai ni kabokorakora te abotoro ni manga kaoka korakoran ana onimaki, ma e bon tangiria Iesu bwa e na kamanena ibukini buokaia aomata. Mangaia are e a taku Iesu nakoina: “Ngkana ko a manga rairaki imwin am kairua, ao ko na kakorakoraia tarim.” (Ruka 22:32, 54-62) E a riki Betero bwa temanna mai buakoia bouan te ekaretia ni Kristian n te moan tienture. (I-Karatia 2:9) N aron naba anne, e kona te mwaane are e beku ngkoa bwa te unimwaane n te ekaretia ni manga karaoa te mwioko anne ao ni karekea te kimwareirei ngkana e kakorakoraia n te aro n taamnei raao n te onimaki.

Iai tabemwaang ake a a tia ni beku ngkoa bwa mataniwi aika a kamwawaaki mani mwiokoaia, ao e kona te aro anne ni kairiia bwa a na namakinna ae a kabwaka. E taku Julio,a are e beku bwa te unimwaane n te ekaretia i Bolivia i Amerika Maiaki n te maan ae raka i aon 20 te ririki: “Ai boni batira au tai ae I kabanea ni maiu ni katauraoani kabwarabwara, kawaraia taari, ao kawakinaia kaain te ekaretia! Ngke e a karina ni bua mwiokoau aei, I a tiku n akea te bwai ae I karaoia ke tii teutana. Bon taai ni kauruakinano taai aikai ni kabane.” E a manga beku bwa te unimwaane Julio ni boong aikai.

“KAM NA RANGI NI KIMWAREIREI”

E korea ae kangai te tia rimwini Kristo ae Iakobo “Tariu, kam na rangi ni kimwareirei ngkana kam kaaitara ma kataaki aika kakaokoro.” (Iakobo 1:2) E bon taekini kataaki ake a riki Iakobo man te bwainikirinaki ao aki kororaoira. E mwanewea te kaibwabwaru, kaotiotan te inanonano ao a a bati riki. (Iakobo 1:14; 2:1; 4:1, 2, 11) Ngkana e anganira te reirei ni kaetieti Iehova, ti kona n namakina kammarakina. (Ebera 12:11) Ma a aki riai n iraeaki kimwareireira man aeka ni kataaki akanne.

E ngae naba ngkana ti a tia ni kamwawaaki mani mwiokoara n te ekaretia, ma ti teimatoa ni karekei ara tai n tuoi korakoran ara onimaki ao ni kaotiota tangiran Iehova. Ti kona naba n iaiangoia bwa e aera ngkai ti beku. Ti beku ibukini kakabwaiaara ke ti kairaki bwa ti na uaiakin aeka ni mwioko akanne ibukin tangiran te Atua, ao kakoauaan ae bon ana bwai te ekaretia ao ti riai ni kawakinna raoi? (Mwakuri 20:28-30) Ibukina bwa a kimwareirei ni waakinaanako aia beku ae tabu unimwaane n te ekaretia ngkoa, a a boni kaotia iai nakoia aomata nako n ikotaki naba ma Tatan, koauan tabuni mwiokoaia ao tangiran Iehova ma nanoia ni koaua.

Ngke e anganaki te reirei ni kaetieti te Uea ae Tawita ibukin ana bure aika kakaiaki, e boni butimwaea boaakina ao e kabwaraaki ana bure. E anene ni kangai: “E a kabaia ane e kabaraki ana bure, ane e rabunaki ana buakaka. E a kabaia te aomata ane aki kabuakakaki iroun Iehova, Ane akea naba te mamana te aba i nanon tamneina.” (Taian Areru 32:1, 2, BG) E boni katamaroaaki maiun Tawita n te reirei ni kaetieti ao akea te nanououa bwa e a riki iai bwa te tia kawakinia ana aomata te Atua ae raoiroi riki.

N angiin te tai, ao taari mwaane ake a a manga rairaki imwin aia kairua ni beku bwa unimwaane n te ekaretia, a a bon riki bwa taani kawakintiibu aika raoiroi riki nakon aroia ake mai imwaina. E taku temanna te unimwaane n te ekaretia: “I a ota riki ngkai n aron tararuaaia naake a karaoa ae kairua.” E taku te unimwaane riki temanna: “E a rangi ni kakawaki riki ngkai mwiokoau ae te beku ibukia taari.”

KO KONA NI MANGA RAIRAKI IMWIN AM KAIRUA?

E korea ae kangai te tia areru: “Ane E na aki boaa te aba [Iehova] n aki toki.” (Taian Areru 103:9, BG) Ai ngaia are ti aki riai n iangoa te Atua, bwa e na aki manga onimakina te aomata ae e a tia ni karaoa te bure ae kakaiaki. E taku Ricardo are e kamwawaaki mani mwiokoana ae te unimwaane n te ekaretia imwini bekuna iai i nanon ririki aika bati: “I rangi n un ibukini kabwakau. Inanon te tai ae maan, e a tukai namakinani kabwakau bwa N na manga rairaki imwin au kairua ao ni beku bwa te mataniwi ibukia taari. I aki koaua raoi ae I kona ni manga kaotia bwa I bon riai n onimakinaki. Man te tai are I buokiia iai tabemwaang kioina ngkai I kimwareirei , I a kona ni kairi reirei n te Baibara ma aomata, I kaungaia taari n te Tabo n Taromauri, ao n uarongorongo ma ngaiia n te mwakuri ni minita. I boni buokaki n anne bwa N na manga onimakinaki ao ngkai I a manga beku bwa te unimwaane n te ekaretia.”

E kona ni katotonakoaki te tari te mwaane man te beku n unimwaane ngkana e kaiboa unna. Ai batira raoiroin riki katotongan ana toro Iehova ae Tawita are e rawea maiuna mai nanoni bain te Uea are Tauro are e bakantang! E aki kani kabooa mwin ana mwakuri Tauro, e ngae naba ngke e a angaraoi karaoana. (1 Tamuera 24:4-7; 26:8-12) Ngke e mate Tauro ao e bon tanginiweneia Tawita, ao e taekinna ma natina are Ionatan bwa aomata aika a ‘bati n tangiraki ao a kakukureia te aba.’ (2 Tamuera 1:21-23, BG) E bon aki kaiboa unna Tawita.

Ngkana ko aitara ma te bwai ae ko aki ota raoi iai ke te ribuaka, tai kariaia te un bwa e na tokanikai i aon am iango. N te katoto, ngke e kamwawaaki William mani mwiokoana ae te unimwaane i nanon tao 30 te ririki i Buritan, e bon un irouia tabeman unimwaane n te ekaretia. Tera are buokia bwa e na manga rairaki man unna? E taku: “I kaungaaki ngke I wareka te boki ae Iobi. Ngkana ngaia bwa e buokaki ngkoa Iobi iroun Iehova bwa e na karekea te rau ma raona ake teniman, ai batira riki ngkanne buokau iroun te Atua bwa N na karekea te rau ma unimwaane n te ekaretia aika Kristian!”—Iobi 42:7-9.

E KAKABWAIAIA TE ATUA AKANA A MANGA BEKU BWA TAANI KAWAKINTIIBU

Ngkana ko iangoia bwa ko na kitana te beku ae te tia kawakina ana nanai te Atua, ko karaoa ae riai ngkana ko iango moa bwa e aera ngke ko karaoa anne. Ko a taonakinako n am kangaanga? A a moanna ni manga kakawaki riki bwaai tabeua ni maium? E bwara nanom ibukin aki kororaoia tabemwaang? E ngae ngkana tera ae riki nakoim, ma uringnga ae ko tauraoi ni buokiia aomata n aanga aika bati riki ngke ko beku bwa te unimwaane n te ekaretia. A boni kakorakoraaki n am kabwarabwara nako, a kaungaaki man am katoto ao a buokaki n arom ni kawariia ni mwengaia bwa a na nanomwaaka i aani kataakia. Ko kakukureia nanon Iehova n am mwakuri ngkai ko riki bwa te unimwaane ae kakaonimaki ao ko boni kakukureiko naba.—Taeka N Rabakau 27:11.

E a tia Iehova ni buokiia mwaane bwa a na manga oki kimwareireia ao nanoia ni kani kaira te waaki n te ekaretia. Ngkana arona bwa ko kamwawaaki man te beku n unimwaane ke ko a kamwawaaki, ko boni kona naba n “ukoukora te kan riki bwa te mataniwi.” (1 Timoteo 3:1) E “aki toki n tataro” Bauro bwa a na kaonaki Kristian ake i Korote n te atatai ae eti ibukin ana kantaninga te Atua bwa a “aonga n nakonako n te aro ae tau i matan Iehova ni karekea iai kakukureiana ni bwaai ni kabane.” (I-Korote 1:9, 10) Ngkana ko a manga mwiokoaki bwa ko na beku bwa te unimwaane, onimakina Iehova bwa e na anganiko te korakora, te taotaonakinnano ao te kimwareirei. Ni kabaneani boong aikai, a boni kainnanoa boutokaan aia onimaki ana aomata te Atua mairouia taani kawakintiibu aika tatangira. Ko kona ni karaoa anne ao n tauraoi ni kakorakoraia tarim?