Bukin Tera Ngkai E na Warekaki te Baibara?
TE BAIBARA bon tiaki ai aron booki nako—bwa kanoana bon te reirei ae kaotiota te tangira mairoun te Atua. (1 I-Tetaronike 2:13) Ngkana ko kamanena ana reirei te Baibara, ao ko na rangi ni kakabwaia mai iai. Ko na karikirakea iai tangiran te Atua iroum ao ko na kaaniko naba ma ngaia ae te tia Anga “bwaai n tituaraoi aika moan raraoi.” (Iakobo 1:17) Ko na reireiaki naba aron kawarana n te tataro. Ko na karekea buokam mairoun te Atua n am kangaanga. Ngkana ko kaboraoa maium ma kaetieti akana a taekinaki n te Baibara, ao e na bon anganiko te Atua te maiu are aki toki.—I-Rom 6:23.
Iai koaua n te Baibara aika a kaotaa te aba. Te koraki ake a karekea te atatai man te Baibara a kainaaomataki man iango aika kairua aika a tautoronaki iai ngkai maiuia aomata aika mirion ma mirion mwaitiia. N aron aei, ataakin te koaua i aon taekan te bwai ae na riki nakoira ngkana ti mate e kainaaomataira man maakakin are e na kona ni kaikoakira antin te mate, ao man iangoan ae ara utu ma raoraora ake a a tia ni mate a a tabe ni kammarakaki. (Etekiera 18:4) Ana reirei te Baibara n taekan te manga-uti e anga te karaunano nakoia te koraki ake a a tia ni bua aia koraki aika a tangiraki irouia n te mate. (Ioane 11:25) Ataakin te koaua ibukia anera ake a buakaka, e katauraoira nakon kangaanga ake a na reke man te tabunea, ao e buokira naba bwa ti na ataa bukin batin te kangaanga n te aonnaba aei.
Reirei mairoun te Atua ake n te Baibara a kaota nakoira aron te maeka n te aro are ti na kakabwaia iai n te aro n rabwata. N aron aei, bwainakin te ‘taubaang,’ e kairiko nakon teimatoan maurim. (1 Timoteo 3:2) Arora ni ‘kaitiakira man kamwaran te rabata ma te tamnei ni kabanea,’ ti totokoa iai uruakakin maurira. (2 I-Korinto 7:1) Kamanenan te reirei mairoun te Atua man te Baibara e karikirakea naba te kukurei n te mare, ao namakinan ae iai bongam.—1 I-Korinto 6:18.
Ko na kukurei riki ngkana ko kamanenaa ana Taeka te Atua. Te atatai man te Baibara e buokira ni karekea te raunnano ao te kukurei, ao e anganira te kaantaninga ae riai. E buokira naba bwa ti na karekei iroura aroaro aika moan raraoi, n aron te nanoanga, te tangira, te kimwareirei, te rau, te akoi, ao te onimaki. (I-Karatia 5:22, 23; I-Ebeto 4:24, 32) Aroaro aikai a buokira ni karaoiroa riki arora ni buu-mwaane ke ni buu-aine, n tama ke n tina, n nati-mwaane ke n nati-aine.
Ko a tia n iaiangoa taekan te tai ae na roko? Taetae ni burabeti n te Baibara a kaotia nakoira bwa ti a mena ngkai n te tai ae rangi ni kakawaki ibukia aomata. A aki tii kabwarabwaraa aron te aonnaba ni boong aikai taetae ni burabeti aikai, ma a kaotia naba bwa te Atua e nang onea te aonnaba aei nakon te baretaiti.—Te Kaotioti 21:3, 4.
Te Ibuobuoki Ibukin te Kamataata i aon te Baibara
Tao ko a tia ni kataia ni wareka te Baibara ma ko kunea bwa e kangaanga otam iai. Tao ko aki ataia naba bwa te tabo raa n te Baibara ae ko na kunea iai kaekaan am titiraki. Ngkana ngaia anne, ao tiaki tii ngkoe ae ko namakina te kangaanga aei. Ngaira nako ti bane ni kainnanoa buokara ibukin kaotaakira n ana Taeka te Atua. Ana Tia Kakoaua Iehova n aaba aika 235 tabun, a kairi reirei n te Baibara ma aomata aika mirion ma mirion mwaitiia, n aki kabooaki. A na rangi ni kukurei naba ni buokiko.
E nonoraki bwa e raoiroi riki waakinan te reirei n te Baibara teutana imwin teutana, ni moanaki man moan reirei. (Ebera 6:1) Ngkana ko reitanako am reirei, ko na tau riki ni butimwaea ngkanne te “amarake ae matoatoa”—ae taekan koaua aika nano riki. (Ebera 5:14) Te Baibara bon te tia kairiri. Booki aika kabwarabwaraa te Baibara, n aron te boki ae Tera Ana Reirei ni Koaua te Baibara?, a na buokiko bwa ko na ota n ana reirei te Baibara aika mwaiti.
Ko Kariaia bwa Ko na Kabanea Teutana Am Tai ni Katoa Wiki bwa Ko Aonga n Oota n te Baibara?
Te reirei n te Baibara e kona ni baireaki n te tai ao n te tabo ae angaraoi ibukim. Angiia, a bon reirei n oini mwengaia. Tabeman a reirei rinanon te tareboon. Te waaki n reirei aei, bon tiaki i buakon te koraki aika bati, ma bon te babaire ae kaonoti nakon temanna te aomata n reitaki ma tian wanawanana ao buburan ana reirei are e a tia n rinanona. Akea te ukeuke iai, ao ko aki kona naba n namakinna bwa ko na maamaa iai. A na boni kaekaki am titiraki i aon te Baibara, ao ko na reireiniko arom ni kaania te Atua.
Ko aki riai ni kabwakamwane ibukin te reirei n te Baibara aei. (Mataio 10:8) E baireaki bwa e na akea boona nakoia aomata aika kaain Aaro nako ao nakoia naba ake akea aia Aro ake a kaotiota te nano ni kani karikirakea aia atatai n ana Taeka te Atua.
Antai ae e kona ni buokanibwai n te maroro? Am utu ni kabane. Raoraom nako ake ko bon rineia ma ni kaoiia bwa a na roko, a kona naba n iri. Ke ngkana ko bon tangiria, e kona ni karaoaki te maroro ma tii ngkoe.
A mwaiti aomata aika a baireia bwa a na kabanea teuana te aoa ni katoa wiki n reirei n te Baibara. Ngkana ko kona ni kabanea te tai ae raka riki ke e na uarereke riki nakon anne ni katoa wiki, ao a na boni kukurei ni buokiko taani Kakoaua.
Te Kakao Nakon te Reirei
Ti kaoko bwa ko na reitaki ma Ana Tia Kakoaua Iehova. Te anga teuana ae ko kona ni karaoa aei, ngkana ko kororeta nakon te atureti teuana ae i nano. Te babaire e na karaoaki ngkanne iroun temanna bwa e na kaira te reirei n te Baibara ma ngkoe, n aki kabooaki.
□ Kanakomaia nakoiu katoton te boki ae Tera Ana Reirei ni Koaua te Baibara?
Kaota te taetae ae ko kabongana.
□ Taiaoka n reitaki ma ngai ibukin te reirei n te Baibara ni mwengau, ae aki kabooaki.
Agiin kiibu n te beeba aei a anaaki man Te Baibara ae boretiaki iroun The Bible Society in the South Pacific, ma e kaboraoaki ma te taetae ni Kiribati ae kabonganaki ngkai.