E Karekei Iehova Kaniwangaia te Koraki Ake A Ingainga n Ukoukoria

1, 2. (a) E kangaa n irekereke te tangira ma te onimaki? (b) Taekin titiraki aika ti na rinanoi.

TI TANGIRA Iehova “ibukina bwa e tangirira moa.” (1Ioa. 4:19) N aron ae taekinaki ibukin ana tangira Iehova, e biririmoa ni kakabwaiaia ana toro aika kakaonimaki ni koaua. Ngkana e korakora riki tangiran Atuara iroura, e a korakora riki iai ara onimaki, tiaki tii ibukina ngkai iai ngaia, ma ibukina ngkai e na boni karekei kaniwangaia akana e tangiriia.​—Wareka Ebera 11:6.

² Bon te tia anga te kaniwanga Iehova! Bon aei te bwai ae kakawaki ibukin ataakina ao baike e karaoi. E aki bwanin raoi ara onimaki ngkana ti aki kakoauaa raoi ae e na anga te kaniwanga te Atua nakoia akana kakorakoraia n ukoukoria, ibukina bwa “te onimaki bon te aki nanokokoraki ni kariai baika kantaningaaki.” (Ebera 11:1) Eng, e irekereke te onimaki ma kariariaani kakabwaia ake e beritan te Atua. Ma ti na kangaa ni kakabwaiaaki ni kantaningaan te kaniwanga? E kangaa Iehova n angania ana toro kaniwangaia n taai ake rimoa ao ngkai? Ti na noria.

E BERITA IEHOVA BWA E NA KAKABWAIAIA ANA TORO

3. Tera te berita ni Maraki 3:10?

³ E berita Iehova ae te Atua bwa e na kakabwaiaia ana toro aika kakaonimaki, ngaia are e kaoira bwa ti na anganna ara kabanea n tamaroa ao n onimakinna bwa e na boni kakabwaiaira. Ti wareka ae kangai: “‘Tuoai taiaoka, . . . ’ bon ana taeka Iehova ae Atuaia taanga ni buaka, ‘n noria bwa tao N na kauki nakoimi mataroani karawa ao ni kabwaroa i aomi te kakabwaia ni karokoa aki rekeni nnena ke N na aki.’” (Maraki 3:10) Ti kaota nanora ni kakaitau ae korakora ao ni kukurei ngkana ti butimwaea ana kakao Iehova.

4. Ti na kangaa n onimakina ana berita Iesu ni Mataio 6:33?

⁴ E berita Iesu nakoia taan rimwina bwa ngkana a moanibwaia te Tautaeka n Uea, e na boni boutokaiia te Atua. (Wareka Mataio 6:33.) E kona ni kakoauaaki ana berita Iesu anne, ibukina bwa a kokoro bukin ana berita Iehova. (Ita. 55:11) Ti kona naba ni kakoauaa ae ngkana ti kaota onimakinan raoi Iehova, e na boni kakororaoa ana berita aei: “N na bon aki kaakiko ao N na bon aki kitaniko.” (Ebera 13:5) Ti kona ni kairekerekea te taeka ane kairaki koreana n te taamnei anne ma ana taeka Iesu, ibukin ukoukorani moa te Tautaeka n Uea ao ana raoiroi te Atua.

5. E aera bwa e kakorakoraa te onimaki ana kaeka Iesu nakoni Betero?

⁵ E titirakina ngkoa Iesu te abotoro Betero ni kangai: “Ti a tia ni kaaki bwaai ni kabane ao n rimwim, tera ngkanne ae e a mena imwaira?” (Mat. 19:27) N oneani mwin are e na boaa Betero Iesu ibukin ana titiraki anne, e tuangia taan rimwina bwa a na anganaki kaniwangaia ngkai a anga ngaiia. A na tautaeka ma ngaia i karawa abotoro ake a kakaonimaki ao tabeman riki. Ma bon iai naba ngkai taiani kaniwanga. E taku Iesu: “Ane e kitana mwengana ke tarina ke mwaanena ke tamana ke tinana ke natina ke abana ibukin arau, e na anganaki baikai 100 riki te tai mwaitina, ao e na karekea naba te maiu are aki toki.” (Mat. 19:29) A na karekei kakabwaiaaia aika raka riki taan rimwina ibukin aroia n anga ngaiia n aron aia konaa. Tiaki bwa a rangi ni kakawaki riki tamara, tinara, tarira, mwaanera ao natira n te onimaki, nakoni bwaai nako ake ti a tia ni kaaki taekaia ke ni kanakoi ibukin te Tautaeka n Uea?

“ATINRONI MAIURA”

6. E aera bwa e berita Iehova nakoia taan taromauria bwa e na angania kaniwangaia?

⁶ Kioina ngkai e berita Iehova bwa e na angania taan taromauria te kaniwanga, e a buokiia iai n teimatoa ni kaaitarai kataakin etin aroia. A reke kakabwaia n taamnei aika bati ngkai irouia ana toro aika kakaonimaki Iehova ae te Atua, n ikotaki naba ma te ingainga ni kantaningai kakabwaia aika moan raraoi riki n taai aika a na roko. (1Tim. 4:8) Eng, ti na buokaki n tei n nene n te onimaki ngkana ti kakoauaa raoi ae Iehova “bon te tia karekei kaniwangaia te koraki ake a ingainga n ukoukoria.”​—Ebera 11:6.

7. N te aro raa ae titeboo iai te kantaninga ma te atinro?

⁷ E taku Iesu n ana Kabwarabwara i aon te Maunga: “Kam na kakatonga ao kam na rangi ni kimwareirei, bwa e rianako kaniwangami i karawa, bwa bon anne naba aroni bwainikirinaia burabeti ake rimoa.” (Mat. 5:12) Irarikia naake a na karekea te kaniwanga ae te nako karawa, iai te kantaninga ibukin te maiu ae aki toki n te aonnaba ae bwaretaiti. Aio bukina raoi ae “[ti] na kakatonga ao [ti] na rangi ni kimwareirei” iai. (TaiAre. 37:11; Ruka 18:30) A kona n riki kantaninga akana uoua akanne bwa “atinroni maiura ae koaua ao e nene ni matoa.” (Ebera 6:17-20) N aron te atinro ae kateimatoa te kaibuke bwa e na aki betinako n tain te angibuaka, e kona te kantaninga ae nene ibukin te kaniwanga ni buokira n teimatoa n aki kaingingaki n ara namakin, n ara iango, ao n ara onimaki. E kona naba ni kakorakoraira n nanomwaaka i aani kangaanga.

8. E na kangaa ara kantaninga ni kakerikaaka raraomara?

⁸ E kona ara kantaninga ae boto man te Baibara ni kakerikaaka raraomara n te tai aei. A riki ana berita te Atua bwa kaanga te kabira mairouna ae kabebetei nanora aika raraoma. Ai bebetera ngaira ngkana ti ‘kaaki rawawatara i aon Iehova,’ n ataakin ae ‘e na kateimatoaira’! (TaiAre. 55:22) Ti kona ni kakoauaa raoi bwa e kona te Atua ni karaoa ae “rangi ni bati riki . . . nakon are ti bubutii ke are ti iangoia.” (IEbe. 3:20) Iangoia bwa e aki tii bati ke ni bati riki, ma e “rangi ni bati riki”!

9. Ti na kangaa ni kakoauaa raoi bwa e na kakabwaiaira Iehova?

⁹ Ngkana ti kani karekea te kaniwanga, ti riai n kaota onimakinan raoi Iehova ao n ongeaba n ana tua. E taku Mote nakon te natannaomata ae Iteraera: “E na boni kakabwaiaingkami Iehova, n te aba ae e a anganingkami Iehova ae Atuami bwa kam na taua bwa abami, ma tii ngkana kam bon ongo raoi ni bwanaan Iehova ae Atuami, ao ni kakairi raoi n tuua aikai ni kabane aika I anganingkami n te bong aei. Bwa e na kakabwaiaingkami Iehova ae Atuami n aron are e beritanna nakoimi.” (TuaKau. 15:4-6) Ko kakoauaa raoi bwa e na kakabwaiako Iehova ngkana ko teimatoa ni kakaonimaki n toro irouna? Ko kona ni kakoauaa raoi aei.

IEHOVA BON TE TIA ANGANIA KANIWANGAIA

10, 11. Tera aron Iehova ni kakabwaiaa Ioteba?

¹⁰ E koreaki te Baibara ibukini kakabwaiaara. A bati iai rongorongon aron te Atua n angania ana toro aika kakaonimaki kaniwangaia. (IRom 15:4) Ioteba bon te banna ni katoto iai ae rianako. E kabureaki i Aikubita ibukin aia waaki ni kamwane tarina ao imwin naba ana kabuakaka buun ana toka. E koaua bwa e kitanaki iroun te Atua? E bon aki! “E memena Iehova iroun Ioteba ao e kaokaota nakoina te tangira ae koaua . . . E memena Iehova iroun Ioteba ao e kanakoraoi bwaai ni kabane Iehova ake e karaoi teuaei.” (KBwaai 39:21-23) E taotaona nanona Ioteba ni kantaningaa Atuana n ana tai ni kataaki akanne.

¹¹ N ririki ake imwina, e a kainaomataaki Ioteba man te karabuuti irouni Barao ao e riki te toro ae mangori aei bwa te kauoman i aan uean Aikubita. (KBwaai 41:1, 37-43) Ngke a bungiaki natin Ioteba aika uoman mwaane, “e arana te karimoa Ioteba bwa Manate bwa e taku, ‘E a tia te Atua ni kariaia bwa N na mwaninga taekan rawawatau ni kabane ao kaaini batan tamau ni kabane.’ Ao e arana te kauoman bwa Eberaim bwa e taku, ‘E a tia te Atua ni kabatiaia au kariki n te aba ae I karawawataaki iai.’” (KBwaai 41:51, 52) Ibukin teimatoan Ioteba ni kakaonimaki ni koaua nakon te Atua, e a anganaki kaniwangana are e a kona ni kamaiuia tibun Iteraera ao I-Aikubita. Te bwai ae kakawaki n aei bwa e ataia Ioteba ae bon Iehova are anganna kaniwangana ao ni kakabwaiaa.​—KBwaai 45:5-9.

12. E kangaa Iesu n teimatoa ni kakaonimaki i aani kataaki?

¹² N aron naba anne, e teimatoa Iesu Kristo n ongeaba iroun te Atua ngke e rinanoni kataaki aika kakaokoro ibukin ana onimaki, ao e bon anganaki kaniwangana. Tera are e buokia n tokanikai iai? Aio kabwarabwaraana n Ana Taeka te Atua: “E nanomwaaka nakoni matena i aon te kai ni kammaraki ibukin te kimwareirei are kamenaaki imwaina, n aki mutiakina kamaamaeana.” (Ebera 12:2) E boni karekea kukureina Iesu ngkai e katabua aran te Atua. Irarikin anne, e karekea akoana iroun Tamana ao mwioko aika rangi n raraoi aika bati. E taekinaki n te Baibara bwa e “tekateka i angaatain ana kaintokanuea te Atua.” Ao ti wareka aei n te kibu riki teuana: “E a karietataaki iai iroun te Atua nakon te nakoa ae rietata riki ao e akoaki naba n anganaki te ara ae kakannato riki nakon aara nako.”​—IBir. 2:9.

E AKI MWANUOKIN ARA MWAKURI IEHOVA

13, 14. Tera ana namakin Iehova n te bwai ae ti karaoia ibukina?

¹³ Ti kona ni kakoauaa bwa Iehova e butimwaei ara kakorakora ni kabane ni kaineti ma ara beku ibukina. E atai tabeaiangara ao nanokokorakira. E nanoangaira ngkana ti karawawataaki n aki taun ara mwane, aorakira, ke ngkana e tutukaki ara beku ae tabu irouna n ara namakin. Ao ti kona ni kakoauaa raoi ana nanoanga Iehova ni baika a karaoi ana toro bwa a aonga n teimatoa ni kakaonimaki nakoina.​—Wareka Ebera 6:10, 11.

¹⁴ Uringnga naba, bwa ti kona ni kawara “te tia Ongo te tataro” ao n onimakinna raoi bwa e na ongoraei tabeaiangara. (TaiAre. 65:2) E na tituaraoi “te Tama ae nananoanga ao te Atua ae anga te kabebetenano n aekana nako” n anganira te kabebeteaki ao kakorakoraan ara onimaki ae ti kainnanoia, tao rinanoia raora n te onimaki. (2Kor. 1:3) E kimwareirei nanon Iehova ngkana ti nanoangaiia tabemwaang. “Ane e akoiia akana kainnano ao e kataaraua Iehova, ao E na angan te aomata anne booni mwin te bwai ae e karaoia.” (TaeRab. 19:17; Mat. 6:3, 4) Ngaia are ngkana ti tituaraoi ni buokiia naake iai aia kangaanga, e na iangoi ara mwakuri aika raraoi Iehova bwa kaanga ana taarau iroura. Ao e berita bwa e na kabooa mwin te akoi anne.

KANIWANGA NGKAI AO N AKI TOKI

15. Taekini kaniwanga aika ko ingainga ni kariariai. (Nora te taamnei ni moan te kaongora aei.)

¹⁵ A kateimatoaaki Kristian aika kabiraki n te kantaninga are a na karekea ‘te baunuea ibukin te raoiroi, are e na angania bwa kaniwangaia n te bong arei te Uea ae te tia motikitaeka ae raoiroi.’ (2Tim. 4:7, 8) Ma tiaki nanona bwa ai akea bongam ngkana e anganiko kaniwangam ae kaokoro te Atua. Iai mirion ma mirion ana “tiibu tabemwaang” Iesu aika ingainga ni kantaningaa te kaniwanga n te tai ae imwaia ae te maiu n aki toki n te aonnaba ae bwaretaiti. Ikanne are “e na korakora kimwareireia n te rau ae bati.”​—Ioa. 10:16; TaiAre. 37:11.

16. Tera kabebeteara n 1 Ioane 3:19, 20?

¹⁶ Ti kona n tabetai n namakina ae ti karaoa ae uarereke, ke ti bae n iangoia bwa tao e kukurei Iehova n ara kakorakora ke e aki. Ti bae naba n nanokokoraki bwa ti tau ni karekea te aeka ni kaniwanga teuana ke ti aki. Ma ti bia uringnga n taai nako bwa “e rianako riki aron te Atua nakon nanora ao e atai bwaai ni kabane.” (Wareka 1 Ioane 3:19, 20.) E na anga te kaniwanga ibukin ara beku ae tabu ibukina, ae ueke mai nanora ibukin onimakinana ao tangirana, e ngae naba ngkana e taraa n aki kakawaki iroura te bwai ae ti karaoia.​—Mareko 12:41-44.

17. Taekini kaniwanga tabeua aika ti karekei ngkai.

¹⁷ E boni kakabwaiaia naba ana aomata Iehova ni kabaneani boong aika rotongitong n ana waaki ae buakaka ae ngkai Tatan. E taraia raoi bwa a na maiureirei taan taromauria ni koaua ni bwaai n taamnei n aron ae e tuai n nonoraki ma rimoa. (Ita. 54:13) N aron are e beritanna Iesu, e na anganira kaniwangara Iehova ngkai ae te utu ae kakukurei ae kaainaki irouia tarira n te onimaki ni katobibia te aonnaba. (Mareko 10:29, 30) Irarikin anne, a na anganaki te koraki ake a ukoukora te Atua ma nanoia ni koaua kaniwangaia aika akea kabotauaia ae te raunnano, te kabebeteaki, ao te kimwareirei.​—IBir. 4:4-7.

18, 19. Tera aia namakin ana toro Iehova ibukini kaniwangaia ake a reke irouia?

¹⁸ A kona ana toro Iehova ni katobibia te aonnaba n nori koauan kaniwanga aika raraoi ake a karerekei mairouna. N te katoto, e taku Bianca mai Tiaman: “E aki boraoi au kakaitau nakon Iehova ma ana ibuobuoki ibukin raraomau ao memenana i rarikiu. E a mangaongao ao n aki kona n nakoraoi te aonnaba aei. Ma ngkai I a beku n te aro ae kaan ma Iehova, I a namakinna bwa I a mwaneaki raoi i nanoni baina. N taai ake I kakeaai n taona nanou iai ibukina, e a anganai kakabwaia aika tebubua riki mwaitiia.”

¹⁹ Ke iangoa Paula ae 70 ana ririki ae kaaini Kanata are e rangi ni karako baike e kona ni karaoi ibukin aorakina ae te spina bifida are e aki kona n nakonako iai. E taku neiei: “Tiaki nanona bwa ngkana e karako kakammwakurin rabwatam ao e nang karako naba iai am mwakuri ni minita. I kamanenai aanga n uarongorongo aika kakaokoro n aron te tareboon ao te uarongorongo n te tai ae aki baireaki. Ibukini kakaungaau, I kawakina au boki ae uarereke ae iai kiibu i nanona ao reirei man ara boki ake I kona n okiokiri n te tai teuana ma teuana. I aranna bwa ‘Au Boki ni Kamaiu.’ E kai toki te bwarannano ngkana ti kaatuui ara iango i aon ana berita nako Iehova. E tauraoi ni buokira n taai nako Iehova n aki ongei baika riki nakoira.” E kona ni kaokoro te bae riki nakoim ma are irouni Bianca ke Paula. Ma e ngae n anne, ko bae n iangoi aanga ake e a tia n anganiko kaniwangam iai Iehova ao naake i rarikim naba. Ai raoiroira iaiangoan aron Iehova n anganiko kaniwangam ngkai, ao n te tai ae e na roko!

20. Tera ae ti kona ni kantaningaia ngkana ti teimatoa ni beku ibukin Iehova ma nanora ao korakorara ni kabane?

²⁰ Uringnga bwa e na reke te “kaniwanga ae rangi ni bubura” man am tataro ma nanom ni koaua ao arom n taetae ma te Atua n aki maaku. Ko kona ni kakoauaa ae e na ‘reke iroum kakoroani bukin te berita, ngkana ko a tia ni karaoa nanon te Atua.’ (Ebera 10:35, 36) Ngaia are ti bia teimatoa ngkai ni kakorakorai ara onimaki ao ni beku ma nanora ao korakorara ni kabane nakon Iehova. Ti kona ni karaoa anne n ataakin ae ti na karekea kaniwangara ae ti tau ni karekea mairoun Iehova.​—Wareka I-Korote 3:23, 24.