Ti Riai n Tataro Nakon Iesu?

A KARAOA aia ukeuke taani kakaae n taai aika tibwa nako i aoia rooro n rikirake man Aaro aika bati ake e raka i aon 800 mwaitiia. A bon titirakinia bwa a kakoauaa ke a aki ae e kaekai tataro Iesu. E raka i aon 60 te katebubua ake a matoa aia kaeka bwa e boni kaekai. Ma e ngae n anne, iai temanna mai buakoia are e katikimataa aran Iesu ao e onea mwina n “te Atua.”

Tera ngkoe am iango? Ti riai n tataro nakon Iesu ke te Atua?a Ibukin ukerani kaekaana, ti na iangoa moa aron Iesu ngke e reireinia taan rimwina n tataro.

E REIREINIRA IESU BWA TI NA TATARO NAKON ANTAI?

E reireinira Iesu ao e kaota naba teuare ti riai n tataro nakoina.

ANA REIREI: Ngke e butiia Iesu temanna te tia rimwina ni kangai, “Te Uea, reireinira n tataro,” ao e kaeka Iesu ni kangai: “Ngkana kam tataro ao kangai, ‘Tamara.’” (Ruka 11:1, 2) N ana Kabwarabwara i aon te Maunga ae rangi n ataaki, e boni kaumakia naba naake a ongora bwa a na tataro. E taku: ‘Tataro nakon Tamami.’ E karau nanoia naba ngke e kangai: “E a kaman atai baika kam kainnanoi te Atua ae Tamami, imwain ae kam butiia.” (Mataio 6:6, 8) N ana kabanea n tairiki Iesu i aon te aba, e tua ae kangai nakoia taan rimwina: “Ngkana kam butiia te Tama te bwai teuana n arau, ao ane e na anganingkami.” (Ioane 16:23) Ai ngaia are e reireinira Iesu bwa ti na tataro nakon teuare Tamana ao Tamara naba ae Iehova ae te Atua.—Ioane 20:17.

ANA KATOTO: E boni kaboraoa arona n tataro Iesu ma are e reireinia iai aomata. E tataro ni kangai: “I karaoiroiko Tamau ae Ueani karawa ma aonnaba i mataia aomata.” (Ruka 10:21) N te tai teuana riki, “e tararake Iesu nako karawa ao e taku: ‘Tamau, I kaitauko ngkai ko ongo irou.’” (Ioane 11:41) E tataro ni kangai Iesu ngke e nangi mate: “Tamau, I mwiokoa taamneiu i nanoni baim.” (Ruka 23:46) Ngke e tataro Iesu nakon Tamana are i karawa ae “Ueani karawa ma aonnaba,” e a boni katea iai te katoto ae mataata nakoia aomata nako are a na kakairi iai. (Mataio 11:25; 26:41, 42; 1 Ioane 2:6) E koaua bwa anne aron otaia taan rimwin Iesu rimoa n ana kaetieti?

A TATARO NAKON ANTAI KRISTIAN AKE RIMOA?

Inanon wiki ake e a okira iai karawa Iesu, a a boni karawawataaki ao ni bwainikirinaki taan rimwina irouia taani kaaitaraia. (Mwakuri 4:18) Ni koauana, a bon tataroa buokaia ma antai ngkanne are a tataro nakoina? “A katiteuanaaki n tataro nakon te Atua,” bwa e na teimatoa ni buokiia ‘rinanon aran ana toro ae tabu ae Iesu.’ (Mwakuri 4:24, 30) A bon toua raoi mwin ana tua Iesu taan rimwina ni kaineti ma te tataro. A tataro nakon te Atua ma tiaki Iesu.

N ririki ake imwina, e kabwarabwaraa aroia n tataro te abotoro Bauro ma raoraona. E taku ngke e koroboki nakoia raona ni Kristian: “Ti aki toki ni kaitaua te Atua ae Taman ara Uea ae Iesu Kristo ngkana ti tataro ibukimi.” (I-Korote 1:3) E koreia naba Bauro nakoia raona n onimaki bwa e na ‘katituaraoaki n taai nako Atuara ae Tamara ibukini bwaai ni kabane n aran ara Uea ae Iesu Kristo.’ (I-Ebeto 5:20) Ti noria n taeka aikai bwa e kaungaia tabemwaang Bauro bwa a na tataro nakon ‘Atuana ae Tamana ibukini bwaai ni kabane,’ ma ni koauana, bon rinanon aran Iesu.—I-Korote 3:17.

N aroia Kristian ake rimoa, ti kona naba ni kaotiotii ara tangira ibukin Iesu rinanoni mutiakinan ana taeka n reirei ibukin te tataro. (Ioane 14:15) Ngkana ti tataro nakon Tamara are i karawa n tii ngaia, ti na rangi ni kakoauai riki taeka aika n Taian Areru 116:1, 2, (BG) aikai: “I tangira Iehova, ngkae E ongo Bwanau . . . N na weteia n ua tokini maiuu.”b