ATUN TE MAEKATIN | BON IAI TATAN?
Bon Iai Tatan?
“I ikawairake i El Salvador ao ngkana I aki ongeaba, ao e taku tinau nakoiu, ‘E nang roko te Riaboro n anaiko!’ Ao I kabooa ni kangai, ‘Ke e nako mai!’ I kakoauaa te Atua ma tiaki Tatan.”—ROGELIO.
E boraoi am iango ma Rogelio? E nga mai buakoni baikai ae e taraa n eti iroum?
Bon akea Tatan bwa bon tii te bwai ae tei ibukin te buakaka.
Iai Tatan ma e aki bati n tabeakinia aomata.
Tatan bon te taamnei ae mwaaka ae korakora ana kariri nakoia aomata.
Iai boutokaan iango akanne, aika tao mirion ma mirion mwaitiia. Ma e koaua bwa e kakawaki bwa te iango raa ae eti? Noria bwa ngkana akea Tatan, a a boni mwamwanaaki naake a kakoauaa bwa iai. Ngkana iai Tatan ma e aki tabeakinia aomata, a a bati aika akea bukini kawakinaia mairouna ke maakakina. Ma ngkana te tia kewe Tatan ae kairaraangia aomata, e a boni karuanikai riki nakon are a iangoia angiia aomata.
Ti na neneri kaekaan titiraki aikai n te Koroboki ae Tabu: Tera ke antai Tatan, bon te bwai ae tei ibukin te buakaka ke te aomata ae te taamnei? Ngkana bon te aomata Tatan, ko na ruanikai irouna? Ngkana e koaua anne, ko na kangaa ni kamanoko mairouna?