A Nako Karawa Maan?
Ana kaeka te Baibara
E angareirei te Baibara bwa mani karikibwai ni kabane aika n te aonnaba, ao bon iai aomata aika katauaki mwaitiia aika a na nako karawa. (Te Kaotioti 14:1, 3) A nako ikekei bwa a na tautaeka bwa ueea ao ibonga ma Iesu. (Ruka 22:28-30; Te Kaotioti 5:9, 10) A na kautaki angia aomata nakon te maiu n te aonnaba ae te bwaretaiti.—Taian Areru 37:11, 29.
Akea n te Baibara taekan ae e nako karawa te man ae kamananaaki ke te kamea, ao iai bukina ae riai. A aki kona maan ni karaoi mwaneka aika a na tau iai ni “weteaki mai karawa.” (Ebera 3:1) Tabeua mai buakoni mwaneka aikai boni karekean te atatai, te onimaki, ao te ongeaba n ana tua nako te Atua. (Mataio 19:17; Ioane 3:16; 17:3) Bon tii aomata aika karikaki ma kantaningaan te maiu n aki toki.—Karikani Bwaai 2:16, 17; 3:22, 23.
Ngkana a na nako karawa baika karikaki, a riai moa n rinanon te kautiuti. (1 I-Korinto 15:42) A taekinaki kautiuti tabeua n te Baibara. (1 Uea 17:17-24; 2 Uea 4:32-37; 13:20, 21; Ruka 7:11-15; 8:41, 42, 49-56; Ioane 11:38-44; Mwakuri 9:36-42; 20:7-12) Ma bon tii taekaia aomata ao tiaki maan.
Tera ae riki nakoia maan ngkana a mate?
E taekinaki n te Baibara bwa titeboo aroia maan ao aomata n ana taratara te Atua ni kaineti ma te maiu ae irouia. (Warekaia Iteraera 31:28) A karaoaki maan ao aomata mani bwaai aika uoua aikai: te “tano” ao “te ikeike ni maiu.”—Karikani Bwaai 2:7
angareirei te Baibara bwa a kona ni mate maan ao aomata. (Nakoaia Ibonga 21:11, kabwarabwara mai nano; Etekiera 18:20) Ngkana a mate maan ao aomata, a bon okira te tano. (Te Minita 3:19, 20) N taekana are teuana, a a boni mate.
A kona ni karaoa te bure maan?
A aki. Karaoan te bure, e nanonaki iai iangoana, namakinana, ke karaoan te bwai ae urua ana kaetieti te Atua. E bure te aomata ngkai iai irouna te kona ni karaoi motinnano ibukini maiuna, ma akea te konabwai anne irouia maan. A aki toki maan ni karaoi bwaai n aron ae a taneiai iai i nanoni maiuia. (2 Betero 2:12) N te tai are e toki iai abwakini maiuia, ao a a mate naba, e ngae naba ngke a aki karaoa te bure.
E riai bwa ti na iowawa nakon te man?
Ti aki riai. E anga te mwaaka ni kairiri te Atua nakoia aomata i aoia maan, ma e aki kariaia bwa a na iowawa nakoia. (Karikani Bwaai 1:28; Taian Areru 8:6-8) E tabeakinia maan n tatabemania nako te Atua, n ikotaki naba ma mannikiba aika uarereke. (Iona 4:11; Mataio 10:29) E tua nakoia taan taromauria bwa a na tabeakinia naba maan.—Te Otinako 23:12; Te Tua-Kaua 25:4; Taeka N Rabakau 12:10.