Tera te Waaki n Angareirei n te Baibara ae A Anganano Iai Ana Tia Kakoaua Iehova?
A katauraoa te anga ae manena Ana Tia Kakoaua Iehova ibukini kaotaam n ana reirei te Baibara. E kona ni buokiko ara waaki n angareirei n te Baibara bwa ko na:
Karekea te maiu ae kakukurei
Riki bwa raoraon te Atua
Reiakin ana berita te Baibara ibukin taai aika imwaira
N te iteraniba aei
E kangaa aroni kairan te reirei n te Baibara?
E na buokiko am tia reirei bwa ko aonga n taneiai riki ma kanoan te Baibara, ni maroroakinan te atu n reirei teuana ma teuana. Kabonganaan te waaki n angareirei n te Baibara man te boki ae Ko Kona ni Kukurei n Aki Toki, e na karikirakea otam ni baika e taekin te Baibara ao arona ni kona ni buokiko. Ibukin rongorongona riki, mataku n te taamnei aei.
E kabooaki te reirei?
E aki. A ira te kaetieti Ana Tia Kakoaua Iehova are e anga Iesu nakoia taan rimwina ae kangai: “Kam anganaki n akea boona, aanga naba n aki kabooaki.” (Mataio 10:8) Irarikin anne, a aki naba kabooaki baika kabonganaaki ibukin te reirei, ae nanonaki iai te Baibara ao te boki ae atuna Ko Kona ni Kukurei n Aki Toki!
Maanra taina?
Iai 60 mwaitini mwakoro n reirei ni kabane aika riai n rinanoaki. E bon nakoim mwaitin te reirei ae ko na rinanona ni katoatai, ma a mwaiti aomata aika reirei n te Baibara aika kan rinanon teuana te mwakoro ke ae raka riki ni katoa wiki.
E kangaa aroni moanakina?
1. Kanoaa te booma n te intanete. Ti na kabongana te rongorongo are ko karinna n te booma, tii ibukini kakoroan nanon am bubutii bwa e aonga n reitaki temanna Ana Tia Kakoaua Iehova ma ngkoe.
2. E na reitaki ma ngkoe te tia reirei. E na kabwarabwarai nakoim baika ko na kantaningai ni waakinan te reirei n te Baibara ma ngkoe ao e na kaekai am titiraki nako ake ko tabeki.
3. Karaoa am babaire ibukin te reirei ma am tia reirei. E kona ni kawariko temanna n reirei ma ngkoe ke ni karaoaki te reirei i aon te tareboon, te video call, rinanon te reta, ke te email. E nakon teuana te aoa maanin te reirei, ma e kona n uarereke riki ke n abwabwaki riki ni kaineti ma am kaetieti.
I kona n tii kataia moa?
Eng. Ngkana ko kani kataia moa ao kanoaa te booma n te intanete. Ngkana e reitaki nakoim te tia reirei, tuangnga ae ko kani kataa moa te reirei n noria ngkana ko nano iai. E na kabongana te boroutia ae Ko Kona ni Kukurei n Aki Toki! ae iai moan reirei aika tenua i nanona, ake a na buokiko n noria ngkana iai ungan nanom n te reirei.
E na kairoroai te tia reirei bwa N na riki bwa temanna Ana Tia Kakoaua Iehova, ngkana I butimwaea te reirei n te Baibara?
E aki. Ti tangiria n reireinia aomata taekan te Baibara ngaira aika Ana Tia Kakoaua Iehova, ma ti aki kairoroa temanna bwa e na kaaina ara Aro. Ma ti bwaina te karinerine ni kaota te bae e taekinna te Baibara n ataakin ae iai riain temanna ma temanna n rinea te bae e na kakoauaa.—1 Betero 3:15.
I kona ni kabongana oin au Baibara?
Eng, ko kona ni kabongana oin am Baibara ngkana ko tangiria. E ngae ngkai ti kukurei ni kabonganaan Te Baibara ae Tabu—Te Rairai ae te Aonnaba ae Boou ibukina bwa e mataata ao n eti raoi, ma ti ataia bwa a mwaiti aomata aika kani kabongana te Baibara are a taneiai iai.
I kona ni kaoia tabeman bwa a na raonai n reirei?
Eng. Ko kona ni kaoia am utu ni kabane ke raoraom ake ko kani kaoia.
Tera arou ngkana I a tia ngkoa n reirei n te Baibara ma Ana Tia Kakoaua Iehova? I kona ni manga reirei?
Eng. Ko na boni bae ni kukurei n rinanon ara waaki n angareirei ae ngkai nakon are mai mwaina, ibukina bwa iai bitaki aika karaoaki ni kaineti ma kainnanoia aomata ni boong aikai. A na bati riki baika ko na kona n nori ao ni maroroakin, ni kabotauaki ma te waaki n angareirei ngkoa are mai mwaina.
Iai aanga tabeua ibukin te reirei n te Baibara i bon iroum n akea te tia reirei i rarikim?
Eng. E ngae ngke a bati reireiaia aomata ni menan te tia reirei i rarikia, ma iai tabeman ae a tangiria n reirei i bon irouia moa. Iai te iteraniba ae katauraoaki ibukini Bwaai n Ibuobuoki n te Reirei n te Baibara, are a karinanaki iai bwaai ni mwakuri aika akea booia ma baika kona ni buokiko n am tai n reirei n te Baibara. Aikai bwaai n ibuobuoki tabeua aika ko na bae ni buokaki iai:
Taamnei Man te Baibara. A kabwarabwaraaki reirei aika kakawaki man te Baibara n taamnei aika kimototo aikai.
Titiraki Aika Kaekaaki Man te Baibara. A katauraoaki ni kaongora aikai kaekaan titiraki aika kakaokoro ni kaineti ma te Baibara.
Kabwarabwaraani Kiibu Man te Baibara. Nori nanoni kiibu ma taeka man te Baibara aika rangi n ataaki.