ATUN TE MAEKATIN | KO TANGIRIA N REIAKINA TE BAIBARA?
E Aera Ngkai E Raoiroi te Reirei n te Baibara?
Tera manenan te maiu aei?
Bukin tera ngkai a rawawata aomata ao ni mate?
Tera kanoan taai aika a na roko?
E tabeakinai te Atua?
Ko a tia n titirakiniko n titiraki n aron akanne? Ngkana ko a tia ao tiaki tii ngkoe. A iaiangoi titiraki aika nano ibukin te maiu aomata ni kabutaa te aonnaba. Ko kona ni karekei kaekaaia?
A kona ni kangai aomata aika mirion ma mirion mwaitiia: “Eng!” Bukin tera? Ibukina bwa a a tia ni karekei kaekaan aia titiraki aika karaunano man te Baibara. Ko kan ataia bwa tera ae e taekinaki n te Baibara? Ko kona ni kakabwaiaaki man reiakinan te Baibara ma Ana Tia Kakoaua Iehova n akea boona.a
Ni koauana, ngkana e reke aia tai tabeman n reiakina te Baibara, a a manga taku: “I rangi n tabetabe.” “E a rangi ni kangaanga te ota iai.” “E kangaanga maiuakinana.” Ma e kaokoro aia iango tabeman iai. A butimwaea reiakinan te Baibara. Iangoi katoto tabeua aikai:
“I kakaaei taromauri n te Aro ni Katorika ao ni Boretetanti, te tembora ae te Sikh, aia tabo taiani Buddhist ao I reiakina naba taekan te Aro n te kuura n reirei ae rietata. Ma e ngae n anne, a bon tuai mani kaekaaki au titiraki aika bati ibukin te Atua. Imwina, e a roko irou temanna Ana Tia Kakoaua Iehova ni mwengau. E anaaki nanou n ana kaeka aika boto man te Baibara, ngaia are I a butimwaea te reirei iai.”—Gill, Engiran.
“A a bati au titiraki ibukin te maiu aei ma e aki rau nanou n ana kaeka mataniwin au Aro. E ngae n anne, e kaekai au titiraki temanna Ana Tia Kakoaua Iehova ni kamanenaan te Baibara. Ngke e titirakinai bwa I kan reiakina ae bati riki ao I butimwaeia ma te kukurei.”—Koffi, Benin.
“E korakora nanou ni kan ataa taekan te mate. I kan ataia bwa tera ae taekinaki n te Baibara ibukia bwa I kakoauaa ae a kona ni kammarakiia aomata aika maiu. Ngaia are I a moana reiakinan te Baibara ma raoraou ae te tia Kakoaua.”—José, Brazil.
“I kataia ni wareka te Baibara ma I a bon aki ota iai. Imwina, a a roko taani Kakoaua irou ao ni kabwarabwarai raoi taetae ni burabeti tabeua mai iai. I tangiria n atai riki baika I kona n reiakini.”—Denniz, Mexico.
“I iangoia bwa e bon tabeakinai raoi te Atua ke e aki. Ngaia are I a motinnanoia bwa N na tataro nakon te Atua are e taekinaki n te Baibara. N te bong are imwina, a a karebwerebwe taani Kakoaua n au mataroa ao I a butimwaea te reirei n te Baibara.”—Anju, Nepal.
Ti a kauringaki n rongorongo akanne ana taeka Iesu are kangai: “A a kukurei akana ataia bwa a kainnanoa te Atua.” (Mataio 5:3) Eng, a boni karikaki aomata ma kainnanoan ataakin te Atua irouia. Bon tii te Atua ae e kona ni karekea kainnanoia anne ao e karaoia rinanon ana Taeka ae te Baibara.
Ngaia are tera ae e irekereke ma reiakinan te Baibara? Ko na kangaa ni kakabwaiaaki iai? A na kaekaaki titiraki akanne n te kaongora ae imwina.
[Kabwarabwara ae nano]
a Iehova bon aran te Atua ae kaotaki n te Baibara.
[Bwaoki n iteraniba 4]
Rongorongon Te Baibara Aika Koaua
ARANA: E nako man te taeka ni Kuriiti ae bi·bliʹa ae nanona “booki aika uarereke”
KANOANA: 39 booki n te taetae n Ebera (ma mwakorona tabeua n te taetae n Aramwaike) ao 27 booki n te taetae ni Kuriiti
KOREANA: E koreaki irouia aomata aika 40 mwaitiia n te maan ae 1,600 tabun te ririki man 1513 B.C.E. nakon tao 98 C.E.b
TAIAN TAETAE: E rairaki ni bwanin ke n tii te iterana n taetae aika raka i aon 2,500 mwaitiia
BUTANAKONA: E katautauaki bwa e nakon aua te birion mwaitini Baibara ike e a riki iai bwa te boki ae te kabanea ni butanako n te aonnaba
[Kabwarabwara ae nano]
b E tei B.C.E. ibukin “Before the Common Era,” ao C.E. ibukin “Common Era.”