ATUN TE MAEKATIN | REKENI KUKUREIM N AM MWAKURI
Te Mwakuri Korakora—E Aikoa Kakawaki Ngkai?
E ikenrawa Alex ngke e uota te bwaoki are teuana nako aon te kaa ni kambwana ae mwamwaewe are e mwakuri iai. E titirakinna ni kangai: ‘Bukin tera ngkai I a bon tiku n au mwakuri aei, ae akea te rikirake iai? N ningai ae N na karikirakeaki iai? E na rangi n raoiroi riki maiu ngke arona bwa I aki mwakuri!’
N aron ae riki nakon Alex, a mwaiti ni boong aikai ake a aki kukurei n aia mwakuri korakora. E taku te mwakaeneke ae Aaron: “A rawata aika a iangoia bwa a aki tau ni karaoa te mwakuri ae ‘mangori.’ A iango ni kangai: ‘I tii karaoa aei ni karokoa reken te mwakuri ae nakoraoi riki.’”
Bukin tera bwa a mwaiti aika a namakinna bwa a aki riai ni mwakuri korakora? Tao a a tia ni kairaraangaki ni katanoata n te rerio, are e aki toki ni kaotiotaki iai te maiu ae ‘moan te raoiroi’ ae ko kaubwai ma n rau iai. E taku Matthew ae te tia onobwai: “A iangoia aomata bwa ngkana ko mwakuri korakora riki ibukini maium, e na bon aki nakoraoi. E kakoauaa naba anne te tia tararuaa te auti ae Shane ni kangai: “A aikoa mwakuri ni kabwanina te bong aomata ibukini booia ae bwanin n te bong anne.”
N iterana are teuana, a mwaiti aomata aika nakoraoi maiuia ake a kakoauaa bwa e kakukurei te mwakuri korakora. E taku Daniel ae 25 ana ririki ae te tia kateitei: “N au iango, a bati kakabwaia man te mwakuri korakora, e a moamoa riki ngkana a kaineti nakon tiia aika manena.” E boraoi n iango ma anne Andre ae 23 ana ririki ngke e kangai: “I kakoauaa ae e irekereke te mwakuri ma te kimwareirei ao te kakukurei. Tiaki te bwai ae na kairiri nakon te kakukurei ae teimaan te mwakuri ae karako ao baika ko a maan ni kakaraoi, ma e boni kairiri nakon te maiu ae kabotu ae teimaan!”
A na kangaa aomata n aron Daniel ao Andre ni karikirakea te iango ae raoiroi ibukin te mwakuri korakora? Tii ngkana a maiuakini booto n reirei man te Baibara. Bon akea kabwaraan nanora ibukin te mwakuri korakora n te Baibara ma e karikirakeaki iai te taningamarau ao te botumwaaka. Ma e mwaiti riki ae taekinaki iai nakon are tii tuangaki iai bwa ti na mwakuri. E kaotaki naba iai arora ni kimwareirei n ara mwakuri.
Baikara booto n reirei man te Baibara ake a na buokiko ni karekea te raunnano n am mwakuri? Ti kaungako bwa ko na iaiangoi tabeua ma iai, aika a na kabwarabwaraaki n te kaongora ae i mwina.