Ngkana E Aki Kakaonimaki Buum

“Ngke e tuangai buu bwa e nang kitanai ibukin te aine ae ataei riki ao irou e a raoiroi riki ngkana I a mate. Bon te babakanikawai te mwaan aei, ao riki ngkana I uringi taai ake I kakeaai iai ibukina.”—Maria, mai Tibein.

“Ngke e rina ni kitanai buu, ao titeboo ma e a aki namakinaaba nanou. A a bane n uruaki kanoani miira, baike ti kantaningai, ao ake ti bairei. Iai boong ake I taku bwa I aki tabeaianga iai, ma imwina I a manga taonakinako naba n te rawawata.”—Bill, mai Tibein.

E KAURUAKINANO te aki kakaonimaki i marenaia taanga. Bon iai tabeman ake a noria bwa a kona ni kabwarai aia bure buuia ake a raraoma ni koaua, ao a a manga kamatoaa riki aia mare.a Ma e ngae ngkana e teimatoa te mare anne ke e aki, ma a bon rangi ni maraki naake a a tia n aki kakaonimaki buuia nakoia. A kangaa nakanne ni kekeiaki ma marakia anne?

KIBUN TE BAIBARA AIKA KONA N IBUOBUOKI

N aki ongei rawawatan nanoia buu ni mare ma a bati ake a a tia ni kabebeteaki man te Baibara. A ataia ae e nori rannimataia te Atua ao e nanoangaiia.—Maraki 2:13-16.

“Ngkana a taonainako iango n raraoma, ao ko kabebeteai ma ni karaua nanou.”—Taian Areru 94:19.

E ururing ni kangai Bill: “Ngkana I wareka te kibu aei, ao I kona ni kataamneia aron Iehova ni karaua nanou, n aron te karo ae nanoanga.”

“Ko kakaonimaki ni koaua nakon ane e karaoa naba anne.”—Taian Areru 18:25.

E taku Nei Carmen, are e a tia n aki kakaonimaki buuna nakoina i nanon iraua namwakaina: “E a tia n aki kakaonimaki buu, ma I ataia ae e na boni kakaonimaki ni koaua Iehova nakoiu. E na bon aki kariaia bwa e na bwara nanou.”

“Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii . . . ao te rau are mairoun te Atua ae riaon aia iango aomata, e na kawakin nanomi.”—I-Biribi 4:6, 7.

E taku Sasha: “I aki toki ni wawareka te kibu aei, ao ngkana I tataro man tataro, ao e bon anganai te rau te Atua.”

Naaka a taekinaki aikai a a tia n iangoia bwa ai akea uaan te maiu aei. Ma a onimakina Iehova ae te Atua ao a kakorakoraaki n ana Taeka. E taku Bill: “Ibukin au onimaki I a ataia ae manena maiuu, n taai naba ake a a taraa iai n aki koro bukini bwaai ni kabane. E ngae ngke ‘I nakonako n te mwarua ae rotongitong’ n tabetai, ma e bon raonai te Atua.”—Taian Areru 23:4.

a Ibukin rinanoan ae e riai te kabwarabure ke e aki, nora te kaongora ae rereitaki n te Awake! n te taetae n Ingiriti, ae bwain Eberi 22, 1999, ae atuna When a Mate Is Unfaithful.”

Aroia Tabeman ni Kekeiaki

A iaiangoi kiibu aika kabebetenano.

E kangai Bill: “I wareka moa te boki ae Iobi ao imwina Taian Areru, ao I raini kiibu ake a taraa ni kaineti raoi nakoiu. I noria bwa a rinanon naba te aeka ni maraki ao n tabeaianga ae I rotaki iai taani korea te Baibara aikai.”

Karekea kabebeteam man taiani katangitang.

E ururing ni kangai Carmen: “Ngkana e aki rereke matuu n te bong, ao I a ongoraei naba katangitang. I rangi ni kabebeteaki iai.” E taku Daniel: “I reireinai ni kitaa ao I namakina te rau man tangiraoina.”

Maroroakin am namakin.

E taku Daniel: “I bon aki mamaroroakin au namakin. Ma iai tabeman raoraou ni kaan ake I mamaroro ma ngaiia ni katoabong. I bunra nanou nakoia n te kororeta ke ni boni maroro ma ngaiia. E rangi n ibuobuoki anne.” E taku Sasha: “E rangi ni kakawaki aia ibuobuoki au utu. E tatauraoi ibukiu tinau ao ngkana I kani maroro, e tauraoi n ongora. E buokai naba tamau bwa N na ataia ae I tangiraki ao I mano raoi, ao e kaoka raun nanou.”

Botumwaaka n tataro.

E taku Carmen: “I tataro n taai nako ao I namakinna ae e aki kitanai te Atua, e kakauongo irou ao e buokai. I a kaan riki ma te Atua i nanon te tai ae karuanikai aei.”