ATUN TE MAEKATIN | KO TANGIRIA N REIAKINA TE BAIBARA?

Te Kaetieti Ibukin Te Reirei N Te Baibara Ma Aomata

A rangi ni kinaaki Ana Tia Kakoaua Iehova ibukin aia mwakuri n uarongorongo nakoia aomata nako. Ma kam ataia ae iai naba ara kaetieti ibukin te reirei n te Baibara ma aomata ni katobibia te aonnaba?

N 2014, a kairi reirei n te Baibara aika e kaania 9,500,000 ni katoa namwakaina Ana Tia Kakoaua Iehova aika e raka i aon 8,000,000 mwaitiia n aaba aika 240.a Ni koauana, a mwaiti riki aomata aika reirei n te Baibara ma ngaira nakoni mwaitiia botannaomata n te aba teuana man aaba aika 140 tabun mwaitiia!

Ibukini waakinan te mwakuri n angareirei aei irouia Ana Tia Kakoaua Iehova ao a a boretii Baibara, booki, maekatin ao bwaai n ibuobuoki riki tabeua ibukin te reirei n te Baibara ni katoa ririki n te mwaiti ae kaania teuana ao te iterana te birion n taetae aika 700 tabun mwaitiia! E a reke angaia aomata n reiakina te Baibara n oin aia taetae n te mwakuri ni boreeti ae akea kabotauana aei.

E kangaa aroni waakinan te reirei?

Ti rinei reirei aika kakaokoro man te Baibara ao n neneri kiibu aika kaineti ma reirei akanne. N te katoto, a kaekaaki titiraki n aron aikai man te Baibara: Antai te Atua? Tera aroarona? Iai arana? E memena ia? Ti kona ni kaaniaki riki ma ngaia? Ma e kona ni kangaanga ataakin nneni kaekaaia n te Baibara.

Ti kakabongana te boki ae Tera Ana Reirei ni Koaua te Baibara?b ae 224 baana ibukini buokaia aomata ni kaekai aia titiraki. E karaoaki te boki aei ibukini buokaia aomata bwa a na ota n reirei aika kakawaki n te Baibara. Iai i nanona reirei ibukin te Atua, Iesu Kristo, rawawataia aomata, te mangauti, te tataro ao a a bati riki.

E karaoaki n ningai ao ia te reirei?

E kona ni karaoaki n te tai ao n te tabo are e angaraoi iroum.

Maanra te reirei iai?

A a bati aika a kabanea teuana te aoa ke e nako riki ni katoa wiki n reirei n te Baibara. Ma e kona ni bibitaki maanin te reirei. Ti na kaangaraoia ma am babaire. Tabeman, a reirei n te Baibara i nanon 10 ke 15 te miniti ni katoa wiki.

E kabooaki te reirei?

E aki kabooaki te reirei ao booki n reirei. E boraoi aei ma ana kaetieti Iesu nakoia taan rimwina ae kangai: “Kam anganaki n akea boona, aanga naba n aki kabooaki.”—Mataio 10:8.

E na toki n ningai te reirei?

E a bon nakoim waakinakon te reirei. Iai reirei aika 19 n te boki ae Tera Ana Reirei ni Koaua te Baibara? Ko kona n rinanoi tabeua ke ni kabane reirei n aron ae ko tangiria.

I riai n riki bwa kaain Ana Tia Kakoaua Iehova?

Ko aki. Ti ataia ae ti riai ni karinea inaomataia aomata n tatabemania nako n rinea ae a na kakoauaa. Ma e ngae n anne, a boni kona ni karaoi aia rinerine aomata ake a karekea te atatai man te Baibara.

N na karekei ia rongorongona riki tabeua?

A katauraoaki rongorongo aika eti ibukin aia koaua ao aia mwakuri Ana Tia Kakoaua Iehova n te Atureti n te Intanete ae jw.org.

N na kangaa ni bubutii ibukin te reirei n te Baibara?

● Kanoaa te booma ni bubutii n te Intanete n www.pr418.com.

● Kororeta nakon te atureti ae ko kaan ma ngaia are a karinanaki n iteraniba uoua n te maekatin aei.

● Karekeia Ana Tia Kakoaua Iehova aika a kaani ma ngkoe. Ko kona ni kakaaea nambwan “Ana Tia Kakoaua Iehova” i buakon taian nambwa n tareboon n am aono.

[Kabwarabwara ae nano]

[Bwaoki n iteraniba 5]

“I aki rangi n tangira te reirei n te tabo n reirei, ma e rangi ni kaunga te reirei n te Baibara. Ao a rangi ni kabebetenano baike I reiakin iai!”—Katlego, Aberika Maiaki.

“A rinanoaki au titiraki ni kabane n te reirei aei ao aika bati riki.”—Bertha, Mexico.

“I reiakinaki n te Baibara ni mwengau n te tai ae e angaraoi nakoiu. Ai bon akea riki te bwai ae I tangiria!”—Eziquiel, Brazil.

“Maanin te reirei n tabetai bon 15 nakon 30 te miniti ao n taai tabetai e maan riki ngkana e angaraoi irou.”—Viniana, Aotiteria.

“E aki kabooaki te reirei ao e bon rangi ni kakukurei!”—Aimé, Benin.

“E rangi n taotaonakinnano ao n akoi au tia reirei n te Baibara. Ti karekea te itoman ae kaan i marenara.”—Karen, Northern Ireland.

“A mwaiti aomata aika reirei n te Baibara ma a aki riki bwa taani Kakoaua.”—Denton, Engiran.

[Bwaoki n iteraniba 7]

Te Ibuobuoki Ibukia Utu

“Ngke e moana reiakinan te Baibara buu ao I a nora te bitaki ni maiuna. E a moanna n nakoraoi maiura n ara utu. Ibukini korakoran nanou ni kan ataa te baere e reiakinna, I a moana naba te reirei n te Baibara. I buokaki ni baike I reiakin bwa N na riki bwa te aomata ae raoiroi aroarona. E karekea te reitaki ae kaan n ara utu te reirei n te Baibara.”—Eziquiel.

“Imwini moanakin reiakinan te Baibara irou ao I a katoka kabonganaan taian drug, te manging n te aro ae riao ao I a bwaati n taotaona nanou ngkana I un. E a rangi n itiaki ao n taraaraoi nanon au auti. I a karineia riki au utu ao I kukurei ni karaoi baika tangiri. I a rangi ni kukurei.”—Karen.

“A kabuakakaai aomata tabeman ngkai I reirei n te Baibara. Ma e boutokaa au motinnano buu ni kangai: ‘I aki tabe ma te bwai ae a taekinna aomata. E kakawaki riki irou norani bitakini maium nakon ae raoiroi. Kateimatoa te bwai ae ko karaoia.’ E a nakoraoi riki maiura n ara utu ngkai!”—Viniana.