E Nanoanga te Atua?

REIREIARA MAN TE KARIKIBWAI

E kabwarabwaraaki te nanoanga bwa “te kona n uataboa ana namakin temanna ke te bae e rinanona, n arom n iangoia bwa tera arom ngke arona bwa e riki anne nakoim.” E taku te tia rabakau i aoni marurungin te iango ae Dr.  Rick Hanson, bwa “ti boni bungiaki ma te konaa n nanoanga.”

IANGOA AEI: E aera ngkai iai iroura te nanoanga, ae te aroaro ae e tii reke irouia aomata? E kabwarabwaraa te Baibara bwa e karikiia aomata te Atua bwa katotongana. (Karikani Bwaai 1:26) Ti karikaki bwa katotongan te Atua, ngaia ae ti a kona iai ni kaotiotii aroarona aika raraoi. Ngaia are ngkana a kairaki aomata n aia nanoanga bwa a na buokiia tabemwaang, a a boni kaotiota iai ana nanoanga aia tia Karikiriki ae atataiaomata ae Iehova ae te Atua.—Taeka N Rabakau 14:31.

REIREIARA MAN TE BAIBARA IBUKIN ANA NANOANGA TE ATUA

E nanoangaira te Atua ao e aki tangiria bwa ti na rawawata. E kangai te Baibara ni kaineti ma I-Iteraera rimoa ake a nanomwaaka i aan tautoronakia ae karawawata i Aikubita n taorimwiaki n ririki aika 40 ake a kangaanga n te rereua: “E rawawata n aia tai n rawawata ni kabane.” (Itaia 63:9) Tiaki n ae e tii nora rawawataia te Atua. E namakina naba marakia. E taku: “I atai raoi marakia ake a taonaki iai.” (Te Otinako 3:7) E taku riki: “Ane e ringingkami ao e ringa ataeini matau.” (Tekaria 2:8) Ngkana a kammarakira tabemwaang, e maraki naba.

E karaui nanora te Baibara bwa e ngae ngke ti iangoia bwa taani bure ngaira ao ti aki tau ni karekea ana nanoanga te Atua, ma “e rianako riki aron te Atua nakon nanora ao e atai bwaai ni kabane.” (1 Ioane 3:19, 20) E atai riki arora te Atua nakon ataakina iroura. E bane n atai raoi baika riki nakoira, ara iango, ao ara namakin. E bon nanoangaira.

E karaui nanora ni kangai te Baibara

• “Ane ko na wewete, ao e na kaekako Iehova. Ko na tang ni kani buokaki ao e na kangai, ‘Aio ngai!’”—ITAIA 58:9.

• “‘Bwa I ataa te bwai ae N na karaoia nakoimi,’ bon ana taeka Iehova, ‘N na anganingkami te rau ao tiaki te kabuanibwai, bwa e aonga n reke iroumi te bwai ae raoiroi nakon taai aika a na roko, ao te kantaninga. Ao ane kam na weteai ma n roko ao n tataro nakoiu, ao N na ongo iroumi.’”—IEREMIA 29:11, 12.

• “Ikotii rannimatau n am kunniman ae nnen te ran. Tiaki a koreaki mwia i nanon am boki?”—TAIAN ARERU 56:8.

E TABEAKINIRA TE ATUA, E OTA IROURA, AO E NAMAKINI RAWAWATARA

E kona ataakin ae e nanoangaira te Atua ni buokira bwa ti na kekeiaki n rawawatara? Iangoa te bae e rinanona Maria:

“I namakinna bwa e rangi ni karawawata te maiu aei ao ni katanginano ngke I rinanon te maraki ae korakora ni buan natiu te mwaane ae 18 ana ririki n aorakina ae te kaentia i nanon uoua te ririki. I un iroun Iehova ngke e aki ibuobuoki ao ni kamarurunga natiu!

“Onoua te ririki imwina ao I a maroro ma temanna raoraou n te ekaretia ae e tatangira ma n atataiaomata, ao e ongora ngke I kaota au namakin ae e aki tangirai Iehova. Imwin iraua te aoa n ongora irou ao n aki uruana au karaki, e a taekina te kibu are e a kaungaa nanou, ae 1 Ioane 3:19, 20 ae kangai: ‘E rianako riki aron te Atua nakon nanora ao e atai bwaai ni kabane.’ E kabwarabwaraa neiei ae e ota Iehova n rawawatara.

“E ngae n anne, e boni kangaanga bwa N na katoka uniu! I a wareka ngkanne Taian Areru 94:19, ae kangai: ‘Ngkana a taonainako iango n raraoma, ao ko kabebeteai ma ni karaua nanou.’ Irou, kaanga a koreaki kiibu aikai ibukiu! N tokina ao I a ataia ae e karaunano te kona n taekina rawawatau nakon Iehova, n ataakin ae e bon ongora ao e ota irou.”

Ai karaunanora ataakin ae e ota iroura te Atua ao e namakini rawawatara! Ma e aera ngkai e a rangi ni bati te rawawata? E katuuaaeira te Atua ibukini karaoani mwakuri aika kairua? E na katoka te rawawata ni kabane te Atua? A na kaekaaki titiraki aikai ni kaongora aika imwina.