Te Titiraki ae Kaminonano

A BATI ao a kakaokoro iango ibukin te maiu ao te mate. A iangoia tabeman bwa a na maiu imwini mateia, tao n te aekaki n rabwata teuana ke n te tabo riki teuana. A iangoia tabeman riki bwa a na manga bungiaki nakon te maiu riki teuana. Ma iai naba aika a iangoia bwa tokini bwaai ni kabane te mate.

E bae n iai oin am koaua i aon aei, ni kaineti ma kaikawaam ao rikiam. Kioina ngkai a rangi ni kakaokoro iango ni kaineti ma te bae riki n te mate, iai te aomata ke te tabo ae ti kona ni karekei iai kaeka aika kona n onimakinaki ao aika koaua nakon te titiraki ae kaminonano aei?

I nanon tienture aika bati ao a a tia mataniwi n Aaro n angareirei i aon te taamnei ae aki mamate. Angia Aaro aika bubura n aron te Aro ni Kristian, te Aro n Hindu, n Iutaia, ni Muslim, ao tabeua riki, a kakoauaa bwa iai te taamnei ae aki mamate are a taekinna bwa e maiu imwini maten te rabwata ao ni mena n te aba n taamnei. Ma n te itera are teuana, a kakoauaa taiani Buddhist bwa i nanon ana tai ae bati ni manga bubungiaki riki te aomata, ao iai te korakora, ke te iango irouna ae e kona n roko n te tabo ae kakukurei ae aranaki bwa Nirvana.

Man aeka n reirei aikai, a a kakoauaa angia aomata n te aonnaba bwa te mate bon te mataroa nakon te maiu n te aonnaba riki teuana. Irouia aomata aika bati, te mate bon te mwaneka ae kakawaki ni waakin te maiu, ao e taraa n ae te mate irouia bon ana kantaninga naba te Atua. Ma tera ae e taekinna te Baibara ibukin aei? Taiaoka wareka te kaongora ae imwina. Ko na bae ni kubanako n te kaeka.