Iehova Bon Te Tia “Karekea Kaniwangaia Akana A Ukeria”
“Ngkana iai ae e kan nakon te Atua, ao e riai ni kakoaua ba iai te Atua, ae e karekea kaniwangaia akana a ukeria.”—EBERA 11:6, BK.
1, 2. Bukin tera ngkai a kona ni kekeiaki ana toro Iehova tabeman ribuakon karawawataaia?
“I A TIA n riki bwa Ana tia Kakoaua Iehova n te maan ae kaania 30 te ririki, ma e tuai n reke irou namakinan ae I riai n aranaki n te ara aei. E ngae ngke I a tia ni karaoa te mwakuri ni bwaiania ao n anganaki naba mwiokoau aika bati, ma bon akea naba mai buakoni baikai ae e anganai te namakin are N na kakoauaa raoi iai bwa I a kona n atongaki bwa te tia kakoaua,” akanne ana taeka Nei Barbara.a E taekina naba ae titeboo ma anne Keith ngke e kangai: “I namakinna n taai tabetai bwa I aki tau n atongaki bwa kaain te botaki aei, ibukina bwa a mwaiti bwaai aika a kukukurei iai ana toro Iehova, ao ngai akea. E a karekea irou namakinan ae bon te tia bure ngai, ai ngaia are I a rawawata riki iai.”
2 A mwaiti ana toro Iehova ngkoa ao ngkai, aika a kekeiaki ribuakon iango aika titeboo ma aikai. Ko a tia n namakina aei n taai tabetai? E kona n ae ko taonaki nako n te rawawata teuana imwin teuana, ao raom n onimaki a taraa n nakoraoi maiuiia, a inaaomata ao a kukukurei. Ao n tokina ko a kona n iangoia bwa e aki tangiriko Iehova ao e aki naba tabeakiniko. Tai waekoa n iangoia bwa e eti am iango anne. E karau nanora te Baibara ni kangai: “E aki rawa iroun te kainnano, e aki kaki taekana, e aki tannako mairouna, ma e ongo ngkana e weteia.” (Taian Areru 22:24, BK) A kaotaki n taetae ni burabeti ibukin te Mesia, bwa e aki tii kakauongo Iehova nakon tangiia aika kakaonimaki, ma e karekea naba kaniwangaia.
3. Bukin tera bwa ti aki kona ni kamanoaki man kangaangan te waaki ae buakaka ae ngkai?
3 Bon akea ae kamanoaki man kangaangan te waaki ae buakaka ae ngkai, ao ai uana naba ma ana aomata Iehova. Ti maeka ngkai n te aonnaba ae tauaki taekana iroun teuare mataniwia ana kairiribai Iehova are Tatan te Riaboro. (2 I-Korinto 4:4; 1 Ioane 5:19) N onean mwin are a na kamanoaki ana toro Iehova n aaro aika kamimi, a a maamatanaki riki iroun Tatan. (Iobi 1:7-12; Te Kaotioti 2:10) Mangaia are ti riai n ‘taotaon nanora i buakon te rawawata’ ao ni “botumwaka n tataro,” ni karokoa rokon te tai are e a tia ni baireia te Atua. (I-Rom 12:12) E aki riai iangoan ae e aki tangirira te Atua ae Iehova!
Katoto Rimoa ni Kaineti ma te Nanomwaaka
4. Taekin katoto tabeua ibukia ana toro Iehova aika kakaonimaki ake a a tia n botumwaaka i aan karawawataaia.
4 A mwaiti ana toro Iehova rimoa ake a nanomwaaka i aani karawawataaia. N te katoto, e “bati n nanomaraki” Nei Anna ibukin akean natina, ao e a iangoia neiei bwa titeboo ma e a mwanuokinaki iroun te Atua. (1 Tamuera 1:9-11) Ngke e a ukoukoraki Eria iroun te Uea n aine ae Nei Ietebera bwa e na tiringnga, ao e a rangi ni maaku ngaia are e a tataro nakon Iehova ni kangai: “E a tau; Iehova, Ko na anaa maiuu ngkai; ba I aki raoiroi riki nakoia au bakatibu.” (1 Uea 19:4) E a tia naba te abotoro Bauro n rotaki n te rawawata ae rangi ni korakora ibukin aki-kororaoina ao e taku: “Ngkana I kani karaoa ae raoiroi, ao ae i rou naba te buakaka.” E a manga taku riki: “Te aomata ae e kai nanou ngai!”—I-Rom 7:21-24.
5. (a) Tera kaniwangaia Nei Anna, Eria, ao Bauro? (b) Tera kabebeteara ae kona n reke man ana Taeka te Atua, n taai ake ti kekeiaki iai ma iango aika karawawataira?
5 E koaua bwa ti ataia ae a botumwaaka Nei Anna, Eria, ao Bauro n aia tai ni beku ibukin Iehova, ao E kabatiai kakabwaiaaia. (1 Tamuera 1:20; 2:21; 1 Uea 19:5-18; 2 Timoteo 4:8) A kekeiaki ribuakon aroaroia aomata aika kakaokoro nako n ikotaki naba ma te nanokawaki, te bwarannano ao te maaku. Mangaia are ti riai n aki kubanako ngkana ti namakina te karawawataki n taai tabetai. Ma tera ae ko na karaoia, ngkana e a kananououako raraomaeakinan bwain te maiu aei, bwa e bon tangiriko Iehova ke e aki? E kona ni kabebeteko ana Taeka te Atua. N te katoto, n te kaongora ae imwain aei, ao ti maroroakina iai ana taeka Iesu are “a bane naba ni warekaki iranatumi,” iroun Iehova. (Mataio 10:30) E kaotaki man taeka ni kaunganano akanne bwa e rangi n tabeakinia ana toro Iehova n tatabemania nako. Uringa naba ana kaikonaki Iesu ibukia tibaaro. Ngkana ngaia bwa Iehova e nora bwakan temanna mai buakoia maan aika uarereke aikai nako aontano, bukin tera ngkanne bwa e na aki tabeakina rawawatam?
6. E na kanga n riki te Baibara bwa nibwan te kabebetenano, nakoia te koraki ake a kekeiaki ribuakon rawawataia?
6 Te koaua bwa ngaira aika ti aki-kororaoi, ti boni kakawaki naba iroun te tia Karikiriki ae korakora mwaakana ae Iehova ae te Atua? Eng! A mwaiti mwakoron te Baibara aika a karau nanora n aei. Ngkana ti maiuakini baika a taekinaki ni mwakoron te Baibara aikai, ti a kona iai ngkanne n taekin ana taeka te tia areru aika kangai: “Ngkana a bati au iango n raraoma i nanou, ao a kabebetea tamneiu am nanoanga.” (Taian Areru 94:19) Ti na rinanon ngkai taeka ni kabebetenano tabeua man ana Taeka te Atua, ake a na kona ni kaotaira raoi bwa ti boni kakawaki iroun te Atua, ao e na boni kakabwaiaira ngkana ti teimatoa ni kaakaraoa nanona.
‘Ana Bwai’ Iehova
7. Tera te taetae ni burabeti ae kaunganano are e anga Iehova rinanon Maraki, nakon te botannaomata are e babakanikawai?
7 E riki te bwai teuana ae rangi ni buakaka i buakoia I-Iutaia i nanon te kanimaua n tienture B.C.E. A kariaia ibonga bwa a na kareanaki maan aika a aki tau ibukin te karea, ao a anga i aon ana baonikarea Iehova. A kaotiota te inanonano taani motikitaeka. E a taabangaki te tabunea, te kewekewe, karawawataaia aomata, ao te wene ni bure. (Maraki 1:8; 2:9; 3:5) E taekina te taetae ni burabeti ae kamimi Maraki nakon te natannaomata ae e aki-ako aei. Tabeua te tai imwina, ao ane e na kaoka aroaroia ana aomata Iehova nakon ae e tangiria. Ti wareka ae kangai: “A na riki ba au aomata, bon ana taeka Iehova Tabaota, n te bong ae N na karaoia aika bon au bwai; ao N na nanoangaiia, n ai aron te aomata ae nanoangaea natina ae bebeku irouna.”—Maraki 3:17, NW.
8. Bukin tera ngkai e kona n taekinaki Maraki 3:17 bwa te reirei ae kaineti nakoia te koraki ae uanao?
8 Iai kakoroan nanon ana taetae ni burabeti Maraki ni boong aikai, ae irekereke ma Kristian ake a kabiraki are te botannaomata ae 144,000 mwaitiia. ‘Bon ana bwai’ Iehova te botannaomata aei. (1 Betero 2:9) E riki ana taetae ni burabeti Maraki bwa te bwai ni kaunganano naba nakon te “koraki ae uanao,” ake a “tei i nanoaan te kaintokanuea, ao i matan te Tiibutetei, ao a kunnikaiia n ninira aika mainaina.” (Te Kaotioti 7:4, 9) A a riki bwa tii tenanaina koraki aikai i aan te tia Kawakin tiibu ae Iesu Kristo.—Ioane 10:16.
9. Bukin tera ngkai e atongia ana aomata Iehova bwa ‘ana bwai’?
9 Tera ana iango Iehova ibukia te koraki ake e rineiia bwa a na beku irouna? N aron ae taekinaki ni Maraki 3:17, NW, titeboo iangoaia irouna ma ana iango te tama ae tatangira nakon natina. Ao nora ana taeka ni kamoamoaiia ngke e kabwarabwaraa taekaia ana aomata bwa “bon ana bwai.” N rairai riki tabeua, a rairaki taeka aikai nakon, “oin au bwai,” “au bwai ae rangi ni manena,” ao “au bwai ae kakawaki.” Bukin tera Iehova bwa e iangoia te koraki ake a beku irouna bwa a rangi ni kakawaki? Bukina teuana, bon te Atua ngaia ae akoi. (Ebera 6:10) E kaania ao e iangoia te koraki ake a beku irouna ma nanoia ni koaua, bwa a kakawaki.
10. E kanga Iehova ni kamanoia ana aomata?
10 Ko kona n iangoa am bwai teuana ae rangi ni kakawaki iroum? Ni koauana ko na boni kakorakorako ni kawakinna raoi. E karaoa naba anne Iehova ma “ana bwai.” E aki kamanoia ana aomata man kataaki ao kabuanibwai ni kabane i aon te maiu aei. (Te Minita 9:11, BK) Ma e boni konaa, ao E na boni kawakina aia onimaki ana toro aika kakaonimaki. E angania te korakora are a kainnanoia bwa a aonga ni botumwaaka i aani kataaki. (1 I-Korinto 10:13) Mangaia are a tuangaki ana aomata te Atua, ake kaain Iteraera rimoa iroun Mote ni kangai: “Kam na korakora ao kam na ninikoria. . . . Iehova ae Atuam, boni Ngaia ae airi ma ngkoe; E na bon aki kakiko, ao E na bon aki kitaniko.” (Te Tua-Kaua 31:6) E akoakoia ana aomata Iehova. A a riki bwa “bon ana bwai.”
Bon te Tia ‘Karekea te Kaniwanga,’ Iehova
11, 12. Ti na kanga ni buokaki ni kararoai iango n nanououa n otara n nakoan Iehova ae boni ngaia te tia Karekea kaniwangara?
11 Te kakoaua riki teuana ibukin kakawakiia ana aomata Iehova irouna, e kakabwaiaia. E taku nakoia tibun Iteraera: “Kam na kataai ngkai n aei, bon ana taeka Iehova Tabaota, ba tao N na kauki mataroan nako karawa nako imi ma n nurakina kakabaiami, ni karokoa aki-rekeni nena.” (Maraki 3:10) Ni koauana e na boni kakabwaiaia ana toro Iehova n angania te maiu are e aki toki. (Ioane 5:24; Te Kaotioti 21:4) E kaotaki man te kakabwaia ae akea boona aei, korakoran ana tangira Iehova ao nanona n tituaraoi. E kaotaki naba iai bwa a kakawaki irouna te koraki ake a a tia ni motinnanoia bwa a na beku ibukina. Ti kona ni buakan iango n nanououa ibukin boutokaan te Atua, ngkana ti kataneiaira n iaiangoa Iehova bwa te tia Karekea te kaniwanga ae iai irouna te nano n tituaraoi. E kaumakira Iehova bwa ti na iaiangoia bwa boni ngaia te tia Karekea te kaniwanga! E korea ae kangai Bauro: “Ngkana iai ae e kan nakon te Atua, ao e riai ni kakoaua ba iai te Atua, ae e karekea kaniwangaia akana a ukeria.”—Ebera 11:6, BK.
12 Te koaua bwa ti toro iroun Iehova ibukina bwa ti tangiria ao tiaki tii ibukin ana berita ae e na kakabwaiaira. Ma e ngae n anne, ti boni butimwaea naba te kaantaninga are tiaki te bwai ae buakaka ke te bangaaomata, te kakabwaia. (I-Korote 3:23, 24) Ibukina bwa e tangiriia Iehova te koraki ake a kakorakoraia n ukoukoria, man rangi ni kakawaki irouna, e baireia ngkanne bwa e na kakabwaiaia.
13. Bukin tera ngkai te bwai ni kakoaua ae te kabanea n teretere raoi iai ana tangira Iehova ibukira, boni katauraoan te karea ni kaboomwi?
13 Te aro ae te kabanea n teretere raoi riki iai kakawakiia botannaomata i matan Iehova, bon ana babaire ibukin te karea ni kaboomwi. E korea ae kangai te abotoro Ioane: “E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) E kauntabaki te iango are akea manenara ke ti aki tangiraki iroun Iehova, n te babaire ibukin katauraoan ana karea ni kaboomwi Iesu Kristo. Te koaua bwa ngkai e kabooira Iehova n te boo ae rangi ni bobuaka ike e a anga iai maiun Natina ae ana rikitemanna, e oti iai ngkanne bwa e rangi ni korakora tangirara irouna.
14. Tera aron Bauro are e kaotiotaki iai bwa e iaiangoa te karea ni kaboomwi?
14 Mangaia are, ngkana a rikirake iango aika karawawataingkami, kananoi ami iango i aon te karea n kaboomwi. Eng, iaiangoa te bwai n tituaraoi aei bwa te bwaintangira nakoim mairoun Iehova. Anne are e karaoia ngkoa te abotoro Bauro. Uringa are e kangai: “Te aomata ae e kai nanou ngai!” Ma imwina riki e a manga reitia n taku: “I katituaraoa te Atua iroun Iesu Kristo are ara Uea!” are “tangirai, are anga Ngaia i bukiu.” (I-Rom 7:24, 25; I-Karatia 2:20) E aki kainikatonga Bauro ngke e taekina aei, bwa e kakoauaa bwa tiaki tii ngaia ae e kakawaki iroun Iehova. Ko riai naba ngkoe ni kakairi iroun Bauro ni kataneiako n iaiangoa te karea ni kaboomwi bwa te bwaintangira nakoim mairoun te Atua. Tiaki tii te tia Kamaiu ae mwaaka Iehova, ma bon te tia Karekea te kaniwanga ae tatangira.
Kawakiniko Man Ana ‘Bwai n Nanowanawana’ Nako Tatan
15-17. (a) E kanga te Riaboro ni kabonganai taiani karawawata? (b) Tera kaungaan nanora ae kona n reke man rongorongon Iobi?
15 Ma ko kona ni kunea naba bwa e kangaanga kakoauaan ae a kaineti ma ngkoe taeka ni karaunano, aika kairaki koreaia aika a mena n ana Taeka te Atua. Ko kona naba n iangoia bwa e na reke irouia aomata te kakabwaia are te maiu n aki toki n ana aonnaba te Atua ae boou, ao ngkoe ko aki tau n anganaki. Ngkana ngaia aei am iango, tera ae ko na karaoia?
16 Akea te nanououa bwa ko a bon taneiai ma ana kaungaunga Bauro nakoia I-Ebeto ae kangai: “Karin ami bwai ni buaka nako ake mairoun te Atua, ba kam aonga ni kona n teimatoa n eki nako ana bwai n nanowanawana te riaboro.” (I-Ebeto 6:11) Ngkana ti iangoi ana bwai ni kamwane Tatan, n aron te mataai ni kanibwaibwai ao te wene ni bure, a rangi ni kai rio iangoaia ao e rangi n eti te iango anne. A a tia ni mwane ana aomata te Atua rimoa ao aika ni boong aikai ni kariri aikai. Ma ti aki riai n tarariaoa ana bwai n nanowanawana Tatan, are e kakorakoraa ngkai ni karinna irouia aomata nako, ae te iango ae a aki tangiraki aomata iroun Iehova ae te Atua.
17 E rangi ni mwaatai te Riaboro ni kabonganan te namakin aei ibukin katannakoaia aomata mairoun te Atua. Uringa ana taeka Biretata nakon Iobi: “E na iranna te aomata ni karaoiroaki i matan te Atua? Ao e na iranna n itiaki ane bungiaki mairoun te aine? Noria, e bon aki mama namakaina, ao a aki itiaki itoi i matana: Ao ai karako ra riki itiakin te aomata ae bon te ino!” (Iobi 25:4-6; Ioane 8:44) E korakora bwaran nanon Iobi n taeka aikai, mangaia are tai kariaia bwa e na kabwaraa nanom Tatan. N te itera are teuana, ko riai n atai ana kunemwaan Tatan bwa ko aonga n ninikoria ao ni kakorakorako riki ni buaka ibukin karaoan ae eti. (2 I-Korinto 2:11) E ngae naba ngke e kaetietaki aroaron Iobi iroun Iehova, ma e boni kakabwaiaa naba ibukin nanomwaakana ike e a kataboroa iai kabooan mwin ana bwai ni kabane ake a a tia ni bua.—Iobi 42:10.
“E Matairiki Riki Nakon Nanora” Iehova
18, 19. E a kanga ni “matairiki riki te Atua nakon nanora,” ao n “atai bwaai ni kabane”?
18 Te koaua, bwa e kona ni kangaanga tokin bwaran nanom ngkana e a korakora. Ma e kona ni buokiko taamnein Iehova bwa ko na urui “nono . . . aika a tuka atakin te Atua.” (2 I-Korinto 10:4, 5, BK) Ngkana ko maaku ibukin iango aika bubuaka aika ko karawawataki iai, karaua iaiangoi ana taeka te abotoro Ioane aikai: “Ane ti na ataira iai ba ana bwai te koaua ngaira, ao ti na kabebetei nanora i matana: ba ngkana a kabuakakaira nanora, ao E matairiki riki te Atua nakon nanora, ao e atai bwaai ni kabane.”—1 Ioane 3:19, 20.
19 Tera ae nanonaki n te kibuntaeka ae “E matairiki riki te Atua nakon nanora”? N tabetai, a kona ni karawawataira ara iango ngkai ti bon ataia bwa ti aki-kororaoi ao ti bubure, n te aro are ti a taku bwa ai akea bonganara. Ke tao ibukina bwa ai bon anuara te iaiangoi baika bubuaka ibukira, n aron are ti a kona iai n taku bwa akea te bwai teuana ae ti karaoia ae e na kukurei iai Iehova. E karaui nanora te abotoro Ioane bwa e matairiki riki Iehova nakon anne! E aki tii kaatuua ana iango i aon ara kairua, ma e a kaman atai naba ara konabwai. E atai naba ara kaantaninga ao nanora. E korea ae kangai Tawita: “E atai arora ni karaoaki; E uringira ba taano ngaira.” (Taian Areru 103:14) Eng, E atai riki aroarora ni kabane Iehova nakon ataakina iroura!
“Te Baunuea ae Tamaroa” ao “te Bau ni King”
20. Tera ae kaotaki n ana taetae ni burabeti ni kamaiu Itaia ibukin ana iango Iehova nakoia ana toro?
20 E angania ana aomata Iehova kaantaningan te manga maiu, rinanon te burabeti are Itaia. E rokoraoi te kabebetenano ao te karaunano aei, n taina are e kainnanoaki iai irouia aomata aika a rangi ni karawawataki aikai, ngke a a kairaki nako bwa taenikai i Baburon! Ibukin kaantaningan te tai are a na manga kaokaki iai nako abaia, e taku Iehova: “Ko na riki ba te baunuea ae tamaroa i nanoni bain Iehova, ao te bau ni king i nanoni bain Atuam.” (Itaia 62:3) Ni kaineti ma taeka aikai, e oti iai bwa e kunnikainia ana aomata Iehova n te karineaki ma te mimitong. E a tia naba Iehova ni karaoa ae titeboo ma aei nakon te natannaomata ae te Iteraera n taamnei ni boong aikai. Kaanga ai aron ae e karietataia bwa a aonga ni karineaki irouia aomata ni kabane.
21. Ko na kanga ni kakoauaa raoi bwa e na boni kakabwaiaa nanomwaakam ni kakaonimaki Iehova?
21 Ngke e a tabe ni kakoroaki bukin te taetae ni burabeti aei irouia te koraki ake a kabiraki, e kaotaki iai ngkanne bwa Iehova e angania aomata ni kabane aika a toro irouna te karineaki. Mangaia are ngkana ko taonaki n te nanokokoraki, uringnga bwa e ngae ngke ko aki-kororaoi, ma bon titeboo kakawakim ma “te baunuea ae tamaroa” ao “te bau ni king” iroun Iehova. Ngaia are teimatoa ni kakukureia ao kaakaraoa nanona. (Taeka N Rabakau 27:11) Ni karaoan aei, ko kona iai ngkanne ni kakoauaa raoi bwa e na boni kakabwaiaa nanomwaakam ni kakaonimaki Iehova!
[Kabwarabwara ae nano]
a A a tia ni bitaki aara tabeua.
Ko Uringnga?
• Ti na kanga n riki bwa ‘ana bwai’ Iehova?
• Bukin tera ngkai e kakawaki iaiangoan Iehova bwa te tia Karekea te kaniwanga?
• Baikara ana ‘bwai n nanowanawana’ nako Tatan ae ti riai n tarataraira iai?
• N te aro raa, ae e “matairiki riki te Atua nakon nanora”?
[Taamnei n iteraniba 28]
Bauro
[Taamnei n iteraniba 28]
Eria
[Taamnei n iteraniba 28]
Anna
[Taamnei n iteraniba 30]
A mwaiti kurikuri taeka ni kabebetenano i nanon Ana Taeka te Atua