Ai Kakawakira Mwiokoam Ngkai Ko Beku ma Iehova!
“Raon te Atua ni mwakuri ngaira.”—1 I-KORINTO 3:9.
1. Tera ana namakin Iehova n ana mwakuri, ao tera are e karaoia ibukin anne?
IEHOVA bon te tia mwakuri ae e kukukurei ni baike e karaoi. (Taian Areru 135:6; Ioane 5:17) Ibukina bwa e kariaia ana karikibwai aika wanawana Iehova bwa a na rinanon te aeka ni kimwareirei anne ao ni kakaitau ni baike a a tia ni kakororaoi, e a bon tia ni mwiokoiia n te mwakuri ae raoiroi ma ni kakukurei. N te katoto, e kairekerekea Natina ae te moanibung n Ana mwakuri ni karikibwai. (Wareka I-Korote 1:15, 16.) Ti ataia man te Baibara bwa imwain rikin Iesu n aomata, ao e a kamani mena irarikin te Atua i Karawa bwa “te tia makuri ae rabakau.”—Taekan Rabakau 8:30, BG.
2. Ti kangaa n ataia bwa iai mwiokoaia anera ae kakawaki ma ni kakukurei are a aki toki n anganaki?
2 A kaotaki katoto tabeua mani Karikani Bwaai nakon Te Kaotioti bwa e aki toki Iehova n angania natina aika anera mwiokoaia. Imwini karaoan te bure irouia Atam ma Ewa ao kanakoaia mani mwengaia ae Bwaretaiti, “E kamenaia [te Atua] taiani Kerubim i tanimainikun te ne n aroka are Eten, ma uramwakan te kabaang ae bibitaki nako, ba e na kawakina te kawai are kawain te kai ni kamaiu arei.” (Karikani Bwaai 3:24, BG) Ao e kaotaki n Te Kaotioti 22:6 ae Iehova “e kanakoa ana anera . . . bwa a na taetae ni kaotii bwaai aika a na waetata n roko, nakoia ana toro.”
MWIOKOAIA AOMATA
3. E kangaa Iesu ni kakairi n ana katoto Tamana ni menana i aon te aba?
3 Ni menan Iesu i aon te aba bwa te aomata ae kororaoi, e karaoa mwiokoana mairoun Iehova ma te kimwareirei. Kioina ngke e kakairi Iesu n ana katoto Tamana, e bon angania naba taan rimwina te mwioko ae kakawaki. E taekina ae kangai ni kauekean ingaingaia ni kantaningaa te bwai are a na kakororaoia: “I tuangingkami raoi te koaua, Bwa ane onimakinai ao e na karaoi naba mwakuri ake I karaoi, ao e na karaoi mwakuri aika kakannato riki nakon aikai, bwa I a nakon te Tama.” (Ioane 14:12) E katuruturua Iesu kaumakan aeka ni mwakuri akanne ni kangai: “Ti riai ni mwakuria ana mwakuri teuare kanakomaiai ngkae ngaina, bwa e a kaan te tairiki are akea te aomata ae kona ni mwakuri iai.”—Ioane 9:4.
4-6. (a) E aera ngkai ti kona ni kaitauia Noa ao Mote ibukini kakororaoani mwiokoaia mairoun Iehova? (b) Tera te bwai ae titeboo iai mwiokoaia ni kabane aomata mairoun te Atua?
4 Imwain rokon Iesu i aon te aba, a bon anganaki aomata te mwakuri ae a riai ni kakororaoia. E ngae ngke e kabwaka Atam ao Ewa ni kakororaoa mwiokoaia are a anganaki, ma bon iai tabeman ake a karaoa te bwai are e tua te Atua nakoia. (Karikani Bwaai 1:28) E anganaki Noa kaetieti aika okoro ibukini katean te Aake, are a na kona ni kamaiuaki iai n rokon te Ieka ae korakora. E karaua raoi n tou mwini baike e tua Iehova nakoina. Ti kaitaua Noa n arona anne bwa ai iai ngaira ni boong aikai!!—Karikani Bwaai 6:14-16, 22; 2 Betero 2:5.
5 E anganaki Mote kaetieti aika okoro ibukini katean te umwanrianna ae tabu ma baireaia ibonga, ao e irii raoi nanoia. (Te Otinako 39:32; 40:12-16) Ti kakabwaiaaki naba ni boong aikai mani kakaonimakina ni kakororaoa te mwioko anne. N te aro raa? E kabwarabwaraa te abotoro Bauro bwa kanoan te Tua, boni bannani “baika raraoi aika a na roko.”—Ebera 9:1-5, 9; 10:1.
6 E kakaokoro te mwioko are e anga te Atua nakoia ana toro n te tai teuana ma teuana ibukini kakororaoan ana kantaninga. E ngae ngke a a tia ni bitaki mwiokoaia, ma a teimatoa ni karaoiroa Iehova ao a a kakabwaiaaki iai botannaomata ake a kakoauaa. E boni kaineti aei ma baike e kakororaoi Iesu ni menana i karawa ao imwina riki ni menana i aon te aba. (Ioane 4:34; 17:4) N aron naba anne, e karaoiroaki Iehova ni mwiokoara ngkai. (Mataio 5:16; wareka 1 I-Korinto 15:58.) Bukin tera bwa e kona n taekinaki anne?
KATEIMATOAAN TE IANGO AE RAOIROI NI KAINETI MA MWIOKO
7, 8. (a) Kabwarabwaraa te mwioko are a kakabwaiaaki iai Kristian ni boong aikai bwa a na karaoia? (b) Tera arora ae riai nakon ana kaetieti Iehova?
7 Ko na boni kakoauaa bwa e kamimi ngkai e kaoia aomata aika aki kororaoi Iehova bwa a na kakabwaiaaki ngkai a a riki bwa raona ni mwakuri. (1 I-Korinto 3:9) A riki bwa kaain te waaki ni kateitei ae baireaki, te koraki aika irekereke ma katean Taabo ni Botaki Ibukin Ruunga, Taabo n Taromauri ao autin nako te aobiti n tararua, n aroia naba Noa ao Mote. Ngkana tao ko onobwaia te Tabo n Taromauri n am tabo ke ko buoka kateani kautun aia tabo Ana Tia Kakoaua Iehova n te aonnaba i Warwick, New York, ma e riai n rangi ni kakawaki mwiokoam ae aron aei. (Nora te taamnei ni moan te kaongora aei.) Bon te mwioko ae tabu. Ma te bwai ae moan te kakawaki, a kaoaki Kristian bwa a na uataboa te kateitei n taamnei. E boni baireaki naba ibukini karaoiroan Iehova ao kakabwaiaaia aomata aika ongeaba. (Mwakuri 13:47-49) A katauraoaki kaetieti aika riai ibukini waakinan te mwakuri aei, n te aro ae moan te tamaroa rinanon ana botaki te Atua. N tabetai, e kona n nanonaki iai anganakia mwioko aika boou.
8 A ingainga n aantaeka n taai nako ana toro Iehova aika kakaonimaki nakon ana kairiri. (Wareka Ebera 13:7, 17.) Ti kona n aki oota raoi n te moantai bwa bukin tera ngke ti anganaki te mwioko anne. E ngae n anne, ti bon atai raoi kakabwaia ni kaineti ma boutokaani bitaki tabeua mairoun Iehova ake a riai ni karaoaki.
9. Tera aia katoto ae raoiroi unimwaane nakoia kaain te ekaretia?
9 E noraki korakoran nanoia unimwaane n te ekaretia ni kani kakororaoa nanon Iehova man aroia ni kairiri. (2 I-Korinto 1:24; 1 I-Tetaronike 5:12, 13) A kaotiota ingaingaia ni mwakuri korakora ao n teimatoa ni kakaonimaki ngkana iai bitakini baika riki nakoia. A ingainga n reiakin aanga aika boou n ara mwakuri n uarongorongoa tein Ana Tautaeka n Uea te Atua. E ngae ngke iai tabeman ake a mimi n te moantai bwa a na kangaa n nakoraoi aanga aika boou aikai ibukini bairean te uarongorongo rinanon te tareboon, n te matabaiawa, ke n aia tabo botannaomata, ma a na boni waekoa n nori mwina aika raoiroi. N te katoto, a iangoia bwaiania aika aman i Tiaman bwa a na mwakuria te aono ni bitineti are e a aki kakawaraki. E taku Michael: “Ti bon tuai mani kakaraoa te aeka ni mwakuri aei i nanon ririki aika bati, ngaia are ti rangi ni maaku. E bae n tia n ataa aei Iehova n te aro are e a anganira te bwai ae ti aki kona ni mwaninga taekana ae kakukurei ae te beku n te ingabong. Ai kukureira ngaira ngke ti ira nanon te kaetieti n Ara Mwakuri ni Minita ao ti onimakina ana boutoka Iehova!” Ko ingainga ni katai aeka n uarongorongo aika boou ake a karaoaki n am aono?
10. Baikara bitaki n ana botaki te Atua n ririki aika a tibwa nako?
10 N tabetai, a riai ni karaoaki bitaki n ana botaki te Atua. N te katoto, n ririki aika tibwa nako ao a bati aobiti n tararua aika uarereke ake a kainaki ao ni kamwaingaki nakon aobiti n tararua aika bubura riki. A rotaki taari mwaane ao aine ake a beku n aobiti n tararua aikai ni bitaki akanne. A boni karaoi bitaki naba ma a kakabwaiaaki imwin anne. (Te Minita 7:8) Ai kukureira taani mwakuri ake a anga nanoia akanne ibukini boutokaan rongorongoia ana aomata Iehova ae teimatoa ni waakinako!
11-13. Baikara kangaanga ake a kaaitarai tabeman ibukini bitaki i nanon ana botaki te Atua?
11 Ti kona ni karekei reireiara aika kakawaki mairouia te koraki ake a a tia ni kamwaingaki bwa a na beku n aobiti n tararua ake tabeua. A a tia tabeman ni kabwanina aia tai ni beku n te Betaera i nanon ririki aika bati. A tuangaki te taanga teuana are a a tia ni beku n te utu ni Betaera ae uarereke i Central America, bwa a na kaaina te utu ni Betaera i Mexico ae kaania 30 rakaia riki kaaina. E taku Rogelio: “E rangi ni kangaanga kitanaia am utu ao raoraom.” E taku Juan ae te tari te mwaane riki temanna are e tuangaki bwa e na mwaing nako Mexico: “Ai aron ae ko a manga moani moana maium ao ko riai ni karekeia am itoman aika boou. E kainnanoaki te bitaki nakoni katei aika boou ao arom n iaiango.”
12 A aitara naba ma kangaanga kaain te utu ni Betaera man aaba tabeua i Eurobe ake a tuangaki bwa a na mwaing nakon te aobiti n tararua i aon Tiaman. A ataia tabeman ake a kan taratarai maungan Switzerland aika kantara bwa bon te kangaanga irouia kitanakin te aba anne. Ao ake mai Austria, a ururingnga n te moan tai aron te maiu ae kakukurei riki i aona.
13 Ibukia te koraki ake a mwaing nakon te aba teuana, a riai n rabakau aroia ni maeka n te tabo ae boou, te mwakuri ma taari mwaane ao aine ake a aki kinaia ao n reiakina aron te mwakuri ae okoro. E kainnanoaki iai karaoan te bitaki ngkai e a boou te ekaretia, te uarongorongo n te aono ae boou, ao tao kabonganaan naba te taetae riki teuana. E kona ni kangaanga karaoan aeka ni bitaki akanne. Ma a bati kaain te utu ni Betaera ake a kukurei ni kaaitarai kangaanga akanne. Bukin tera bwa a karaoa anne?
14, 15. (a) A kangaa aomata aika bati ni kaotia bwa e rangi ni kakawaki mwiokoaia ae te beku ma Iehova n aki ongeia bwa tera te mwakuri? (b) A kangaa n riki bwa banna ni katoto aika raoiroi ibukira ni kabane?
14 E taku Grethel: “I butimwaea te kakao ibukina bwa bon anne arou ni kaotia nakon Iehova ae I bon tangiria riki nakon te aba, te auti ke te mwioko teuana.” E taku Dayska: “Ngke I iangoia bwa e roko te kakao anne mairoun Iehova, I boni butimwaeia ma te kukurei.” A kakoauaa naba anne André ao Gabriela ngke a kangai: “Mani butimwaean aei, ti a ataia bwa e a reke riki te anga ae ti na mwinibwai iai baike ti tangiri. Ti boni kakoauaa aei: ‘Ngkana a karaoaki bitaki man ana botaki Iehova, e raoiroi riki bwa ti na kukurei ni butimwaei nakon ae ti na totokoi.’”
15 Kioina ngkai a a ikotaki aobiti n tararua tabeua, a a manga mwiokoaki tabeman kaain te utu ni Betaera bwa a na beku bwa bwaiania. E karaoaki aei nakoia utu ni Betaera tabeua ngke a a ikotaki aobiti n tararua ake i Denmark, Norway ao Sweden n te aobiti n tararua i Scandinavia. Ibuakoia naakai bon Florian ao Anja ake a taekina ae kangai: “Ti iangoa mwiokoara ae boou bwa te mwakuri ae kakukurei. E rangi ni kakukurei bwa ti kabonganaaki iroun Iehova n aki ongea te tabo ae ti na beku iai. Ti kona n taekinna raoi bwa ti rangi ni kakabwaiaaki!” E ngae ngke angiina mai buakora a bae n aki rinanoni bitaki aika aron aikai, ma ti aki ngkanne kona ni kakairi n aia anganano taari mwaane ao aine akanne, ake a moanibwaia te Tautaeka n Uea? (Itaia 6:8) E aki toki Iehova ni kakabwaiaia te koraki ake e rangi ni kakawaki mwiokoaia are raoia ni beku, n aki ongeia bwa te tabo raa ae na karaoaki iai te mwakuri anne.
KATEIMATOA KUKUREIM NGKAI KO BEKU MA IEHOVA!
16. (a) Tera ae ti tuangaki n I-Karatia 6:4 bwa ti na karaoia? (b) Tera te mwioko ae moan te kakawaki ae kona n reke irouia aomata nako?
16 A kona aomata aika aki kororaoi ni kabotauia ma tabemwaang, ma e taekinaki n Ana Taeka te Atua bwa ti na kaatuua iaiangoani baika ti kona ni karaoi. (Wareka I-Karatia 6:4.) Bon akea mwiokoaia n ana botaki te Atua angiina mai buakora. Ao ti aki kona ni bwaiania ke ni mitinare ke ni beku n te Betaera ngaira ni kabane. Ni koauana, aikai mwioko aika rangi n raoiroi! Ma ti riai n aki mwaninga ae te mwioko ae moan te kakawaki ibukia aomata bon te mwakuri ae ti bane n uataboia. Ae bon te riki bwa raon Iehova ni beku n te mwakuri ni minita. Aio te mwioko ae e rangi ni kakawaki iroura!
17. Tera te bwai ae teimatoa n noraki ngkai ti a mena n te waaki ae ngkai i aon te aba, ao bukin tera ngkai e aki riai ni korakora bwaran nanora iai?
17 Ti kona n aki beku iroun Iehova n aron ae ti tangiria, ngkai ti a mena n te waaki ae ngkai i aon te aba. Ti bae n aki kona n taubaang ni kaineti ma baika a riiriki nakoira n aroni mwiokoara n ara utu, marurungira ke bwaai riki tabeua. Ma akea bukina bwa e na rotiira te bwarannano ae korakora iai. Tai kakeaa bongani wanawanam ngkai ko beku ma te Atua rinanon tataekinan arana ao kaotiotan ana Tautaeka n Uea n aanga ake ko konai. Ma ae moan te kakawaki riki, ko a kakorakorako ni beku ma ngaia n aron am kabanea ni konaa ao ko a tataroa ana kakabwaia ibukia tarim ake a kona ni karaoa ae bati riki nakoim. Uringnga bwa a rangi ni kakawaki iroun Iehova aomata nako ake a karaoiroa arana!
18. Baikara bwaai aika ti riai n tauraoi ni mwinibwai ao bukin tera?
18 E kukurei Iehova ni kabonganaira bwa raona ni mwakuri n aki ongei mamaarara ao aki kororaoira. Ai boni kakawakira mwiokoara ae te beku ma Atuara ni kabaneani boong aikai! Ngaia are ti riai n tauraoi ni mwinibwai baike ti tangiri aika bati, bwa ti ataia ae e na kariaia Iehova bwa ti na karekea “te maiu ni koaua” ae akea tokina ae kakukurei ao n rau n ana aonnaba ae boou.—1 Timoteo 6:18, 19.
19. Tera te kantaninga nakon taai aika a na roko are e a tia ni katauraoia Iehova ibukira?
19 Ngkai ti a uakaan ma rokon te waaki ae boou i aon te aba, iangoi ana taeka Mote aikai nakoia tibun Iteraera teutana te tai imwain rinia n te Aba ni Berita: ‘Ao Iehova ae Atuam E na kamwaiti am bwai man ana mwakuri baim ni kabane.’ (Te Tua-Kaua 30:9, BG) Imwin Aremaketon, a na abana te aba are e beritanna nakoia te Atua, te koraki ake a teimatoa ni beku ma ngaia. Imwin anne, ti na kaatuui ara iango ni mwiokoara ae boou, ae karaoan te aonnaba bwa te bwaretaiti ae tamaroa!