Te Uaia ni Mwakuri ma te Atua E Karika te Kimwareirei

1. E ngae ngkai bon Teuare Moan te Rietata Iehova, ma tera ae e kaoia iai aomata bwa a na karaoia?

BON Teuare Moan te Rietata Iehova, ae te tia Karikii bwaai ni kabane ao akea tiani wanawanana ma mwaakana. E ataa anne Iobi. Imwin titirakinana iroun Iehova ibukin Ana mwakuri ni karikibwai, e kaeka Iobi ni kangai: “I ataiko ba Ko konai bwaai ni kabane ni karaoi, ao e aki konaki n tukaki nanom teuana.” (Iobi 42: 2, BG) E ngae ngke e kona Iehova ni kakoroi bukini baike e karaoi n akea buokana, ma e a tia ni kaoia aomata man te moantai bwa a na mwakuri ma ngaia ni kakororaoa ana kantaninga.

2. Tera te mwakuri ae kakawaki ae e kaoaki iai Iesu iroun Iehova bwa e na karaoia?

² Ana moani karikibwai te Atua bon Natina ae ana rikitemanna ae te taamnei. E kariaia Natina bwa e na buoka te mwakuri ni karikibwai n aekana nako, aika taian taamnei ao te iuniweeti. (Ioa. 1:1-3, 18) E korea aei te abotoro Bauro ibukin Iesu: “Nikirani bwaai ake i karawa ao i aon te aba, a boni karikaki rinanon teuaei, aika baika a nonoraki ao baika a aki nonoraki, e ngae ngke taiani kaintokanuea ke taian nakoa n uea ke taian tautaeka ke taiani mwaaka ni kairiri. A bane ni karikaki baikai rinanon ao ibukin teuaei.” (IKoro. 1:15-17) Mangaia are e karinea Natina Iehova ngke e mwiokoia naba n te mwakuri ni karikibwai ao ngke e tuangia tabemwaang taekani mwiokoan Natina ae kakawaki.

3. Tera ae e kaoaki iai Atam bwa e na karaoia iroun Iehova, ao bukin tera?

³ E kaoia naba aomata Iehova bwa a na mwakuri ma ngaia. N te katoto, e kariaia Atam bwa e na arania maan. (KBwaai 2:19, 20) Ai kimwareireira Atam n tarataraiia maan aikai, ni kamatebwai aroaroia ao n iangoia bwa tera te ara ae tau ibukin temanna ma temanna! E boni kona Iehova n arania maan ake e boni karikiia. Ma e tatangira n angan Atam bwa e na arania. E angan naba Atam ana tai ni karababaanako te Bwaretaiti n riaon tian Eten. (KBwaai 1:27, 28) E kananokawaki bwa e rineia Atam bwa e na aki mwakuri ma te Atua ao n tokina e a karika te kabuanibwai nakoina ma kanoana.​—KBwaai 3:17-19, 23.

4. A kangaa aomata ni mwakuri ma te Atua ni kakororaoa nanona?

⁴ Imwina, e kaoia aomata tabeman te Atua bwa a na uataboa kakororaoan ana kantaninga. E kabaa te aake Noa are e kamanoaki iai ma ana utu n te Ieka are kabutaa te aonnaba. E kaotinakoia te natannaomata aika tibun Iteraera Mote mai Aikubita. E kaira te natannaomata anne Iotua nakon te Aba ni Berita. E katea te tembora Toromon i Ierutarem. E riki Maria bwa tinan Iesu. A bane naaka kakaonimaki aikai ao aika a bati riki n uaia ni mwakuri ma Iehova ni kakororaoa ana kantaninga.

5. Tera te mwakuri ae ti kona n uataboia, ao te koaua bwa e kainnanoira Iehova bwa ti na irekereke iai? (Nora te taamnei ni moan te kaongora aei.)

⁵ Ni boong aikai ao e kaoira Iehova bwa ti na anga ara kabanea ni konaa ni boutokaa te Tautaeka n Uea Iroun te Mesia. A bati iteran te mwakuri ae tabu. Iai tabeua ake a aki kona ni karaoaki irouia Kristian ni kabane, ma ti bane ni kona n uataboa te mwakuri ae tataekinan te rongorongo ae raoiroi ibukin te Tautaeka n Uea. Ni koauana, e kona n aki kairekerekeira Iehova n te mwakuri aei. E kona n rineia bwa e na taetae mai karawa nakoia aomata aika i aon te aba. E taekinna Iesu bwa e kona naba Iehova n tuangia atibu bwa a na takaruaea taekan te Uea ae te Mesia. (Ruka 19:37-40) Ma e kariaia Iehova bwa ti na riki bwa ‘raona ni mwakuri.’ (1Kor. 3:9) E korea aei te abotoro Bauro: “Ngkai ti uaia ni mwakuri ma te Atua, ti a manga butiingkami bwa kam na butimwaea ana akoi ae rianako, n aki kakeaa bongana.” (2Kor. 6:1) Te uaia ni mwakuri ma te Atua bon te tibwanga ae rine, ae kairira bwa ti na rangi ni kimwareirei. Ti na rinanoi bukina tabeua aika kakawaki.

E KAKUKUREIRA TE UAIA NI MWAKURI MA TE ATUA

6. E kangaa Natin te Atua ae ana moanibung ni kabwarabwaraa ana namakin ni mwakurina i rarikin Tamana?

⁶ N taai ake rimoa ao a kunea te kimwareirei ana toro Iehova ni mwakuria ma te Atua. E tei ana moanibung Natin te Atua ae te taamnei bwa nibwan raoi te wanawana n aron ae taekinaki ni kangai: “E karikai Iehova ba te moani bwai ae karikaki i Rouna . . . I mena naba i rarikina ba kaanga te tia makuri ae rabakau ngai: ao ana bwai ni kukurei ngai n te bong ae koraki, ao I kimareirei i matana n aki toki.” (TaeRab. 8:22, 30, BG) E kukurei ni mwakuri Iesu i rarikin Tamana, ao e kimwareirei n te baere e karaoia ao n ataan ae e kukurei Iehova irouna. Ma tera arora iai?

7. E aera bwa e karekea kimwareireira te uarongorongo?

⁷ E taekinna Iesu bwa e kakukurei te anganga ao te anganaki. (Mwa. 20:35) Ti kimwareirei ni butimwaea te koaua ao n tataekinna naba nakoia tabemwaang. N taekinani koaua man te Baibara nakoia tabemwaang, ti a noriia aika baki n te aro n taamnei bwa a kaonaki n te kimwareirei ngkai a a moanna n ota ao ni kakoauaa Atuara ma koaua aika kakawaki n ana Taeka. A ringaki nanora n noraia ni karaoi bitaki tiaki tii n aia iango ma ni maiuia naba. Ti a ataia ae e rangi ni kakawaki uataboan tataekinan te rongorongo ae raoiroi aei. E kauka te kawai nakon te maiu n aki toki nakoia naake a raoiakinaki ma te Atua. (2Kor. 5:20) Tera riki te mwakuri ae karaunano ao ni kakimwareirei nakoni buokaia aomata bwa a na karekea te maiu n aki toki?

8. Tera ae a taekinna tabeman ibukini kakukurein te mwakuri ma Iehova?

⁸ E ngae ngke ti nora kimwareireia aomata ngkana a butimwaea te rongorongo are ti tataekinna, ma ti kukurei naba n ataia bwa ti kakukureia nanon Iehova ao e butimwaei ara kakorakora ni beku ibukina. (Wareka 1 I-Korinto 15:58.) E taku Marco are maeka i Itare: “I karekea te kimwareirei ae akea kabotauana, n ataan ae I anga au kabanea n tamaroa nakon Iehova ao tiaki nakon temanna ae na waekoa ni mwaninga te baere I a tia ni karaoia.” Tii te arona ma Franco are beku naba i Itare are e taku: “E kauringira Iehova ni katoabong rinanon ana Taeka ao amwarake n taamnei ake e katauraoi bwa e tangirira ao a kakawaki irouna baike ti karaoi ni kabane ibukina, e ngae ngke e taraa n akea uaan ara kakorakora i bon iroura. Aio bukina ae I kukurei iai ni mwakuri ma te Atua ao ni kabongana iai maiuu.”

TE MWAKURI MA TE ATUA E KAANIRA RIKI MA NGAIA AO TABEMWAANG

9. Tera aron te reitaki are i marenan Iehova ao Iesu, ao bukin tera?

⁹ Ngkana ti uaia ni mwakuri ma naake ti tangiriia, ti a kaaniaki iai ma ngaiia ao ni moanna n atai aroaroia ma anuaia. Ti aki tii reiakina te baere a kani kakororaoia ma bon aroia naba ni karaoia. E mwakuri Iesu ma Iehova tao i nanon birion ma birion te ririki, ao a a karikirakea katiteuanaakia n te tangira ae korakora ae e aki kona n uruaki. E kabwarabwaraa Iesu reitakia ae rangi ni kaan ngke e kangai: “Tii teuana ngai ma te Tama.” (Ioa. 10:30) A kukurei ni katiteuanaakia ae raoiroi, n uaia ni mwakuri n taai nako ma te boonnano.

10. E aera bwa ti kaaniaki riki ma te Atua ao tabemwaang n te uarongorongo?

¹⁰ N ana tataro Iesu, e butiia Iehova bwa e na kawakinia taan rimwina. Bukin tera? E tataro ni kangai: “Bwa a aonga ni katiteuanaaki n arora.” (Ioa. 17:11) Ngkai ti a atai ana kaetieti te Atua ao n uataboa te mwakuri n uarongorongo, ti a moanna n atai aroarona aika anainano. Ti ataa bukina ae ti wanawana ngkana ti onimakinna ao ni kakairi n ana kaetieti. Ngkana ti kaania te Atua, e na kaanira naba. (Wareka Iakobo 4:8.) Ti kaanira naba ma tarira ao mwaanera n te onimaki ibukina bwa ti aitara naba ma kangaanga ao taiani kakukurei ake a aitara ma ngaai ao ibukina naba bwa titeboo tiara ma ngaiia. Eng, ti uaia ni mwakuri, ni kimwareirei ao n nanomwaaka. E taku Octavia are maeka i Buritan: “I a kaaniaki riki ma tabemwaang n te uaia ni mwakuri ma Iehova ibukina bwa e a aki boto au iraorao ao au reitaki i aon te aroaro ae kai noraki, ma e boto i aon te tia ao te kaetieti ae tii te arona.” Ko namakina naba ae aron anne? Ko aki kaaniaki riki ma tabemwaang ngkana ko nori aia kakorakora ni kani kakukureia Iehova?

11. E aera bwa ti na kaan riki ma Iehova ao tarira n te aonnaba ae boou?

¹¹ E kona ni korakora n te tai aei katiteuanaakira n te tangira are ti kukurei iai ma te Atua ao tabemwaang, ma e na rangi ni korakora riki n te aonnaba ae boou ae mena iai te raoiroi. Iangoa te mwakuri ae mena imwaira! E na iai kautakia aika mate ao a na reireinaki kawain nako Iehova. E tangiraki te aonnaba bwa e na oneaki nakon te bwaretaiti. Bon tiaki mwakuri aika bebete karaoaia, ma ai kakukureira te uaia ni mwakuri ao ni kororaoi teutana imwin teutana i aan te Tautaeka n Uea Iroun te Mesia! A na bane ni kaaniaki riki i marenaia utu nako ao nakon Atuaia are e na aki kabwaka ni “kabaneia akana maiu ni kanuaiia n te bwai ae a tangiria.”​—TaiAre. 145:16, BG.

BONI KAMANOARA TE MWAKURI MA TE ATUA

12. E kangaa te uarongorongo n riki bwa te bwai ni kamanomano?

¹² Ti kainnanoa kawakinan ara onimaki. Ibukina bwa ti maeka n te aonnaba ae tauaki taekana iroun Tatan te Riaboro ao ibukina bwa ti aki kororaoi, e rangi ni bebete bwa ti na kariaia te iango ae kairua ao aroaron te aonnaba aei. E kona ni kabotauaki nanon aon te aba ma te aira ae katikira nakon te kawai ae ti aki kan nako iai. Ngkana ti na rawa n katikakinako n airan te karaanga, ti riai ni kakorakoraira n uaua nakon iterana are teuana. Ai arona naba, e kainnanoaki te kakorakora bwa ti na aki katikakinako n nanon aon te aba ae ana waaki Tatan. Ngkana ti uarongorongo nakoia tabemwaang, ti a kaatuui iai baika kakawaki ao aika uaana n te onimaki ao tiaki baika a na kamamaraa ara onimaki. (IBir. 4:8) E kakorakorai ara onimaki te uarongorongo, e kauringira ana berita nako te Atua ao ana kaetieti aika tatangira. E buokira naba ni kateimatoa otangara ae te onimaki.​—Wareka I-Ebeto 6:14-17.

13. Tera ana namakin temanna te tia Kakoaua i Aotiteria ibukin te uarongorongo?

¹³ Ngkana ti teimatoa ni katabetabeira n uarongorongo ao ni karaoi mwakuri tabeua n te ekaretia, e na aki kona n reke te tai ae ti na rangi n tabeaianga iai n ara kangaanga ao anne are e buokira ni kamanoira. E taku Joel are maeka i Aotiteria: “E buokai te uarongorongo bwa N na aki kakeaa bongan te maiu. E kauringai kangaanga ake a aitara ma ngaai aomata ao kakabwaia ake I rinanoi mani maiuakinani booto n reirei man te Baibara. E buokai naba te uarongorongo bwa N na kataia ni bwabwaina te nanorinano, ao e karekea au tai n onimakina Iehova ao tariu ma mwaaneu n te ekaretia.”

14. E aera bwa ara kakorakora n uarongorongo boni kaotan ae e memena taamnein te Atua iroura?

¹⁴ E kakorakoraa naba ara koaua te mwakuri n uarongorongo bwa e memena taamnein te Atua iroura. Iangoa aei: Aongkoa ko anganaki te mwakuri ni kareketianti teuana ae tibwaan te kariki ae kamarurung nakoia aomata n am kaawa. Ko aki kabooaki ke akea booni mwin am kabanemwane iai. Te bwai riki teuana bwa ko a waekoa ni kunea ae angiina aomata a aki tangira am kariki ao tabeman a ribaiko naba ibukini kabutana. Ko na maanra ni waakina te mwakuri anne? Ko bae n namakina te bwarannano n aia kaeka aika aki raoiroi aomata, ao n te tai ae aki maan ko a aki kani waakinna. Eng, a bati i buakora aika a kakorakoraia n uarongorongo ni katoa ririki n oin aia kabanemwane ao n aki tabe ma te kakaniko ao te un. E aki kaotaki n anne koauan ae e mwamwakuri i nanora taamnein te Atua?

TE MWAKURI MA TE ATUA E KAOTA TANGIRANA IROURA AO TANGIRAIA TABEMWAANG

15. E kangaa n irekereke tataekinan te rongorongo ae raoiroi ma ana kantaninga te Atua ibukin te botannaomata?

¹⁵ Karaua iangoa aron tataekinan te rongorongo ae raoiroi ae tonuraoi ma ana kantaninga ae tatangira Iehova ibukia te botannaomata. E kantaningaiia bwa a na kaona te aonnaba n aki mamate, ma e ngae ngke e a tia ni bure Atam, e aki bita Ana iango Iehova. (Ita. 55:11) N oneani mwin anne, e baireia bwa a na kainaomataaki aomata man te bure ao te mate. E mwakuria naba te kantaninga anne Iesu ni menana i aon te aba ao e kareana maiuna ibukia aomata aika ongeaba. Ma ngkana a na ongeaba, a riai n atai baike e tangiri te Atua ibukia. Ngaia are, e reireinia naba aomata Iesu baike e tangiri te Atua ao e tua nakoia taan rimwina bwa a na karaoa naba aei. Mani buokaia tabemwaang bwa a na raoiakinaki ma te Atua, ti a boutokaa iai ana babaire ae tatangira aei ibukini kamaiuaia te botannaomata man te bure ao te mate.

16. Tera irekereken ara mwakuri n uarongorongo ma ana tua te Atua aika taiani kabanea ni kakannato?

¹⁶ Man arora ni buokiia tabemwaang bwa a na toua te kawai nakon te maiu n aki toki, e a kaotaki iai tangiraia raora n aomata ao Iehova are “kantaningaiia aeka n aomata nako bwa a na kamaiuaki, ma ni karekea te atatai ae eti ibukin te koaua.” (1Tim. 2:4) Ngke e titirakinaki bwa tera te kabanea ni kakannato n tua mai buakon tuua ake a anganaki te natannaomata ae Iteraera, e kaeka Iesu ni kangai: “‘Ko riai n tangira Iehova ae Atuam ma nanom ni kabanea, maium ni kabanea ao am iango ni kabanea.’ Te tua aio bon te kabanea ni kakannato, ao te moan tua. Te kauoua, kaanga aekakin naba anne ae kangai, ‘Ko riai n tangira raom n aomata n aron tangiram i bon iroum.’” (Mat. 22:37-39) Man arora ni boutokaa te mwakuri n uarongorongo, ti a kaota iai ongeabara nakon tuua aikai.​—Wareka Mwakuri 10:42.

17. Tera am namakin ibukin te mwioko ae tataekinan te rongorongo ae raoiroi?

¹⁷ Ai kakabwaiaakira ngaira! E a tia Iehova n anganira te mwakuri ae ti na kukurei iai, ae ti kaaniaki riki iai ma ngaia ao tabemwaang ao anne are e a riki bwa kamanoara n te onimaki. E karekea naba ara tai ni kaota tangiran te Atua ao tangiraia raora n aomata. A rangi ni kakaokoro nako aroaroia ana aomata te Atua aika i aon te aba, bwa tao te roro n rikirake ke te kara, e kaubwai ke akea ana bwai, e korakora ke e mamaara, ma mirion ma mirion aika ukera ao ni kakaaei aanga n tibwaa nako aia onimaki nakoia tabemwaang. Tao ko na bae ni boraoi n iango ma Chantel are maeka i Buranti. E taku neiei: “Te Aomata ae moan te mwaaka n te iuniweeti, ae te tia Karikii bwaai ni kabane, ae te Atua ae kukukurei, e kangai nakoiu: ‘Naako! Taetae! Taetae ibukiu, taetae mai nanom. N na anganiko te korakora, au Taeka man te Baibara, te boutoka mai karawa, raao ni mwakuri i aon te aba, te reirei ni kataneiai ae teimatoa waakinana ao ai kaetieti aika eti ao n roko raoi n taia.’ Ai korakorara te mwioko ae e tuangira Iehova bwa ti na karaoia ao n uaia ni mwakuri ma Atuara!”