Titiraki Aika Kaekaaki Man Te Baibara
Tera ae kairiia aomata aika bati bwa a na iangoia ae iai te tia Karikiriki?
E aki ngkanne kamimi te maiu?
Tao 3,000 te ririki n nako e korea ae kangai te tia kario: “E kakamaku karaoau i Roum ao e kamimi.” (Taian Areru 139:14, BG) Ngkana ko iangoa aron rikiraken te teei man te cell ae tii teuana, tiaki ko bae n namakina kamimin anne? A bati aomata aika a kamoamoaa te tia Karikiriki ibukini karaoani baika a maiu.—Wareka Taian Areru 139:13-17; Ebera 3:4.
E anganira maiura Teuare e karika te iuniweeti ao ni karaoa te aonnaba bwa e na maekanaki. (Taian Areru 36:9) E reitaki ma aomata ao e tuangira naba arona.—Wareka Itaia 45:18.
Ti riki mairouia maan?
A bati bwaai ni kakoaua, ae a kuri iai n titeboo rabwatara ma rabwataia maan. Ma aei bukina, a kaai ni karikaki aomata ao maan iroun te tia Karikiriki bwa a na maekana aon te aba. E karaoa te moan aomata, tiaki mairoun te man ma boni mani bubun aontano.—Wareka Karikani Bwaai 1:24; 2:7.
A kaokoro aomata ma maan n aaro aika uoua aika kakawaki. Te moan, iai irouia aomata te wanawana, te tangira ao karinean te tia Karikiriki. Te kauoua, a aki karikaki maan bwa a na maiu n aki totoki n aroia aomata. Ma ngkai, a a bane aomata n ituaki n te mate ibukin ana aki ongeaba te moan aomata nakon ana kairiri te tia Karikiriki.—Wareka Karikani Bwaai 1:27; 2:15-17.