Ngkana Ko Kaaitara ma te Aoraki ae Kakaiaki

“Ngke I a ataia ae e a kaentia maamaau ao kanoannanou, ao I a ataia ae N nang boni mate. Imwin okiu mairoun te taokita ao I a iango ni kangai: ‘Tiaki aei ae I kantaningaia ma I a riai ni kakaaea arou ni kekeiaki ma aorakiu aei.’”—Linda, ae 71 ana ririki ni maiu.

“I rotakibuaka n te aoraki ae rangi ni kammaraki are rota au nerve n iteran ubuu ae te maing. N tabetai, ibukini korakoran te maraki ao I a taonakinako iai n te rawawata. A a bati taai ake I namakina iai te maroaa ao I iaiangoa naba iai bakabureau.”—Elise, ae 49 ana ririki ni maiu.

Te mwaane ae aoraki ae tekateka n aia kaa mwauku ao e raonaki irouia ana utu

NGKANA ko a tia ke e a tia temanna ae tangiraki iroum n reke n te aoraki ae kamamate, ko kona n ota n aroni karawawatana. Irian te aoraki anne bon namakin aika kakaokoro aika karawawata. E kona ni korakora riki te maaku ao te tabeaianga mani kakamaakun te okioki n tutuo, kangaangan reken ke boon te bwainnaoraki, ke rotakibuakam imwin taiani bwainnaoraki. Rawawatan te iango bon irian naba te aoraki ae kakaiaki, ao e kona n rangi n riao.

E na reke ia buokara? A bati aika kunea bwa a rangi ni kabebeteaki man onimakinan te Atua, rinanon te tataro ao warekani kibun te Baibara aika kabebetenano. Ti kona naba ni buokaki n aia tangira ma aia boutoka ara utu ao raoraora.

AROIA TABEMAN NI KEKEIAKI IAI

E anga ana taeka n reirei Robert ae 58 ana ririki ni kangai: “Kaitaraa aorakim ma onimakinan Atuam, ao ane e na kananomwaakako. Tataro nakon Iehova, bunra nanom nakoina, ao butiia taamneina. Butiia bwa e na kakorakorako ibukia am utu, ao e na kariaia naba bwa ko na kekeiaki n aorakim ma te rau.

“E rangi n ibuobuoki ngkana a boutokaiko am utu, n aroia n tatauraoi ibukim. I tatarebooniaki ni katoabong iroun temanna ke uoman ao a titiraki ni kangai: ‘Ko uara?’ A kakaungaai raoraou man taabo aika kakaokoro. I a namakina te korakora riki n aroia anne, ao I buokaki iai bwa e na aki bwara nanou.”

Ngkana ko kawara raoraom ae aoraki, ao uringa te bae e katerea Linda ae kangai: “Te aomata ae aoraki, e boni kani karaoi naba baika e taneiai te aba iai, ao e bae n ae iai taai ake e aki kani maroroakina iai taekan aorakina. Ngaia are taekini baika kam boni mamaroroakin.”

Ibukin te korakora are mairoun te Atua ao te kabebetenano man te Baibara, ao aia boutoka naba ara utu ma raoraora aika tatangira, ti a kona n teimatoa ni kakoauaa ae e boni manena maiura aei, e ngae naba ngkana ti kabokorakora ma te aoraki ae kakaiaki.

Kibun te Baibara Aika Kona n Ibuobuoki

Onimakina te Atua.

“I titirakina Iehova ao e kaekaai. E kainaomataai mani baike I maakui ni kabane. E wewete te aomata ae mangori aei, ao e ongo Iehova.”—Taian Areru 34:4, 6.

E taku Linda are e mwaneweaki mai mwaina: “I aki tatataro ni kangai: ‘Kamarurungai riki.’ Ma I tataro ni kangai: ‘Buokai ni kakorakoraai, ao buokai bwa N na nanomwaaka n aorakiu.’”

Kakorakorako n Ana Taeka te Atua.

“Akea te tia maeka iai ae e na kangai: ‘I aoraki.’”—Itaia 33:24.

Iaiangoi ana berita te Atua ibukin taai aika imwaira. Karaoan aei e na anganiko te kantaninga ae raoiroi, ae e na kananomwaakako.

Karekea boutokaam mairouia am utu ao raoraom.

“E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.”—Taeka N Rabakau 17:17.

E taku Elise are mwaneweaki mai mwaina: “Tai titiku n tii ngkoe. Kariaia bwa a na buokiko raoraom. E na bae n iai taai ake ko na namakina iai te maroaa, ao n iangoia bwa e aki ongo iroum te Atua, ma tai titiku n tii ngkoe.”