E Moanaki n Ningai Ana Tautaeka n Uea te Atua?​—Mwakoro 2

MIIN NEBUKANETA​—TE KAURING AE KIMOTOTO

Cameron: I kukurei ni manga kaitiboo ma ngkoe, Jon. I rangi ni kukurei n ara tai n reirei n te Baibara ni katoa wiki.a Ko uara moa?

Jon: Ko rabwa, I marurung.

Cameron: I kukurei n ataia bwa ko marurung. N rokou are nako ao ti maroroakinna bwa e aera ngkai a taekinna Ana Tia Kakoaua Iehova ae e moanaki Ana Tautaeka n Uea te Atua n 1914.b Ngke ti maroro, ti nora te bwai ni kakoaua ae kakawaki n te taetae ni burabeti ni mwakoro 4 ni bokin te Baibara ae Taniera. Ko uringa te bwai are e koreaki iai?

Jon: Boni miin te Uea are Nebukaneta ae taekan te kai ae totoakaei.

Cameron: Eng boni ngaia raoi. Ni miin Nebukaneta, ao e nora te kai ae rangi n totoakaei are e mataata raoi bwa e rota karawa. E ongo bwa e tua ana tia uarongorongo te Atua bwa e na koreaki te kai anne ni kabwakaaki, ma e na katukaki botona ma wakaana. Imwin te tai ae maanna “itiua te tai,” e na manga rikirake te kai anne.c Ti maroroakinna naba bwa bukin tera ngkai uoua kakororaoan te taetae ni burabeti anne. Ko uringnga bwa tera ngkoa moani kakoroani bukina?

Jon: Bon te bwai ae riki nakon Nebukaneta, e eti anne? E boni bua nanowanawanana i nanon itiua te ririki.

Cameron: Boni ngaia raoi. E bua nanowanawanan Nebukaneta n te tai ae kimototo ai ngaia are e a toki moa ana tautaeka. Ma nanon te taetae ni burabeti anne ae kakawaki riki, e na bon toki ana tautaeka te Atua i nanon te maan ae itiua te tai. N aron ae ti noria, e moanaki te tai ae itiua ngke e uruakaki Ierutarem n 607 B.C.E. Ni moa man te tai anne ni karokoa ngkai, bon akea riki te uea i aon te aba ae e tei ibukin Iehova ae te Atua n tautaekania ana aomata. Ma e ngae n anne, n tokin taai ake itiua, e na bon rinea te tia Tautaeka ae boou i aoia ana aomata mai karawa. N taeka riki tabeua, e na kanikinaeaki moanakin Ana Tautaeka n Uea te Atua i karawa n tokin itiua te tai. Ti a tia ni maroroakina ngkai moanakin taai aika itiua akanne. Ai ngaia are ti a kona n ataia bwa maanra taai akanne, ao ngkanne ti a ataa te tai are e moanaki iai Ana Tautaeka n Uea te Atua. Ko ota ni baika I a tia ni maroroakin?

Jon: Eng, I buokaki n te kauring aei bwa N na aki mwaninga mwin ara reirei.

Cameron: E rangi n raoiroi anne. Ti na moana ara maroro ao imwina ti a manga iangoi abwakin taai aika itiua. I a tibwa tia ni wareka te kaongora aei ni kabane bwa I aonga n uringi baika kakawaki iai. N na kataia ni kabwarabwarai n aron au kabanea ni konaa.

Jon: Ngaia ngkoe.

TOKIN TAAI AIKA ITIUA BONI MOANAKINI KABANEANI BOONG

Cameron: Ni moani kakoroani bukin te taetae ni burabeti are e irekereke ma Nebukaneta, e teretere raoi bwa taai ake itiua bon itiua raoi te ririki. Ma ni kakoroani bukina ae kakawaki riki are irekereke ma Ana Tautaeka n Uea te Atua, a riai ni maan riki taai ake itiua nakon ae tii itiua te ririki.

Jon: Bwaau?

Cameron: Bukina teuana, uringnga bwa a moanaki taai aika itiua ngke e uruakaki Ierutarem n 607 B.C.E. Ngkana ti moana warebwaiana man te ririki anne, e na karokoira itiua raoi te ririki anne n 600 B.C.E. Ma bon akea te bwai ae kakawaki ae riki n te tai anne ni kaineti ma ana tautaeka te Atua. Irarikin anne, n aron are ti maroroakinna mai mwaina, n ririki aika bati imwina ngke e a mena Iesu ikai i aon te aba, e boni kaotia ae a tuai n toki taai ake itiua akanne.

Jon: Aa eng. I a uringa anne ngkai.

Cameron: Mangaia are n oneani mwini mwaitin raoi te ririki, a bae n irekereke taai aika itiua ma te tai ae maan riki.

Jon: Maanra?

Cameron: E irekereke raoi bokin te Baibara ae Te Kaotioti ma Taniera, ao e buokira n ataa raoi abwakin te tai ae itiua te tai. E bon tei ibukin te tai ae maanna tenua ma te iterana ae titeboo ma 1,260 te bong.d Ai ngaia are itiua te tai titeboo ngkanne ma uoua te tai okiokin tenua ma te iterana ao e a uotira nakon 2,520 te bong. E ota te bwai ae I maroroakinna?

Jon: Eng, I a ota. Ma I aki ataia bwa e a kangaa naba ni kaotaki iai moanakin Ana Tautaeka n Uea te Atua n 1914.

Cameron: Ngaia, ti na noria bwa ti boni kona ni kairekerekea. N tabetai, e taekinaki n te taetae ni burabeti n te Baibara bwa e tei te bong ibukin te ririki.e Ngkana ti ira te tua are e tei teuana te bong ibukin teuana te ririki, nanona ngkanne bwa itiua te tai e na karokoira n 2,520 te ririki. Ngkana ti warebwaia rake man 607 B.C.E. ni karokoa 2,520, ti a roko ngkanne n te ririki ae 1914.f Anne aron reken te ware ae 1914 bwa bon te ririki are a a toki iai taai aika itiua, ao e a moana naba Ueana iai Iesu n Ana Tautaeka n Uea te Atua. Ao e rangi ni kakawaki te ririki ae 1914, bwa a riki iai baika a kokorakora n te aonnaba n aron are a taetae ni burabetinaki n te Baibara bwa bwaai ni kakoaua ibukini kabaneani boong.

Jon: Baikara bwaai akana riki akanne?

Cameron: Iangoa te bwai are e maroroakinna Iesu ae koreaki ikai ni Mataio 24:7. E taku Iesu ni kaineti ma te tai are e na moana iai ana tautaeka i karawa: “E na teirake te botannaomata teuana ni buakana te botannaomata teuana, ao te tautaeka teuana ni buakana te tautaeka teuana, ao a na roko roongo ma mwaeiein te aba n te tabo teuana ma teuana.” Noria bwa e taetae ni burabeti Iesu ibukin roongo ao mwaeiei n te tai anne. Ni koauana, a bati mai buakoni kangaanga akanne aika a a tia n noraki n ara aonnaba n te tienture ae nako ke a tuai?

Jon: E koaua anne.

Cameron: N te kibu aei ao e taetae ni burabeti Iesu ibukin te buaka n okina ma tikuna bwa te Uea n Ana Tautaeka n Uea te Atua. Ao e taetae ni burabetinaki ni bokin te Baibara ae Te Kaotioti tiaki tii te buaka n te aba teuana, ma boni buaka ake a na rotakibuaka iai kaain te aonnaba ni kabane n tain te toki.g Ko uringnga bwa e boo n ningai te moani buaka n te aonnaba?

Jon: E riki anne n 1914, ae titeboo ma te ririki ane ko taekinna bwa e moana iai ana tautaeka Iesu! I tuai man iangoa irekereken anne ma te ririki ae 1914.

Cameron: Ngkana ti tomatomai mwakoro n rongorongo aikai ni kabane, e na bon eti raoi iai te taetae ni burabeti ibukin taai aika itiua, n ikotaki naba ma taetae ni burabeti n te Baibara riki tabeua ibukin tain te toki. A boni kakoauaa raoi Ana Tia Kakoaua Iehova bwa e moana ana tautaeka Iesu bwa te Uea n Ana Tautaeka n Uea te Atua n 1914, ao a moanaki naba kabaneani boong n te ririki anne.h

Jon: I tabe ngkai ni karerekea otau i aon aei ni kabane.

Cameron: I rangi n ota n anne. N aron are I taekinna mai mwaina, I a bon tibwa ota raoi imwin te tai ae maan. Ma te bwai ae kakawaki riki, au kantaninga bwa e a reke buokam n ara maroro bwa ko a ota bwa e ngae ngke e aki mwaneweaki raoi te ririki ae 1914 n te Baibara, ma a boni kabotoi aia koaua Ana Tia Kakoaua Iehova iai ibukin te ririki anne.

Jon: Eng, e anaaki nanou iroum n taai nako bwa ko boni boutokai baika ko taekini man te Baibara, bwa akea ae ko taekinna tii man am iango. Ma I tabe n iangoa bukina ngkai e rangi ni kangaanga te ota n aei. Bukin tera bwa e aki tii tuangira te Atua n te Baibara bwa te ririki ae 1914 bon te ririki are e na moana iai ana tautaeka Iesu i karawa?

Cameron: Bon te titiraki ae rangi n raoiroi anne, Jon. Ni koauana, a bati bwaai aika aki kaotaraeaki nanoia n te Baibara. Mangaia are bukin tera bwa e aki koreia te Atua n te Baibara n te aro ae e na kai ota? Tao ti kona ni maroroakina anne ngkana I a manga oki.

Jon: I kukurei n anne.