“Kaatuui Ami Iango i Aoni Bwaini Karawa”

1, 2. (a) E oti man tera bwa e ruanikai te ekaretia i Korote n te moan tienture? (b) Tera te reirei ni kariri are a anganaki taari i Korote ibukini buokaia n teimatoa n nanomwaaka?

E BON ruanikai te ekaretia ni Kristian i Korote n te moan tienture! Iai tabeman n te ekaretia ake a a kariki iraraure ni karikirakean nimtan te Tua Rinanoni Mote. Ake tabeman riki, a boutokai aia karioiango beekan ibukin te maiu ni kainnano ae irekereke ma te taotaonakinnano nakoni baika a tangiri. Ni kaitaraan reirei aika kewe aikai, e a korea ana reta ni kaungaunga te abotoro Bauro nakoia kaaini Korote ni kangai: “Kam na tarataraingkami bwa e kaawa n iai temanna ae e na raweingkami bwa konana ni wanawanan aon te aba ao n te mwamwanaa te aba ae akea uaana, ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo.”—I-Korote 2:8.

² Ngkana a kaatuui aia iango Kristian aika kabiraki akanne ni “baike a boboto iai aia waaki kaain te aonnaba,” a na bon tannako iai man ana bwaintituaraoi Iehova ibukin te kakamaiu. (I-Korote 2:20-23) Ibukini buokaia ni kawakinan aia iraorao ae kakawaki ma te Atua, e a kaumakiia Bauro ni kangai: “Kaatuui ami iango i aoni bwaini karawa, ao tiaki bwain aon te aba.” (I-Korote 3:2) Eng, a riai tarini Kristo n teimatoa n ururinga reken tibwangaia ae aki mka are e ‘kamenaaki imwaia i karawa.’—I-Korote 1:4, 5.

3. (a) Tera te kantaninga ae a teimatoa n ururingnga Kristian aika kabiraki? (b) Baikara titiraki aika ti na rinanoi n te kaongora aei?

³ N aron naba anne, a teimatoa ni kaatuui aia iango ni boong aikai Kristian aika kabiraki i aon Ana Tautaeka n Uea te Atua i karawa ao aia kantaninga are a na “uaia naba ni bwaibwai ma Kristo.” (I-Rom 8:14-17) Ma tera aroia naake a kantaningaa te maiu i aon te aba? A kangaa ni kaineti raoi nakoia ana taeka Bauro? N te aro raa ae a kona iai “tiibu tabemwaang” n teimatoa n ururingi “bwaini karawa”? (Ioane 10:16) Ti na kangaa ni bane ni kakabwaiaaki n aia katoto mwaane ake rimoa aika kakaonimaki n aron Aberaam ma Mote, ake a teimatoa ni kaatuui aia iango i aoni bwaini karawa n aki ongei kangaanga?

NANONI KAATUUAN ARA IANGO I AONI BWAINI KARAWA

4. A kangaa tiibu tabemwaang ni kona n teimatoa ni kaatuui aia iango i aoni bwaini karawa?

⁴ E ngae ngke a aki kantaningaa te nako karawa tiibu tabemwaang, ma a kona naba n teimatoa n ururingi bwaini karawa. N te aro raa? Boni mani moanibwaian Iehova ae te Atua ao baika irekereke ma te Tautaeka n Uea. (Ruka 10:25-27) Ibukini kakororaoan anne, ti a toua mwini Kristo ngkai ara banna ni katoto. (1 Betero 2:21) N aroia tarira ake n te moan tienture, ti aitara naba ma iango n rarabakau aika kewe, aia karioiango kaain te aonnaba ao ukerani bwaikorakin te maiu n ana waaki Tatan ae ngkai. (Wareka 2 I-Korinto 10:5.) Ngkai taani kakairi iroun Iesu ngaira, ti riai n aki nimatutu ni kaineti ma kawakinara mani bwaai aika a kona ni karuanikaia ara onimaki akanne.

5. Tera arora ae ti kona n tuoi iai ara iango ibukin uaiakinan bwaikorakin te maiu aei?

⁵ E a tia n urua maiura iaiangoan uaiakinani bwaikorakin te maiu aei? A otara n angiin te tai baika ti tangiri man ara iango ao ara mwakuri. E taku Iesu: “Ike e mena iai am bwai ae kakawaki, ao e mena naba iai nanom.” (Mataio 6:21) Ngkana ti kan ataia bwa e tabe ni kairira nakea nanora, ti karaoa ae raoiroi ngkana ti tuoira i bon iroura n te tai teuana ma teuana. Titirakiniko ni kangai: ‘Mwaitira au tai ae I kakabanea n iaiangoi baika irekereke ma te mwane? E koaua bwa I kabanea riki au tai ibukin tabeaiangau ni baika I kantaningai n au bitineti, au karini mwane, ke uaiakinan aaro riki tabeua ake N na mwengaraoi iai? Ke I kakorakoraai n teimatoa ni kaatuua iaiangoani bwaai n taamnei?’ (Mataio 6:22) E taekinna Iesu bwa a boni karuanikaia aia onimaki naake a moanibwaia ‘kaikoan aia bwai aika kakawaki i aon te aba.’—Mataio 6:19, 20, 24.

6. Ti na kangaa n tokanikai n ara tai ni buakani kaibwabwarun te rabwata?

⁶ E kairira aki kororaoira nakon iaiangoani baika ti namakina iai te kukurei. (Wareka I-Rom 7:21-25.) Ngkana e aki mwamwakuri i nanoni maiura te taamnei ae raoiroi mairoun te Atua, ti a kona ngkanne n anga ngaira nakon “ana mwakuri nako te rotongitong.” E kona n irekereke aei ma aeka ni mwakuri n aroni “bukamaru aika akea te taubaang iai, ma te mamanging, ma te wene ni bure, ma te aroaro ae kammaira.” (I-Rom 13:12, 13) Ngkana ti na tokanikai ni buakani “bwain aon te aba” ae nanonaki iai baike e tangiri te rabwata, ti riai n teimatoa ni kaatuui ara iango i aoni bwaini karawa. E kainnanoaki te kakorakora ni karaoan aei. Anne bukina ngke e kangai te abotoro Bauro: “I kammaraka rabwatau ao I kaaunganna.” (1 1 I-Korinto 9:27) Akea te nanououa bwa ti aki kona n ira te kabobirimwaaka ibukin te maiu ngkana ti aki tarataraira raoi! Ti na rinanoi ngkai baika a karaoi mwaane ake a kakaonimaki rimoa ibukini ‘kakukureian te Atua.’—Ebera 11:6.

“E ONIMAKINA IEHOVA” ABERAAM

7, 8. (a) Baikara kangaanga ake a aitara ma ngaai Aberaam ma Tara? (b) Tera are e kaatuua iangoana Aberaam?

⁷ Ngke e tua Iehova nakon Aberaam bwa e na mwaing ma kaaini batana nako Kanaan, e boni kukurei ni karaoa anne. Ma ibukin ana onimaki ma ongeabana, e a karaoa te berita Iehova ma ngaia ao e taku: “N na karaoiko ba te botanaomata ae ababaki, ao N na kakabaiako.” (Karikani Bwaai 12:2, BG) Ma e ngae n anne, n ririki ake imwina ao a teimatoa naba n akea natiia Aberaam ma buuna are Tara. E koaua bwa e mwanuokina ana berita Iehova are e taekinna nakon Aberaam? Irarikin anne, e kangaanga aron te maiu i Kanaan. A a tia Aberaam ma kaaini batana ni kitani mwengaia ao aia koraki i Ura, ae te kaawa ae kaubwai i Metobotamia. A mwananga nako Kanaan n te raroa ae raka i aon 1,600 te kiromita, ike a a maeka iai i nanon umwa n rianna, a nanomwaaka n tain te rongo ao a kaaitara naba ma taani kimoa. (Karikani Bwaai 12:5, 10; 13:18; 14:10-16) Ma e ngae n anne, bon akea nanoia ni kan okiri aroia ake a mwengaraoi iai i Ura!—Wareka Ebera 11:8-12, 15.

⁸ N oneani mwin are e na kaatuua iangoani “bwain aon te aba” Aberaam, e bon “onimakina Iehova.” (Karikani Bwaai 15:6, BG) Eng, e kaatuua ana iango i aoni bwaini karawa n te aro are e a iaiangoi ana berita te Atua. Ibukin anne, e a kakabwaiaaki ana onimaki Aberaam ngke e kaoti te Atua ae Moan te Rietata nakoina ao e taku: “Ko na tara karawa ngkai, ao tuangai maitin itoi ngkana tao ko kona n tuangai: ao E taku nako ina, Ai aron naba maitiia am kariki.” (Karikani Bwaai 15:5, BG) Ai boni karaunanora anne! N taai ni kabane ake e taratarai iai itoi aika bati i karawa Aberaam, e bon uringa ana berita Iehova nakoina are e na mwaitikurikuri ana kariki. Ao e bon riki te tia ruamwina n te bong are e a tia ni motikia te Atua, n aron are beritanaki.—Karikani Bwaai 21:1, 2.

9. Ti na kangaa ni kaungaaki bwa ti na teimatoa ni katabetabeira ni beku ibukin te Atua ngkana ti kakairi n ana katoto Aberaam?

⁹ Titeboo arora ma Aberaam bwa ti kakantaningaa naba kakororaoan ana berita te Atua. (2 Betero 3:13) Ngkana ti aki teimatoa ni kaatuui ara iango i aoni bwaini karawa, e na kona n taraa ni baenikai kakororaoani berita aikai iroura, ao ti kona n tabwarabwara ni karaoi mwakuri aika irekereke ma te onimaki. N te katoto, ko kakeai bwaai tabeua aika ko tangiri n taai aika nako bwa ko aonga ni katabetabeko n te mwakuri ni bwaiania ke aanga riki tabeua ake ko na karababaa nako iai am mwakuri ni minita? Ngkana ngaia anne, ko bon riai ni kamoamoaaki. Ma tera arom n taai aikai? Uringnga bwa e teimatoa Aberaam n iaiangoa “te kaawa ae iai aana ae matoatoa.” (Ebera 11:10) E “onimakina Iehova Aberaam, ao e aranaki bwa e raoiroi ibukin ana onimaki.”—I-Rom 4:3.

E NORA “TEUARE AKI NONORAKI” MOTE

10. Tera aekani maiuni Mote ngke te roro n rikirake?

¹⁰ Mote bon te mwaane riki temanna are e teimatoa ni kaatuua iangoani bwaini karawa. Ngke te roro n rikirake ngaia, e bon “reireinaki . . . n aia rabakau ni kabane I-Aikubita.” Bon tiaki te reirei ae taneiai te aba iai aei. E kaikawaaki n te utu n uea i Aikubita n te tai are e rianako iai mwaakan te kaawa anne. Ibukin anne, e a “korakora n ana taeka ao n ana mwakuri” Mote man reireiana ae rianako aei. (Mwakuri 7:22)Ai batira mwiokoana ake e a riki iai bwa te mwaane ae kakawaki man aroni kaikawaana!. Ma e ngae n anne, e kaatuua ana iango i aoni baika kakawaki riki ae boni karaoan nanon te Atua.

11, 12. Tera te reirei ae rangi ni kakawaki irouni Mote, ao ti kangaa n ataa anne?

¹¹ Ni koauana, e a kaman reiakinaki Mote man uarerekena iroun oin tinana are Iokebeta taekan Atuaia kaain te baronga ae Ebera. E rangi ni karinea te atatai ibukin Iehova ao e iangoia bwa e rangi ni kakawaki riki nakon aeka ni kaubwai riki tabeua. Ai ngaia are e a kabuai kakabwaia ma mwioko ake a na reke irouna ni maekana ni batani Barao. (Wareka Ebera 11:24-27.) Ni koauana, e kairaki bwa e na kaatuua ana iango i aoni bwaini karawa man reireiana taekan Iehova ao ana onimaki.

¹² E anganaki Mote te reirei ae te kabanea n tamaroa are e kona n reke n ana tai, ma e koaua bwa e kamanena anne ibukini katamaroaan riki mwiokoana i Aikubita, n te aro are e na kamoamoaaki, ke e na karekea kaubwaina iai? E bon aki. Ngke arona bwa e karaoa anne, e na bon aki “rawa n atongaki ngke e a ikawai bwa natin natini Barao te aine, ma e rinea ae e na bwainikirinaki ma ana aomata te Atua, nakon are e na reke irouna te kimwareirei ae kai toki ae kakukurein te bure.” E teretere raoi bwa e kamanena reireiana ni bwaai n taamnei ibukini moanibwaian ana kantaninga Iehova.

13, 14. (a) Tera are e buoka Mote bwa e aonga n tau ibukin mwiokoana are e na anganna Iehova? (b) Tera ae ti riai ni karaoia n aron naba Mote?

¹³ E rangi n tangira Iehova ma Ana aomata Mote. Ngke ai 40 ana ririki, e bon iangoia bwa e a tauraoi n ibuobuoki ni kainaomataaia ana aomata te Atua man tautoronakia i Aikubita. (Mwakuri 7:23-25) Ma e ataia Iehova bwa e tuai tauraoi Mote ibukini karaoan aei. E riai ni karikirakei aroaro n aron te nanorinano, te taotaonakinnano, te nimamannei ao te taubaang. (Taeka N Rabakau 15:33) E kainnanoa te kataneiai ibukini katauraoana bwa e na nanomwaaka i aani kataaki ao kangaanga n taai ake imwaina. E bon reke te kataneiai anne ngke e riki bwa te tia kawakintiibu i nanon tatabebwi te ririki n nako ike e a karikirakei iai aroaro ake e karineaki iai te Atua.

¹⁴ E koaua bwa e reke reireiana man rikina bwa te tia kawakintiibu? Eng e bon reke! E taekinaki n Ana Taeka te Atua bwa e riki Mote bwa te aomata ae “nimamanei riki nakoia aomata ni kabaneia aika mena i aonaba.” (Warekaia Iteraera 12:3, BG) Ibukina bwa e a tia n reiakina te nanorinano, e a buokaki iai bwa e na taotaona nanona nakoia aomata aika kakaokoro ma aia kangaanga. (Te Otinako 18:26) N aron naba anne, tao ti riai ni karikirakei aroaro ni Kristian aika a na buokira n rinanon “te rawawata ae korakora” nakon ana waaki ae boou te Atua i aon te aba ae raoiroi. (Te Kaotioti 7:14) Ti kona n nakoraoi ma aomata n ikotaki naba ma naake ti iangoiia bwa a kakaiun ke a rangi ni kai maneang? Ti wanawana ngkana ti mutiakin ana taeka te abotoro Betero, are e kaumakiia raao n te onimaki ni kangai: “Karineia aeka n aomata nako, tangiriia tarimi nako i nanon te onimaki.”—1 Betero 2:17.

TEIMATOA NI KAATUUI ARA IANGO I AONI BWAINI KARAWA

15, 16. (a) E aera ngkai e rangi ni kakawaki kateimatoaani kaatuuan ara iango i aoni baika eti? (b) Bukin tera bwa e kakawaki irouia Kristian kateimatoaan aroaroia aika raraoi?

¹⁵ Ti a maeka i nanon “taai aika okoro aika karuanikai.” (2 Timoteo 3:1) Mangaia are ngkana ti kan teimatoa n taratara raoi ni kaineti ma ara onimaki, ti riai n teimatoa ni kaatuui ara iango i aoni baika eti. (1 I-Tetaronike 5: 6-9) Iangoia bwa ti na kangaa ni karaoa anne n iterani maiura aika tenua.

¹⁶ Aroarora: E ataa kakawakin te aroaro ae raoiroi Betero. E taku: “Kateimatoai raoiroin aroaromi i buakoia kaain te aonnaba, bwa . . . ibukin noran ami mwakuri aika raraoi, ao a na manga neboa te Atua iai.” (1 Betero 2:12) Ngkana tao ti mena ni mwengara, n te tabo ni mwakuri, n te tabo n reirei, ti kaakibotura, ke ti karaoa te mwakuri ni minita, ma ti bon riai ni kabanei korakorara ni karekea neboan Iehova n aroarora aika raraoi. Ni koauana, ti kakaraoi baika kairua kioina ngkai ti aki kororaoi. (I-Rom 3:23) Ma ngkana ti teimatoa ni “buaka n te buaka ae raoiroi ibukin te onimaki,” ti a kona n tokanikai iai ni buakana aki kororaoira.—1 Timoteo 6:12.

17. Ti na kangaa ni katotonga ana iango Kristo Iesu? (Nora te taamnei ni moan te kaongora aei.)

¹⁷ Ara iango: E rangi n irekereke kateimatoaan te aroaro ae raoiroi ma karekean te iango ae eti. E taku te abotoro Bauro: “Kateimatoa te iango aei i nanomi ae mena naba i nanoni Kristo Iesu.” (I-Biribi 2:5) Tera anuan Iesu? E bon nanorinano. E kairaki man nanorinanona aei bwa e na karaoa ana kabanea n tamaroa ibukin Iehova. E moanibwai riki n ana iango tataekinan te rongorongo ae raoiroi ae taekan Ana Tautaeka n Uea te Atua nakoia aomata nako. (Mareko 1:38; 13:10) E iangoaki Ana Taeka te Atua iroun Iesu bwa te kabanea ni mwaaka. (Ioane 7:16; 8:28) E taningamarau n ukeuke n reirei n te Koroboki ae Tabu bwa e aonga ni kona ni mwaneweia, ni boutokaia ao ni kabwarabwaraa. Kioina ngkai ti nanorinano ao n ingainga n ara mwakuri ni minita ma ara ukeuke n reirei n te Baibara i bon iroura, ti a kona iai ni kakairi riki irouni Kristo n arora n iaiango.

18. Tera te anga ae kakawaki ae ti kona ni boutokaa iai ana mwakuri Iehova?

¹⁸ Ara boutoka: Bon ana kantaninga Iehova bwa a na “bane bubuaniwae ni katorobubua n aran Iesu, ake bubuaniwaeia kaaini karawa, [ma] kaain aon te aba.” (I-Biribi 2:9-11) E ngae naba ngke e rietata nakoan Iesu, ma e nanorinano n aantaeka ni karaoa nanon Tamana, ao ti riai naba ngaira ni kakairi irouna. (1 I-Korinto 15:28) N te aro raa? Ti riai ni boutokaa te mwakuri are ti a tia ni mwiokoaki bwa ti na karaoia ma nanora ni kabane, ae ‘reireinaia aomata mai buakoia botannaomata nako bwa a na riki bwa taan rimwin Iesu.’ (Mataio 28:19) Irarikin anne, ti kani “kakaraoa ae raoiroi nakoia aomata ni kabane” ao nakoia naba kaain rarikira ao taari.—I-Karatia 6:10.

19. Tera ae ti riai ni motinnanoia bwa ti na karaoia?

¹⁹ Ai boni kakaitaura ngaira ngkai e kauringira Iehova bwa ti na teimatoa ni kaatuui ara iango i aoni bwaini karawa! N ururingan anne, ti riai ni “kananomwaakaira ni biri n te kabobirimwaaka are e kamenaaki imwaira.” (Ebera 12:1) Ti bia bane ni mwakuri ma ‘nanora ni kabane ibukin Iehova,’ ao e na boni kakabwaiai ara kakorakora ni kabane Tamara are i karawa.—I-Korote 3:23, 24.